Sarag Kan Gawaen nen Jehova a Makapanyari
“Sikato mangiter na pakayari ed makapuy; et saman so andian na pakapanyari sikato so parakelan to na biskeg.”—ISAIAS 40:29.
1, 2. Antoray pigaran paneknek ed inkadaakan na pakayari nen Jehova?
SI Jehova so sakey a Dios na “abalbaleg so pakayari to.” Nanengneng tayo so prueba na ‘say andi angaan a pakayari tan inkadivino’ na Dios diad makapakelkelaw a pisikal a palsa to. Saramay mangikakaindan a mamidbir ed ontan ya ebidensya na Inkamanamalsa to so agnabaraanan.—Salmo 147:5; Roma 1:19, 20.
2 Say pakayari nen Jehova so magmamaliw a lalon mapatnag legan na panusukimat a tuloy na saray sientista ed talba, tekep na saray agnabilang iran galaksi to a say kaarawi et onaabot ed nilasus minilyon a light-year (distansya a babaroyen na liwawa ed sakey taon). Diad ambilunget balet malinew a labi, ontangay ed katawenan tan nengnengen no agyo naliknay singa alikna na salmista: “No omamengen ko so saray tawen mo, kimey na saray gamegamet mo, say bulan tan saray bitewen, ya inganam; Anto ta so too a manonot ka ed sikato? Tan say anak na too, a sikato so dalawen mo?” (Salmo 8:3, 4) Tan agaylay panangasikaso nen Jehova ed too, ed sikatayo! Intaryaan to so inmunan laki tan bii na marakerakep a mangaraldalin ya ayaman. Anggan say dalin a mismo so walaay pakayari—a mamabaleg na tantanaman, mamapawala na masustansya, ag-adutakan a tagano. Saray totoo tan ayayep so mangaala na pisikal a pakayari manlapud sayan panangipatnag na pakayari na Dios.—Genesis 1:12; 4:12; 1 Samuel 28:22.
3. Nilikud ed aktual iran bengatla ed talba, anto ni so mangipapatnag ed pakayari Dios?
3 Niarum ed katuaan a say katawenan et makapasagyat tan saray tanaman tan ayayep so makaroyroyo, saratan so mangipapanengneng ed sikatayo na pakayari Dios. Insulat nen apostol Pablo: “Ta saray bengatla ya ag nanengneng a kien to, say andi angaan a pakayari to tan inkadivino to.” (Roma 1:20) Balet wala so sananey nin ebidensya na pakayari to a makanepegan na panangimano tan apresasyon tayo. ‘Anto itan kasi,’ nayarin manumameng kayo, ‘so mas ni nen say talba bilang panangipanengneng ed pakayari Dios?’ Say ebat et si Jesu-Kristo. Diad tua, diad silong na inkapuyanan et inkuan nen apostol Pablo a si Kristo ya inpasak so “pakayari Dios tan karonongan na Dios.” (1 Corinto 1:24) ‘Akin ya ontan?’ nayarin itepet yo, ‘Tan anto so pisiglaotan to ed bilay ko natan?’
Pakayarin Nipatnag ed Panamegley na Anak To
4. Panon a nipanengneng so pakayari Dios a misiglaotan ed Anak to?
4 Say pakayari na Dios so inmunan nidemostra sanen pinalsa to so bogbogtong-ya-Anak to, unong ed indengan to. Sayan espiritun Anak so nanlingkor ed si Jehova bilang sakey ya “uloen a komikimey” diad impangusar ed daakan a pakayari Dios ed impamalsa na amin niran arum a bengatla. (Uliran 8:22, 30) Insulat nen Pablo ed Kristianon agagi to ed Colosas: “Ta dia ed sikato apalesa so amin a bengatla, dia ed katawenan tan tapew na dalin, saray bengatla a nanengneng tan bengabengatla’n ag nanengneng . . . Amin a bengatla apalsa ed panamegley to tan nipaakar ed sikato.”—Colosas 1:15, 16.
