Nankakasakey ed Ayadyarin Bedber na Aro

“Mantutunosan a mankakasakey diad aro.”​—COLOSAS 2:2, NW.

1, 2. Anton mangaapag-apag ya impluensya so nasasagmak nagkalautla natan?

TALINENG! Sakey a maksil a boses so mananiweng ed interon tawen a mankuan: “Kasi la so dalin tan dayat: ta say diablo inmakseb ed sikayo, ya wala ed baleg a sanok to, ya amta to a daiset la so panaon to.” (Apocalipsis 12:12) Diad ilalabas na kada taon, satan a mensahe so lalon makapakebbiew parad saray manaayam ed dalin.

² Say baleg a kabusol nen Jehova so abayag lan kabkabat bilang sumusumpa (Satanas) tan sakey a managpauges (Diablo). Balet sayan manamalikdo so walaan na makapakebbiew a betang natan​—sikatoy nagmaliw a sakey a masanok a dios! Akin? Lapud sikatoy inbasileng manlapud tawen nen Miguel tan saray anghel to diad bakal a ginmapo ed tawen nen 1914. (Apocalipsis 12:7-9) Kabat na Diablo ya antiktikey lay panaon to pian paneknekan so angat to a nipabeneg ton amin so totoo manlapud panagdayew ed Dios. (Job 1:11; 2:4, 5) Lapud aglara makaiwas, sikato tan saray demonyo to so nagmaliw a singa onsasanok iran bayaong ya ipapangget day sanok da ed agmaligen iran ulop na katooan.​—Isaias 57:20.

3. Anto so nagmaliw ya epektoy inkauges nen Satanas ed panaon tayo?

³ Sarayan agawgawa, ya agnanengneng na kamataan na too, so mangisasalaysay no akin a wala natan so inkalapagan a kagegebay moralidad ed limog na katooan. Isasalaysay met na saraya so desperadon sagpot na totoo pian uksoyen iray inkaapag-apag na nasyones a talagan agmakapantunosan. Siruruksan manlulusoban iray grupoy tribu tan kailalakan, a sengegay pakaandiay ayaman tan kapatakyas na minilyon a totoo. Agpankelawan a pinmalalo so kaugsan ed agnaparaan ya iskala! A singa ed impasakbay nen Jesus, ‘say aro na amayamay onbetel.’ Inerman a nengnengen yo et wala so agpantutunosan tan kaandi aro a mananda natan na agmaligen a katooan.​—Mateo 24:12.

4. Akin a saray totoo na Dios so nagkalalo lan walad kapeligroan?

⁴ Nisesengeg ed kipapasen na mundo natan, say pikakasi nen Jesus so walaan na nagkalalon kabaliksan: “Ag ko pikasi ya ekalen mo’ra ed mundo, no ag ingen ilaban mo ra ed mauges. Ag ira taga mundo, salanti onong ya ag ak taga mundo.” (Juan 17:15, 16) Natan, say “mauges” so nagkalautlan mangipapangget na sanok to sumpad saramay “mangoonor ed gangan na Dios, tan wala ed sikara so impantasi nen Jesus.” (Apocalipsis 12:17) No aliwan lapud pamabantay tan maaron panangasikaso nen Jehova, naandi la komon iray matoor a Tastasi to. Say bilay tayo so mandedependi ed makagunggunan pangaanamot tayo ed amin iran probisyon a gagawaen na Dios parad kaligenan tan pankaabigan tayo ed espiritual. Lalanoren na satan so pangisekar tayo’d inkasikatayo a mitukoyan ed panangipakurang na pakayari To diad panamegley nen Kristo, a singa isisimbawa na apostol diad Colosas 1:29.

5, 6. Anto so alikna nen apostol Pablo nipaakar ed saray Kristianon taga Colosas, tan akin a matukoy so tema na teksto parad 1995?

