Makanepegan so Pangusisa ed Saray Pikakasi ed Biblia
SAKEY a biin napapagaan, sakey ya ari, tan say dilin Anak na Dios so angibalikas ed saray pikakasin usisaen tayo natan. Kada pikakasi so apakiwas na nanduruman sirkumstansya. Ingen, saratan a situasyon so makaapekta ed sikatayo natan. Anto so naaralan tayo manlapud sarayan alimbawa?
“Nengnengen Mo so Kaermenan na Aripen Mo a Bii”
Kasin mipupuligesgesan ka ed abayag lan problema? Odino sika tay nabebelatan lapud kapagaan? No ontan wala ka’d kipapasen a mipadpara ed si Ana sakbay na impangiyanak to’d inmunan anak to, si Samuel. Sikatoy anggapoy anak tan niludlurey na sakey a bii. Diad tua, say kipapasen nen Ana so talagan makapaalipanes tan makapapaga ya agto labay so mangan. (1 Samuel 1:2-8, 15, 16) Akikasi ed si Jehova tekep na onggendan ya ey-ey to:
“O Jehova na saray ejercito, no tua a nengnengen mo so kaermenan na aripen mo a bii, tan nonoten moak, tan agmo lingoanan so aripen mo a bii, no ag ingen mangiter ka ed aripen mo a bii na sakey ya anak a laki, sirin sikato so iter ko ed Jehova ed saray amin ya agew na bilay to tan angapo so pangiskis ya onlabas ed olo to.”—1 Samuel 1:11.
Imanoen ya agnansalita si Ana nipaakar ed inkalapagan iran bengatla. Akikasi ed si Jehova tekep na ispisipikon kerew (parad sakey ya anak a laki) tan tinekepan iya na sakey a mapekder a desisyon (ya itarok to ed serbisyo’d Dios). Anto so ibabangat na saya ed sikatayo?
Sano naiirapan, ispisipikon saglawien iray problemam diad pikakasi. Antokaman so problemam—balanglan satan so kipapasen mo’d ayaman, inkabegtebegtew, odino maletey a bunigas—ipikasi itan ed si Jehova. Ideskrebi’d sikato no anton talagay problemam tan antoy naliliknam. “Kada labi imamatalek kon ami gonigon ko’d si Jehova,” kuan na sakey a balo a si Louise. “No maminsan et dakdakel iraya, balet ibibinsabinsak a maong so balang sakey.”
Makagungguna so pitatalosan ed si Jehova diad ispisipiko iran balikas. Say panggawa ed saya so ontutulong ed sikatayo pian natalosan so problema tayo, diad ontan et onapireng ya agla tanton ambelat. Palelemewen na saray ispisipikon pikakasi so kapagaan tayo. Sakbay ni na impakaebatan na pikakasi to, alikna nen Ana so panamaseguro, tan “say lupa to so aliwa lan maermen.” (1 Samuel 1:18) Nilikud ed satan, say pagmaliw a piho so manggawa’d sikatayon alerton makaimano’d ebat na pikakasi tayo. “No panon a direktay pangibalikas ko’d pikakasik,” kuan nen Bernhard, sakey a Kristiano ed Alemanya, “lalon malinew iray ebat.”
“Siak Lanbengat Ni Melag ya Ugaw”
Anggaman ontan, nayarin medyo mapaga so sakey no makaawat na sakey ya asainmin a diad padesir to et sikatoy agkualipikadon mangasikaso’d satan. Kasin no maminsan et liknaen mon baleg a tuloy so responsabilidad ya impabtang ed sika nen Jehova? Odino kasin ipapasen na arum a toon sikay agmatukoy ed asainmin mo? Ontan so nagmaliw a kipapasen nen kalangweran a Solomon sanen nilanaan bilang ari na Israel. Labay na pigaran prominentin lalaki a sananey so onyurong ed trono. (1 Arari 1:5-7, 41-46; 2:13-22) Nen agano nin manuuley, kinerew nen Solomon ed sakey a pikakasi:
“O Jehova a Dios ko, ginawam so aripen mo ya ari . . . et siak lanbengat ni melag ya ugaw; agko amta so ompaway odino onloob. . . . Itdan mo so aripen mo sirin na makatalos a puso a mangokom na baley mo, pian nibiig ko so maong tan mauges.”—1 Arari 3:7-9.