5-7. (a) Diad apalabas, panon a nalalanor iray totoo ed panangipanengneng na pakayari Dios? (b) Antoray walan rason pian manisian say pakayari Dios so nipatnag ed kaso na Kristianos natan?
5 Kabiangan itayo na ‘apalesan bengabengatla ed tapew na dalin.’ Kanian kasin say pakayari na Dios so ninatnat ed sikatayon totoo? Bueno, diad panaon a pidedeneng na Dios ed ag-ayadyarin totoo, si Jehova diad pigaran panaon et angiter ed ariripen to na kaaruman a pakayari pian nasumpal daray gagala to. Kabat nen Moises a, diad inkalapagan et saray ag-ayadyarin totoo so manbilay ed loob na 70 odino 80 taon. (Salmo 90:10) Komusta met so nipaakar ed si Moises a mismo? Sikatoy nambilay anggad 120 taon, ingen ta “say mata to ag akulabaan, nisay abawasan so gendat a kasil to.” (Deuteronomio 34:7) Anggaman agkabaliksan na satan a pinadukey na Dios so bilay na balang aripen to odino pansiansiaen iratan a biskeg, papaneknekan na saya a sarag nen Jehova ya ikdan na pakayari so totoo.
6 Say sakey nin panangipanengneng ed abilidad na Dios a mangiter na pakayari ed lalaki tan bibii et say ginawa to ed asawa nen Abraham. “Si Sara met inawa’to so pakayari a mangilokon na sakey ya anak, sanen sikato so linmabas la ed taon, ta sinisia to a matoor so nangawa na sipan.” Odino kunsideraen pa no panon ya inikdan na Dios na pakayari iray ukom tan arum ed Israel: “Gedeon, Barac, Samson, Jefte; David, Samuel tan saray profetas, [ya] . . . akalara na biskeg ed kakapuyan da.”—Hebreos 11:11, 32-34.
7 Say ontan a pakayari so nayari met a niwala ed kipapasen tayo. Ah, nayarin agtayo ilaloan so pananak diad panamegley na milagro, nisay makapangipanengneng na biskeg a singa si Samson. Balet nayari itayon magmaliw a makapanyari, a singa ed sinaglawi nen Pablo ed kabanyakan a totoo diad Colosas. On, nansulat si Pablo ed lalaki, bibii, tan ananak, a singa naiimano tayo ed saray kongregasyon natan, tan inkuan ton sikaray “apabiskeg na amin a pakayari.”—Colosas 1:11.
8, 9. Nen inmunan siglo, panon a pinmatnag so pakayari nen Jehova no nipaakar ed totoon kapara tayo?
8 Legan na mangaraldalin a ministeryo nen Jesus, impalinew nen Jehova a say pakayari to so nipapakurang diad panamegley na Anak to. Alimbawa, sanen nantutugyop so karaklan ed si Jesus diad Capernaum, “Say pakapanyari nen Jehova so wadman pian sikatoy makapanggawa na panagpaabig, NW.”—Lucas 5:17.
9 Kayari inkioli to, pinaseguroan nen Jesus iray patumbok to a sikaray ‘mangawat na pakayari, no onsabi Espiritu Santo ed sikara.’ (Gawa 1:8) Agaylan tua iya! Irereport na sakey a manag-awaran iray agawa pigaran agew kayari Pentecostes diad 33 K.P.: “Et saray apostoles tinasian da ed baleg a pakayari so inkioli ed bilay na Katawan a Jesus.” (Gawa 4:33) Si Pablo a mismo so sakey a naikdan na pakayari parad kimey ya inganggan na Dios ed sikaton gawaen. Kayari inkakumberti to tan impawil na pakanengneng to, sikato so “lalo ya onbibiskeg, et ag to ra paebaten so saray Judio a manayam ed Damasco, ya inpatnag to a saya, salanti Jesus, sikato so Cristo.”—Gawa 9:22.