⁵ Anggaman maseguron ag-iran balot api-arap-arapan nen Pablo, inad-aro to so agagi to ed Colosas. Imbaga to’d sikara: “Komon ta natalosan yo no panon lay kapagaan ko parad sikayo.” (Colosas 2:1, The New Testament in Modern English, nen J. B. Phillips) Lapud saray patumbok nen Jesus so agkabiangan na mundo, mantultuloy a sasalien na “mauges” a buyaken so pankakasakey na agagi diad pangisisibwag ed limog da na espirituy mundo. Impanengneng na balitan intarok nen Epaphras manlapud Colosas a saya so nagagawa la ed saman anggaman ed memelag a laknab.

⁶ Sakey ed manunan kapagaan nen Pablo parad Kristianon agagi to so nibalikas ed sarayan salita: “Mantutunosan a mankakasakey diad aro.” Saray salita to so walaan na nikadkaduman kabaliksan natan, diad mundon apusek na agpankakasakey tan andiay aro. No ipapuso tayo so simbawa nen Pablo, napangayagaan tayo so panangasikaso nen Jehova. Naeksperiensia tayo met so pakayari na espiritu to ed bilay tayo, ya ontutulong ed sikatayon nalabanan iray desdes na mundo. Agaylan makabat iyan simbawa! Kanian, say Colosas 2:2, NW, so magmaliw a temay teksto tayo parad 1995.

7. Anton pantutunosan so nepeg a naromog ed limog na tuan Kristianos?

⁷ Diad asasakbay a sulat ed saray taga Corinto, inusar na apostol so laman na too bilang ilustrasyon. Insulat to ya “angapo so pansisian” ed kongregasyon na alanaan a Kristianos “[noagta] saray kabiangan wala so dili a panagpaga ra ed sakey tan sakey.” (1 Corinto 12:12, 24, 25) Agaylan makapakelkelaw ya ilustrasyon! Saray lima tan sali so mantutulongan, balang sakey so akakabit ed parti arum a laman tayo. Pareho met itan ed sankamundoan ya impanaagin panlilimog, a titibukelen na saray alanaan tan minilyon a maniilalo’d bilay ed paraison dalin. Nepeg ya agtayo isisian so inkasikatayo manlapud laman na pinankakasakey a Kristianos pian manbilay a sian! Lapud onkukurang diad panamegley nen Kristo Jesus, say espiritu na Dios so daakan ya onaagos ed sikatayo diad panamegley na pililimog tayo ed agagi tayo.

Say Pantutunosan so Nisisiglaot ed Pikakabat

8, 9. (a) Anto so letnegan ed pibibiang tayo ed pantutunosan ed kongregasyon? (b) Panon kayon makagamor na pikakabat nipaakar ed Kristo?

⁸ Say sakey ed manuna iran punto nen Pablo et say Kristianon pantutunosan so nisisiglaot ed pikakabat, nagkalautla nipaakar ed Kristo. Insulat nen Pablo a saray Kristiano so “mantutunosan a mankakasakey diad aro tan nipaakar ed amin a kayamanan na nagnap a panamaseguro na pakatalos da, a nipaakar ed suston pikakabat ed sagradon sekreto na Dios, salanti, si Kristo.” (Colosas 2:2, NW) Agamoran tayo la so pikakabat​—saray katuaan—​nanlapulad impanaral tayo na Salitay Dios. Bilang kabiangan na pangamor na pakatalos no panon a dakel ed sarayan katuaan so matukoy ed gagala na Dios, atalosan tayo so importantin betang nen Jesus. “Ya wala’ ra ed sikato ya amin ya akaamot so saray kayamanan na karonongan tan pakatalos.”​—Colosas 2:3.

