Panon Mon Napaaligwas Iray Pikakasim?
SAY pikakasi so nikadkaduma ed saray maaron probisyon nen Jehova a Dios. Nayarin kompiskaen na saray sumusumpa so Bibliam odino sebelan da kan milimog ed saray kapananisiaan, balet, anggapoy anggan sakey a makasamsam ed sika na panpikasi. Say pikakasi so makanan tuloy. Agaylan importanti, sirin, a pablien tan anamoten na balang sakey ed sikatayo iyan pribilihyo. Anto so makatulong ed sika pian napaaligwas moray pikakasim?
Say Biblia so aliwan libron-dasalan. Ingen, satan so nadeskribe bilang sankabalgan a libron-panaralan na katooan nipaakar ed pikakasi. Say Hebreon Kasulatan lambengat et mankarga na 150 a pikakasi. Arum so antirikey; arum so andurukey. Saratan so inbalikas ed publiko odino diad sarili, na arari odino saray kautibo, diad itatalona odino diad kairapan. Singa inkanta nen David ed Salmo 65:2, NW, “amin a laman” so onsasaral ed si Jehova, say “Dumerengel na pikakasi.” Akin a pinuyanan na Dios iray managsulat na Biblia ya ikurit so ontanlan kalaknab na koleksyon na saray pikakasi?
Pian naebatan itan a tepet, kunsideraen pay 2 Timoteo 3:16. Kuanto: “Amin a Sulat ya inpuyan na Dios sikato met so maabig a pakaaralan.” Kanian, wadtan iray pikakasi ed Biblia pian mangiwanwan ed sikatayo, a singa say Makasulatan a propesiya, saray prinsipyo, tan awaran. Panon itayon nagunggunaan na sarayan pikakasi?
Diad pangusisa ed Makasulatan iran pikakasi, nabidbir tayoray nibalikas ed saray situasyon a singa say walad sikatayo. Naaralan tayo no panon a nanduruma so gagala tan eksena na saray pikakasi. Sakey ni, nadiskobre tayo iray balon balikas na panangidayew tan pisasalamat tan naromog iray orihinal a salita parad saray kerew tan tagleey tayo. Diad antikey et makatulong iray Makasulatan a pikakasi pian napaaligwas tayoray dilin pikakasi tayo.
Si Maria, a nagmaliw ya ina nen Jesus, so sakey a toon mapatnag ya agunggunaan manlapud saray balikas ya inusar ed sakey a pikakasin nirekord ed Biblia. Binisita toy kanayon ton Elizabet kayarin sikaran duay nannginew na anak a laki diad madibinon tulong. Angigalang tan akisalamat si Maria ed Dios, tan arum ed saray salita to so makatantandan kapara na saramay walad sakey a pikakasi ed Hebreon Kasulatan. Ompatnag a kabisado nen Maria so pikakasin imbalikas nen Ana, say ina nen Samuel a propeta. Innginew met nen Ana so sakey ya anak a laki diad tulong na Dios, masulok a 1,000 taon lay linmabas. Nayari kasin naumameng nen Maria iyan pikakasi lapud mangisisindag itan ed dilin liknaan to?—1 Samuel 2:1-10; Lucas 1:46-55.
Komusta ka met? Natandaan mo ta so sakey a Makasulatan a pikakasin imbalikas ed silong na saray sirkumstansyan singa say walad sika? Say pananap, panbasa, tan pandalepdep ed saratan a pikakasi so ontulong ed sikan napaaligwas so dilin pitatalosan mo’d Dios. Diad ontumbok ya artikulo, imbitaan mi kan mangusisa ed taloran pikakasin nanlapud Masanton Kasulatan. Saratan so nibalikas ed silong na nanduruman sirkumstansya, a nayarin mipadpara ed sirkumstansyam.