nsentro nen Solomon so pikakasi to ed siglaotan to’d si Jehova, ed pribilihyon nipabtang ed sikato, tan ed abilidad ton manumpal ed asainmin. Diad mipadparan paraan, kapiganman a naikdan tayo na responsabilidad a liknaen tayon labas ed abilidad tayo, manpikasi tayo’d Dios a manginlong ed sikatayo ta pian nagawaay kimey. Kunsideraen iray onggendan ya eksperiensia:
“Sanen kinerew a mangasikaso’d babaleg a responsabilidad ed sangan opisina na Watch Tower Society,” salaysay nen Eugene, “aliknak a sigpot ya andiay abilidad. Wala niray mas kualipikado tan mas eksperiensiado. Agak tanton akaugip ed ontumbok a duaran labi, ya inusar so dakel a panaon a nampikasi, ya angiter ed siak na biskeg tan nakakaukolan a panamaseguro.”
Si Roy so kinerew a mangiter na sakey a diskurso’d ponpon na sakey a bantog a tuloy a kaaron kalangweran kayari biglaan tan makapasinagem ya impatey. Maseguron dakel so onatendi. Anto so ginawa nen Roy? “Diad saman ak lambengat nampikasi na singa onman nipaakar ed biskeg tan abilidad a makaromog na susto iran salita, pian makapangibalikas na makapaalagey iran kanonotan, tan pian makaligliwa.”
Legan a ‘papepelesan [na Manamalsa]’ tan legan ya onlalaknab so organisasyon to, natural lambengat ya ondakel so ariripen ton napabtangan na responsabilidad. (Isaias 60:22) No akerew kan naikdan na baleg a betang, manilalon panoan nen Jehova so antokaman a kakulangay eksperiensia, panangipasal, odino abilidad ed biang mo. Asinggeray Dios diad paraan ya inyasingger nen Solomon, tan kinlongan To ka pian nagawaan moy asainmin mo.
“Pian Saksakey Ira”
Say komatlon kipapasen ya onlelesa natan et sano kerewen a mangilaman ed sakey a grupo diad pikakasi. Sano kinerew a manpikasi ed biang na arum, anto so nepeg tayon ipikasi? Kunsideraen so pikakasi nen Jesus a nirekord ed Juan kapitulo 17. Imbalikas to iyan pikakasi ed arap na saray babangatan to bilang too ed kaunoran a labi to. Anton nengneng na saray kerew so impasabi to ed mangatatawen ya Ama to?
Indanet nen Jesus so saksakey a kalat tan say nannanabangan ya ilalo na saramay presenti. Sinaglawi to so kigloria na ngaran nen Jehova a Dios tan panangipakabat ed Panarian. Indanet nen Jesus so kablian na personal a siglaotan ed Ama tan say Anak, based pikakabat ed Kasulatan. Sinalita to so nipaakar ed pagmaliw a sian manlapud mundo, a mangiparaan ed saray patumbok to ed isusumpa. Kinerew met nen Kristo ed Ama to a salimbengan iray babangatan tan pankasakeyen ira ed tuan panagdayew.
On, indanet nen Jesus iyan pankakasakey. (Juan 17:20, 21) Asasakbay ed saman a labi, wala so anggapo’d-panaon a pantataloan na saray babangatan. (Lucas 22:24-27) Anggaman ontan, diad panamegley na pikakasi et kinerew nen Jesus so pankakasakey aliwan say panangorihe. Ontan met, say pampamilya tan pankongregasyon iran pikakasi so nepeg a mangiyalibansa na aro tan gunaet a naresolbi iray gutgutan ed baetan na saray sinansakey. Saramay ilalaman so kaukolan a maniiba ed pankakasakey.—Salmo 133:1-3.
Nipapatnag iyan pankakasakey sano saramay ontatalineng so mangibagan, “Amen,” odino “Ontan pa komon,” ed sampot. Pian posibli iya, kaukolan a natalosan tan naabobonan da so amin ya imbaga. Kanian, agmatukoy a saglawien ed pikakasi so teman ag-amta na amin a wadman. Singa bilang, say sakey a matatken a mangilalaman ed kongregasyon ed pikakasi so nayarin onkerew na bendisyon nen Jehova parad sakey ya agi ed espiritual a maniinagem a tuloy. Balet gendagendat a sankaabigan a nagawaan to itan no dakel ed saramay ilalaman to et makakabat tan akabalita nipaakar ed beblay na satan a too.