⁹ Kasin ontan so liknaan yo nipaakar ed si Jesus tan say betang to diad gagala na Dios? Dakel ed Kakristianoan so sibubulos a manasaglawi ed si Jesus, ya ibabagan sikatoy inawat da la tan nisalba la. Balet kasin sikatoy peteg a kabkabat da? Andi, ta maslak so manisia ed agmakasulatan a bangat a Trinidad. Aliwan lapud amta yo lay katuaan to nipaakar ed saya balet ta maseguron walaan kayo na malaknab a pikakabat ed no antoy imbaga tan ginawa nen Jesus. Minilyon so natutulongan ed pakakagamor na pikakabat ed si Jesu-Kristo diad panamegley na napno na impormasyon a panagaral diad panguusar na libron The Greatest Man Who Ever Lived. Ingen kaukolan tayo nin itultuloy a paaralemen so pikakabat tayo ed si Jesus tan saray paraan to.

10. Panon a say niyamot a pikakabat so walan naala tayo?

¹⁰ Say balikas ya “amin . . . so saray kayamanan na karonongan tan pakatalos” et “akaamot” ed si Jesus et agto kabaliksan a say ontan a pikakabat et agtayo nayarian a dampoten. Imbes, satan so singa akaparungtal a mina. Agtayo la kaukolan a mananap ni ed liber na maawang a lugar pian amtaen no iner so pangigapoay pankotkotan. Amta tayo la​—onggagapo so tuan pikakabat ed no antoy ipaparungtal na Biblia nipaakar ed si Jesu-Kristo. Legan a nagkalalon naaapresya tayo so betang nen Jesus ed pananumpal ed gagala nen Jehova, nagagamoran tayoray kayamanan na tuan karunongan tan suston pikakabat. Kanian say kaukolan tayo lambengat et say pantultuloy a pankotkot ni, legan ya ipapaway so dakel niran bato odino ankablin bengatlan naala ed sayan lapuan a pankokotkotan.​—Uliran 2:1-5.

11. Panon tayon napadaak so pikakabat tan karunongan tayo diad panamegley na pandalepdep nipaakar ed si Jesus? (Iyilustra diad pangusar na impanguras nen Jesus ed saray sali na saray babangatan to, odino mangusar na arum niran alimbawa.)

¹¹ Alimbawa, naamtaan tayo la ya inurasan nen Jesus iray sali na apostoles to. (Juan 13:1-20) Anggaman ontan, kasin adalepdep tayo so leksion ya imbangat to ed sikatayo tan say awawey ya impanengneng to? Diad panggawa ed satan, makakotkot itayo na kayamanan na karunongan a manggawa ed sikatayo​—on, mamakiwas ed sikatayo​—ya umanen so paraan na pidedeneng tayo ed sakey ya agi tayon laki odino bii a say personalidad to et abayag lan makapaingongot ed sikatayo. Odino sano naikdan na asainmin ya agtayo tanton labay, ompan onduma so ikiwas tayo kayari sigpot a pakatalos tayo ed kaimportantian na Juan 13:14, 15. Ontan no panon so pangaapekta ed sikatayo na pikakabat tan karunongan. Anto kasi nayarin epekto to ed arum legan ya itutukoy tayo so inkasikatayo ed mas malaknab a pikakabat ed kinen Kristo? Anganko ta say pulok so ‘nagkalalon mantutunosan a mankakasakey diad aro.’a

Say Pakasbel so Maneral ed Pantutunosan

12. Nipaakar ed anton pikakabat a nepeg tayon manbantay?

¹² No say suston pikakabat so mamadaak na ‘pagmaliw a mantutunosan a mankakasakey diad aro’ tayo, antoray pansumpalan ed bengatlan “kakabatan balet aliwa a tua”? Say kasuniyan to​—kontrobersya, agpantutunosan, tan iyaarawi manlapud pananisia. Kanian nepeg tayon manalwar sumpad ontan iran palson pikakabat, a singa ed impasakbay nen Pablo ed si Timoteo. (1 Timoteo 6:20, 21) Insulat met nen Pablo: “Kuan ko so saya, pian ag kayo komon napalingo ed panangayat na salita. Manasikaso kayo ta onpan wala so mangawa na deral ed sikayo lapu ed filosofia to tan andi kakanaan a panamalingo, unong na daan ya ugali na totoo, unong ed saray dinaralin bangat na mundo, tan aliwa’n unong ed Cristo.”​—Colosas 2:4, 8.