10. Panon ya akatulong so pakayari Dios ed kipapasen nen Pablo?
10 Maseguron kinaukolan nen Pablo so kaaruman a pakayari, sano kunsideraen tayo so espiritual tan mental a biskeg a nakakaukolan pian sumpalen so taloran misioneron impanbaroy to a mangokobre nilibon milya. Sinungdoan to met so amin a nengneng na kairapan, anagmak na inkipangaw tan nidunget ed ipapatey bilang martir. Panon ton agawaan iya? Inyebat to: “Say Katawan akisanawat ed siak, tan pinabiskeg to ak; pian dia ed panamegley ko, say panagpulong nagawa komon a maabig.”—2 Timoteo 4:6-8, 17; 2 Corinto 11:23-27.
11. No nipaakar ed pakayari Dios, anton ilalo so tinukoy nen Pablo parad kapara ton ariripen ed Colosas?
11 Kanian, agmakapakelaw sirin a si Pablo, sanen nansulat ed “agagi ed Cristo” diad Colosas, so amaseguro ed sikara a sikaray nayarin ‘napabiskeg na amin a pakayari, unong ed biskeg na gloria [nen Jehova], nipaakar ed amin ya anos tan andukey a panagtepel a tinekepan na gayaga.’ (Colosas 1:2, 11) Anggaman saratan a salita so manunan nipaarap ed alanaan a Kristianos, amin a manutumbok ed saray bakat nen Kristo so nagunggunaan a tuloy manlapud insulat nen Pablo.
Agawan Makapanyari Diad Colosas
12, 13. Antoray agaw-gawa ed benegan na sulat ed saray taga Colosas, tan anto so maseguron kiwas ed satan?
12 Say kongregasyon diad Colosas, a walad Romanon probinsya na Asia, so nayarin aporma diad panamegley na panagpulong na matoor a Kristianon manngaran na Epaphras. Ompapatnag a sanen nadngelan to so inkipangaw nen Pablo diad Roma ed ngalngali 58 K.P., denetermina nen Epaphras a bisitaen so apostol tan pasesegen tekep na maabig a report na panangaro tan seseg na agagi to ed Colosas. Maseguron si Epaphras so angisalaysay met na matoor a report nipaakar ed pigaran problema diad kongregasyon na Colosas a nankaukolan na panangorihe. Diad ontan et alikna nen Pablo so pansulat ed kongregasyon na panamaseseg tan simbawa. Sikayo met so nayarin makala na baleg a panamaseseg manlapud kapitulo 1 na satan a sulat, ta ipapatnag to no panon a si Jehova so nayarin manggawa ed ariripen ton makayari.
13 Naisip yo no panon so alikna na agagin lalaki tan bibii diad Colosas sanen dineskribe ira nen Pablo bilang “matoor ya agagi ed Cristo.” Makanepegan ira na komendasyon lapud ‘aro a wala ed amin day sasantos’ tan ‘mangiiter na bunga na maong a balita’ nanlapulad panaon a sikaray nagmaliw a Kristianos! Kasin sarayan mipadparan balikas so nibaga ed kongregasyon tayo, ed sikatayo bilang indibidual?—Colosas 1:2-8.
14. Anto so kaliktan nen Pablo nipaakar ed saray taga Colosas?
14 Apakiwas a tuloy si Pablo ed report ya inawat to a nibaga to ed saray taga Colosas a sikatoy agtinmundan angipikasi ed sikara tan kekerewen a sikaray ‘napano komon na kakabatan na linawa to ed amin a karonongan a maespiritu tan pakatalos, pian mankorang a makana ed Katawan [Jehova, NW].’ Impikasi to a sikaray “mamabunga ed ganagana’n maabig a gawa, tan onbaleg ed kakabatan na Dios; apabiskeg na amin a pakayari, unong ed biskeg na gloria to, nipaakar ed amin ya anos tan andukey a panagtepel a tinekepan na gayaga.”—Colosas 1:9-11.
Naikdan Met na Pakayari Natan
15. Panon tayon nipanengneng so mipadparan awawey a singa ed awawey ya insindag nen Pablo ed insulat to ed saray taga Colosas?