Imanoen met ya agsinansansakey nen Jesus so personal iran pikakasi na balang membro na grupo. Diad panggawa ed ontan et lanoren toy panaglawi’d pigaran personal a bengatlan nayarin pigpigaray makaamta. Saray personal a kapagaan so matukoy a tema parad pribadon pikakasi, a nayarin naparukey tan unong ed personal a kakaliktanen.
Panon ya iparaan na sakey so inkasikato ta pian mangilaman na pikakasi ed baleg a pandaragup na saray managdayew? Onia so salaysay na sakey ya eksperiensiadon Kristiano: “Ikukunsiderak lan masakbay iray bengatlan nepeg a pisalamatan, antoray nayarin kerew na agagi, tan antoran ey-ey so nayarin saglawien ko ed biang da. Idadatak ko’d kanonotan koray ideya, katekep na saray balikas na dayew. Sakbay na panpikasi ed publiko, manpikasi ak ya andi-esel, ya onkerew na tulong pian nilaman iray agagi ed paraan a walaay dignidad.”
Antokaman iray sirkumstansyam, maseguron makaromog ka ed Biblia na pikakasin imbalikas na sakey a toon mipadpara’d kipapasen mo. Say kalaknab na saray pikakasin walad Kasulatan so ebidensya na maaron-panangasi na Dios. Say panbasa tan pandalepdep ed saratan a pikakasi so ontulong a napaaligwas moray pikakasim.
[Kahon ed pahina 5]
MAKATANTANDA IRAN PIKAKASI ED BIBLIA
Manpipikasi ariripen nen Jehova ed silong na dakerakel a sirkumstansya. Kasin paborabli kan onkiwas ed sakey odino dakel ni ed onggendan iran situasyon?
Kasin kaukolan moy panangiwanwan manlapud Dios, a singa ginawa nen Eliezer?—Genesis 24:12-14.
Sika ta so walad tambib na kapeligroan, a singa si Jacob?—Genesis 32:9-12.
Labay mo ta’n nagkalalon naamtaan so Dios, a singa ginawa nen Moises?—Exodo 33:12-17.
Kasin sikay nipapaarap ed saray kabusol, a singa si Elias?—1 Arari 18:36, 37.
Kasin say panagpulong so mairap parad sika, a singa ed si Jeremias?—Jeremias 20:7-12.
Kasin kaukolan mon ipatua iray kasalanan tan onkerew na panamerdona, a singa ginawa nen Daniel?—Daniel 9:3-19.
Kasin sika so nidudunget ed panamasegsegang, a singa agawa ed saray babangatan nen Jesus?—Gawa 4:24-31.
Nengnengen met so Mateo 6:9-13; Juan 17:1-26; Filipos 4:6, 7; Santiago 5:16.
[Kahon ed pahina 6]
NO ANTOY IPIKASI SANO MIPUPULIGESGESAN ED NIGALET YA UGALI
Kasin sikay mipupuligesgesan ed tubat-tubat a kakapuyan? Panon a makagungguna iray pikakasin nirekord ed Biblia? Manaral manlapud si David, a nampikasi ed nanduruman panaon nipaakar ed saray dilin kakapuyan to.
Inkanta nen David: “Sokayan moak, O Dios, et naamtaan mo so pusok; salsalien moak et naamtaan mo so nodnonot ko.” (Salmo 139:23) Pilalek nen David a sokayan nen Jehova a Dios iray agmanepeg a pilalek, emosyon, odino motibo to. Diad arum a salita, kinerew nen David so tulong nen Jehova diad pakapaliis ed kasalanan.
Balet saray kakapuyan nen David so akatalona’d sikato, tan sikatoy nankasalanan na abalbaleg. Dia lamet, tinmulong so panagpikasi ed sikato—diad saya et pian nipawil lamet so siglaotan to ed Dios. Unong ed Salmo 51:2, kinerew nen David: “Urasan moak a maong ed kasulitan ko, tan linisan moak ed kasalanan ko.”
Sikatayo met so mapaabeban makapanpikasi parad tulong nen Jehova ta pian naamper iray mauges ya inklinasyon. Saya so mamabiskeg ed sikatayo pian talonaan so nigalet a kakapuyan tan makatulong ed sikatayon napaliisay pankasalanan. No bilang ta ontubat, kaukolan tayoy onasingger ed si Jehova lamet tekep na saray kerew a tulongan to itayo pian makapantultuloy ed pipuligesgesan.
[Saray litrato ed pahina 7]
Nepeg ya idanet na saray imbalikas a pikakasi ed biang na sakey a grupo so Makasulatan ya ilalo tan espiritual a kalat na amin