13, 14. (a) Akin a saray agagin taga Colosas so niiyan ed kapeligroan no nipaakar ed pikakabat? (b) Akin a say arum natan et nayarin mangipasen a sikaray andi ed ontan a mapeligron kipapasen?

¹³ Saray taga Colosas a Kristianos so aliktob na manamalikdon impluensya a talagan tatawagen a palson pikakabat. Dakel ed Colosas tan ed kabangibang to so mamapablin tuloy ed saray Griegon pilosopya. Wadtan met iray manaagamil na Judaismo a malabay a patumboken iray Kristiano ed Mosaikon Ganggan, a singa saray agew na piesta tan kakaukolanen a tagano. (Colosas 2:11, 16, 17) Aliwan sumpa si Pablo ed pangamor na agagi to na tuan pikakabat, balet kaukolan day manalwar ya anggapo so mangisuwawi ed sikara bilang biktima, diad pangusar na makapasagyat ya argumento ta pian mangumbinsi ed sikaran mangawat ed panmoria lambengat na too ed bilay tan kiwakiwas. Natalosan yo a no walay pigara ed kongregasyon a mangiyabuloy ed panag-isip tan saray desisyon da a mangigiya ed ontan ya agmakasulatan iran ideya tan awawey nipaakar ed bilay, satan so maneral ed pantutunosan tan aro ed baetan na saray membro ed kongregasyon.

¹⁴ ‘On,’ nayarin isipen yo, ‘nanengneng koy kapeligroan a nidungetan na saray taga Colosas, balet anggapo ak ed kapeligroan a naimpluensyaan ed saray ideya na Griego, a singa say ag-ompatey a kamarerwa odino trinitaryon dios; ni anggapoy nanengneng kon antokaman a peligro ed pakasagyat ed paganon piestay opisyal na palson relihyon ya aliktaran ko la.’ Maabig no ontan. Maabig so pagmaliw a sigpot a kumbinsido nipaakar ed inkasuperyor na manunan katuaan a niparungtal diad panamegley nen Jesus tan say nabasan Kasulatan. Balet, agta sikatayo so walad kapeligroan manlapud arum a pilosopya odino panmoria na too a kasmak natan?

15, 16. Anton panmoria ed bilay so nayarin mangapekta ed panag-isip na sakey a Kristiano?

¹⁵ Sakey ya awawey ya abayag lan walan mangiimpluensya et: “Iner la natan so sipan na isasabi to. Niiyan la ed saray pantyon iray atateng tayo, balet amin a bengatla so mantultuloy nin onman a singa nensaman.” (2 Pedro 3:4, The New English Bible) Satan a liknaan so nibalikas ed arum niran salita, balet say panmoria et pareho. Singa bilang, nayarin ikatunongan na sakey, ‘Sanen inmunan naaralan ko so katuaan ed abayag lan panaon, say anggaan kono et “ngalngali la wadia.” Balet ta anggad natan et anggapo ni, tan siopa ta so makaamta ed isabi to?’ Iyaliling lan ontan, ya anggapo so siopaman a makaamta no kapigan so isabi anggaan; balet, imanoen so punto-de-bistan impanengneng nen Jesus: “Manlikas kayo, manbantay tan mikasi kayo: ta ag yo amta no kapigan a panaon.”​—Marcos 13:32, 33.

¹⁶ Agaylan mapeligro so pangadapta ed ontan a panmoria a, ta agkabat no kapigan so isabi anggaan, nepeg tayon manplano ed sakey a nagnap tan “normal” a bilay! Nanengneng itan ya awawey ed panangikatunongan a, ‘Maabig ni panggawa na kundang a mangiyaabuloy ed siak (odino ed ananak ko) a nawalaan na respetadon karera a mangiter na baleg a sueldo tan diad ontan et napangayagaan ko so komportablin panagbilay. Siempre, atendian koray Kristianon miting tan manggawa na pigaran pibibiang ed panagpulong a kimey, balet anggapoy rason parad siak a manggunaet odino manggawa na baleg a panagsakripisyo.​—Mateo 24:38-42.