15 Agaylan maabig ya alimbawa so inletneg nen Pablo parad sikatayo! Kaukolan na agagi tayo ed interon dalin iray pikakasi tayo pian makapansungdo tan napansiansia ray gayaga ra anggaman ed saray kairapan da. Singa si Pablo, sikatayo so kaukolan ya ispisiko ed saray pikakasi tayo sano makaawat tayo na balita a saray agagi tayo ed arum a kongregasyon, odino sananey a dalin, so manasagmak na kairapan. Nayarin say asingger a kongregasyon so naapektoan na desyang lapud delap, yegyeg, bagyo, tan arum nira odino lapud kairapan ed espiritual. Odino anganko ta saray Kristiano so mansusungdo ed lugar a wala so sibil a bakal odino panpapateyan na tribu. Diad pikakasi tayo et nepeg a kerewen tayo ed Dios a natulongan iray agagi tayo “a manakar a makanakana parad Jehova,” a mantultuloy a manbunga na saray bunga ed Panarian legan a sikaray manusungdo, tan pian ondaak ed pikakabat. Diad onian paraan et naaawat na ariripen na Dios so pakayari na espiritu to, “a gagawaen a makayari tekep na amin a pakayari.” Makapanseguro kayon talinengen tan ebatan kayo na Ama yo.—1 Juan 5:14, 15, NW.
16, 17. (a) Singa insulat nen Pablo, anto so nepeg tayon pisalamatan? (b) Diad anton pantalos ya imbulos tan pinerdona na Dios so totoo to?
16 Insulat nen Pablo a saray taga Colosas so nepeg a magmaliw a ‘misasalamat ed Ama ra a nangawa ed sikara ya onkana’n minabang ed tawir na saray santos ed silew.’ Pisalamatan tayo met so mangatatawen ya Ama tayo lapud pasen tayo ed oksuyan to, balanglan mangatatawen odino mangaraldalin a pasen ed Panarian to. Panon a ginawa na Dios so ag-ayadyarin totoo a matukoy ed panmoria to? Insulat nen Pablo ed alanaan ya agagi to: “Sikato’y angilaban ed sikatayo ed biskeg na kabilungetan, tan angyalis ed sikatayo ed panaria’y Anak na aro to. A dia ed sikato so kawalaan na karundon tayo, say pamerdona ed saray kasalanan tayo.”—Colosas 1:12-14.
17 Antokaman so ilalo tayo, balanglan mangatatawen odino mangaraldalin, inagew-agew tayon pisasalamatan so Dios lapud kipapaliis tayo manlapud sayan mauges a sistema na kabilungetan, ya agawaan na pananisia tayo ed mablin probisyon a dondon bagat na pinablin Anak nen Jehova. (Mateo 20:28) Saray alanaan-ed-espiritun Kristiano so nagugunggunaan manlapud dondon a niyaplika ed sikara diad nikadkaduman paraan ta pian sikaray ‘iyalis ed panarian na Anak na aro na Dios.’ (Lucas 22:20, 29, 30) Balet say “arum a carnero” so nagugunggunaan met anggad natan manlapud dondon. (Juan 10:16) Naaawat da so panamerdona na Dios ta pian nawalaan na matunong a talindeg ed arap to bilang kakaaro to. Walaan ira na baleg a betang diad panangiyabawag na “saya’n evangelio na panarian” diad sayan panaon na anggaan. (Mateo 24:14) Niarum ed satan, walaan ira na makapakelaw ya ilalo ed pagmaliw a sigpot a matunong tan ayadyari ed pisikal, diad kasampotan na Milenyon Uley nen Kristo. Legan a babasaen yo so deskripsyon ed Apocalipsis 7:13-17, maseguron mipakna kayo a saya so sakey a paneknek ed kiliktar tan kabendisyonan.