17, 18. Anton panmoria so impaseseg nen Jesus tan saray apostol a niwala ed sikatayo?

¹⁷ Anggaman ontan, agniburi ya inrekomenda nen Jesus tan saray apostol to a sikatayoy manbilay a walaay pankaganatan nipaakar ed panangipulong na maong a balita, a mangisesekar tan akaparaan a manggawa na saray panagsakripisyo. Insulat nen Pablo: “Et kuan ko ya, agagi, ta say panaon apatikeyan la, ta pian manlapu ed natan, saray lalaki ya walaan na asawa, magmaliw ira a singa angapo so asawa ra; . . . tan saray manaliw, singa angapo ed sikara; tan saray managamil ed mundo, agda komon aagamilen ya alabas: ta say ugali na saya’n mundo nanaebas.”​—1 Corinto 7:29-31; Lucas 13:23, 24; Filipos 3:13-15; Colosas 1:29; 1 Timoteo 4:10; 2 Timoteo 2:4; Apocalipsis 22:20.

¹⁸ Arawi manlapud pangisusuheri a magmaliw a komportablin bilay so kalat tayo, onia so insulat nen Pablo diad silong na inkapuyanan: “Ta angapo so intarok tayo dia ed mundo, et ag tayo met nayariay mangala na antokaman a bengatla; no wala siri pantagano tayo tan kawesen tayo pasaragen tayo komon ya. . . . Mibakal ka ed maabig a pibabakal na pananisia, benbenan mo so bilay ya andi anga, a sikato so atawagan mo, tan impaliwawam so maabig ya panamatua ed arapan na saray dakel a tasi.”​—1 Timoteo 6:7-12.

19. Panon a naaapektoan so sakey a kongregasyon no aawaten da so panmoria ed bilay ya impaseseg nen Jesus?

¹⁹ Sano say sakey a kongregasyon so titibukelen na maseseg iran Kristiano a sigpot a manbabanikel a ‘mangipaliwawa ed maabig a panamatua,’ natural lambengat so ilesa na pantutunosan. Agda isusuko so inkasikara ed awawey a, ‘Dakel iray kayamanan mo ya inyatol nipaakar ed dakel a taon; manpainawa ka, mangan ka, uninom ka, manliket ka.’ (Lucas 12:19) Imbes, sikaray mankakasakey ed parehon sagpot, a mabulos a manggawa na saray panagsakripisyo a sigpot a mibiang anggad posibli ed sayan agbalot-naulit a kimey.​—Ipareng so Filipos 1:27, 28.

Manalwar Nipaakar ed Makapasagyat Iran Argumento

20. Anto ni sakey a lawak a nayarin mangibalang ed saray Kristiano?

²⁰ Siempre, wala met niray arum a paraan a nayarin saray Kristiano et ‘napalikdo ed makapasagyat iran argumento’ odino anggapoy-kargan panamalikdon mangamper ed ‘pantutunosan a mankakasakey diad aro.’ Insulat na sangan opisina na Watch Tower Society ed Alemanya: “Sakey ya inkagawa so nansengegan na pansasangsangan, saray mangaalay nanduruman dapag a manangipalapag tan anggan mamatatken nipaakar ed klase na panagtambal ya inusar na sakey ya agin laki.” Inyarum da ni: “Lapud nambabangil a metodon uusaren tan kinarakel na saray pasyenti, saya so amalesa na pansasangsangan tan, no kasin say paraan na panagtambal et walaay ispiritistikon pisisiglaotan, ompan saya so magmaliw a mapeligro.”​—Efeso 6:12.