18. Anton pipupulangan ya asaglawi ed Colosas so mantultuloy a susumpalen na Dios anggad natan?
18 Tutulongan itayo na sulat nen Pablo a namoria no kaunongan so otang a linawa tayo ed sankabalgan a toon nambilay ed kapiganman. Anto ta so susumpalen na Dios diad panamegley nen Kristo? “[Satan et pian] ipolang to so amin a bengatla ed sikato’n dili, bangta ginawa to so kareenan ed panamegley na dala ed cruz [panamairapan a palitek, NW] to; lapu ed sikato, kuan ko, angan saray bengatla ed tapew na dalin, odino saray bengatla dia ed saray katawenan.” Say gagala na Dios et say pangipawil ed amin a pinalsa diad sigpot a pitunosan ed sikato, a singa nen sakbay na impanrebeldi ed Eden. Say Sakey ya inusar pian palsaen so amin a bengatla et saman met lanlamang so uusaren natan pian nasumpal iyan pipupulangan.—Colosas 1:20.
Naikdan na Pakayari Parad Anton Gagala?
19, 20. Iner so pandedependian na pagmamaliw tayon masanto tan andi-mantsa?
19 Walaray responsabilidad parad sikatayoran akipulangan ed Dios. Sikatayo so aminsan a nagmaliw a makasalanan tan sian ed Dios. Balet natan, lapud manaagamil tayoy pananisia ed bagat nen Jesus tan say kanonotan tayo et andi la ed saray gawan marelmeng, nagkalalo’d amin et sikatayoy akatalindeg ed “santos tan angapo so pangidalman” a kipapasen, “agnabalaw ed arap to.” (Colosas 1:21, 22) Isipen pa, no panon ya ag-imbaing na Dios iramay matoor a tastasi to nen saman, agto itayo met ibabaing, a sikatoy tawagen bilang Dios tayo. (Hebreos 11:16) Natan, anggapo so makapangakusa ed sikatayo ya agtayo nepeg a mangakbibit ed maglorian ngaran to, nisay antakot tayon iyabawag itan a ngaran ed sankasampotan na dalin!
20 Ingen imanoen so pasakbay ya inlaktip nen Pablo diad Colosas 1:23: “No ontan a mansiansia kayo ed pananisia, malet tan magnayon, tan ag naekal ed ilalo na evangelio a nadngel yo a sikato so nipulong ed amin a pinalsa ed leksab na tawen.” Kanian baleg a tuloy so pandedepende ed pansiansia tayon matoor ed si Jehova, a tumboken iray bakat na pinablin Anak to. Baleg la so agawaan nen Jehova tan si Jesus parad sikatayo! Komon ta ipanengneng tayo so aro ed sikara diad panumbok ed simbawa nen Pablo.
21. Akin a walaan tayoy baleg a katunongan a manliket natan?
21 Saray Kristiano ed Colosas so maseguron aliketan ed impakadngel a ‘say evangelio a nadngel da so nipulong la ed amin a pinalsa ed leksab na tawen.’ Natan et nagkalalon makapagayaga so pakadngel ed laknab na kiyaabawagan na maong a balita na Panarian na masulok ya apatira tan kapalduan milyon a Tastasi ed masulok a 230 a daldalin. Agayla, kada taon et ngalngali 300,000 a manlalapud amin a nasyon so mipupulangan ed Dios!—Mateo 24:14; 28:19, 20.
22. Anggan sikatayoy makasagmak na kairapan, anto so nagawaan na Dios parad sikatayo?
22 Anggaman diad kaunoran et si Pablo so nipisok ed pangawan ed panaon na impansulat ed saray taga Colosas, sikato so agnandageyem ed agawa ed sikato ed antokaman a paraan. Imbes, inkuanto: “Natan magayaga ak ed saray pantetepel ko a nisengeg ed sikayo.” Kabat nen Pablo no anto iman so “amin ya anos tan andukey a panagtepel a tinekepan na gayaga.” (Colosas 1:11, 24) Balet amta ton agto agawaan iya ed dilin biskeg to. Sikatoy ginawan mabiskeg nen Jehova! Ontan met natan. Nilibon Tastasi a nipangaw tan pinasegsegang so ag-akabalang na gayaga ra ed panaglingkor ed si Jehova. Imbes, naapresya ra so inkamatua na saray salitay Dios a singa naromog ed Isaias 40:29-31: “Sikato so mangiter na pakayari ed makapuy; . . . Saray manalagar ed Jehova pasimbaloen to so biskeg da.”