21. Panon a nayarin nibalang na sakey a Kristiano so nepeg a pangiyapasakeyan na imano natan?

²¹ Labay na Kristianos a mansiansian mabilay tan mabunigas ta pian nadayew da so Dios. Anggaman kuan, diad sayan sistema et sikatayo so talagan ontatken tan mansakit lapud ag-inkayadyari. Imbes ya idanet iray isyu nipaakar ed bunigas, iyapasakey so imano tayo ed peteg a solusyon, parad sikatayo tan parad arum. (1 Timoteo 4:16) Si Kristo so pinagkasentro na satan a solusyon, a singa si Pablo ed saray Taga Colosas et sikatoy pinagkasentro. Balet tandaan, sinaglawi nen Pablo a walaray onsabin walaay “panangayat na salita” a mangiyarawi ed imano tayo manlapud Kristo, ya nipaarap so imano tayo ed saray metodo na panag-diagnose, panagtambal, odino panagdieta.​—Colosas 2:2-4.

22. Anton asimbang ya awawey so nepeg a niwala ed sikatayo no nipaakar ed dakel ya ibabaga nipaakar ed saray metodo na panag-diagnose tan panagtambal?

²² Saray totoo ed interon globo so mantultuloy a natatabek na saray anunsyo tan saray paneknek nipaakar ed amin a nengneng na panagtambal tan paraan na panag-diagnose. Say arum et kasmak ya uusaren tan bibidbiren; say arum met so kaslakan a babalawen odino panususpetsaan ni.b Kada sakey a too so responsablin manetermina no antoy gawaen to nipaakar ed bunigas to. Balet saramay mangaawat na simbawa nen Pablo a naromog ed Colosas 2:4, 8 so nawalaan na proteksyon pian ag-naingganyo na “panangayat a salita” odino “andi kakanaan a panamalingo” a mangibalang ed dakel, lapud andian na ilalo ed Panarian, et desperadon natambal. Anggan say sakey a Kristiano so kumbinsido a say sakey a klase na panagtambal so ompatnag a maong parad sikato, agto nepeg ya ibalita iya ed Kristianon impanaagi, ta satan so magmaliw a teman kasmak a pantotongtongan tan pantataloan. Diad ontan et nipatnag to a sigpot so respeto to ed kaimportantian na pantutunosan ed kongregasyon.

23. Akin a nagkalautlan walaan itayoy katunongan a magmaliw a magayaga?

²³ Indanet nen Pablo so Kristianon pantutunosan bilang basiyan na peteg a gayaga. Diad agew to et say bilang na kongregasyon so talagan melag a tuloy nen say natan. Ingen insulat to ed saray taga Colosas: “Angan agni ak ya akaarap ed laman, balet wala ak ya iba yo ed espiritu, a magaygayaga tan mangimano na okso’yo, tan say kaeletan na pananisia ed Cristo.” (Colosas 2:5; nengnengen met so Colosas 3:14.) Agaylan babaleg a sengegan na pangayaga tayo! Nanenengneng tayon mismo so peteg ya ebidensya na pantutunosan, maabig ya uksoy, tan inkaligen na pananisia ed dilin kongregasyon tayo, a mangidadalangirang ed inkalapagan a kipapasen na totoo na Dios ed sankadalinan. Kanian diad antikey a nakekeraan a panaon diad kaplesan a sistema, komon ta balang sakey ed sikatayo so determinadon “mantutunosan a mankakasakey diad aro.”

[Saray paimano ed leksab]

Kasin Naimano Yo?

◻ Anto so tinaon a teksto parad saray Tasi nen Jehova ed 1995?

◻ Akin a kaukolan a mantutunosan a mankakasakey iray Kristianon taga Colosas diad aro, tan akin ya ontan tayo met natan?

◻ Anton mapalikdon panmoria ed bilay so nagkalautlan bantayan na saray Kristiano natan?

◻ Akin a nepeg a magmaliw ya alerto iray Kristiano ya agnibalang na makapaayat iran argumento nipaakar ed bunigas tan paraan na panag-diagnose?

[Saray litrato ed pahina 17]

Kasin saray plano yo ed arapen so nisentro ed kiwawala nen Jesus?