23, 24. Anto so sagradon sekreto ya asaglawi ed Colosas 1:26?
23 Say ministeryo na maong a balita a nisentro ed kinen Kristo so makabaliksan a tuloy ed si Pablo. Labay to met a natalosan na arum so kablian na betang nen Kristo ed gagala na Dios, kanian deneskribe to itan bilang “say misterio [sagradon sekreto, NW] ya wala’n akaamot a nanlapu lad amin a taon tan saray kailalakan.” Anggaman ontan, satan so aglawas mansiansian sekreto. Inyarum nen Pablo: “Natan wala a pinmatnag ed saray sasantos to.” (Colosas 1:26) Sanen tinmerak so impanrebeldi diad Eden, angiter si Jehova na sipan parad magmaong iran bengatlan onsabi, ya ipapasakbay so ‘bini na bii a maneral ed ulo na uleg.’ (Genesis 3:15) Anto so kabaliksan na saya? Diad linmabas iran kailalakan, siglos, satan so nansiansian misteryo. Insan sinmabi Jesus, tan “intarok to so bilay tan say ag-ipapatey lapu ed inkipasen na evangelio.”—2 Timoteo 1:10.
24 On, say “sagradon sekreto” so nisesentro ed kinen Kristo tan say Mesianikon Panarian. Sinalambit nen Pablo ‘iray bengatla ed katawenan,’ a manutukoy ed saramay mibiang ed pananguley na Panarian a kaibay Kristo. Saraya so nausar diad pangitarok na agnibaga iran bendisyon ed amin ‘daray bengatla ed tapew na dalin,’ saramay mangayaga ed andi-anggaan a bilay dia ed dalin. Sirin, naimanom no kaunongan a matukutukoy parad si Pablo so panukoy ed “gloria na saya’n misterio [sagradon sekreto, NW].”—Colosas 1:20, 27.
25. Singa nipanengneng ed Colosas 1:29, anto so nepeg a magmaliw ya awawey tayo natan?
25 Sigugunaet a maniilalo si Pablo ed pasen to’d Panarian. Ingen amoria to a satan so aliwan bengatlan iilaoan ya anggapoy gawaen. “A dia ed saya mansagpot ak ni’n misosomalan unong ed gagawaen to, a sikato so ongagawa ed siak a sankamapanyarian.” (Colosas 1:29) Imanoen a ginawa nen Jehova si Pablo a makapanyari, diad panamegley nen Kristo, ta pian sumpalen so sakey a manangiliktar-bilay a ministeryo. Nagawaan met itan nen Jehova ed sikatayo natan. Balet nepeg tayon tepetan so inkasikatayo, ‘Kasin walaan ak na espiritu na panag-ebanghelyo a singa walad siak sanen inmunan naaralan koy katuaan?’ Anto so ebat yo? Anto so makatulong ed balang sakey ed sikatayo a mantultuloy a ‘mankimey ya impasya tan mangunaet ed inkasikatayo diad ikurang na pakayari nen Jehova’? Say ontumbok ya artikulo so maningbat ed sayan mismon pamaakaran.
Kasin Naimano Yo?
◻ Akin a naseguro tayon nipanengneng nen Jehova so pakayari to nisesengeg ed totoo?
◻ Antoray agaw-gawa ed beneg na saray salita nen Pablo diad kapitulo 1 na Colosas?
◻ Panon a susumpalen na Dios so pipupulangan a sinaglawi na Colosas 1:20?
◻ Diad panamegley na pakayari to, anto so nasumpal nen Jehova diad panamegley tayo?
[Mapa/Litrato ed pahina 8]
(Parad aktual a format, nengnengen so publikasyon)
COLOSAS