Say Sankabalgan a Toon Nambilay ed Kapiganman

Kapitulo 116

Panangiparaan ed Saray Apostol ed Itataynan To

Asumpal la so memoryal a panangan, balet ta siansia nin walad tagey a kuarto si Jesus tan saray apostol to. Anggaman si Jesus so magano lan ontaynan, dakel ni labay ton ibaga. “Agyo aabuloyan a nagonigon iray puso yo,” so ligliwa to’d sikara. “Mangagamil na pananisia ed Dios.” Balet ta inyarum to: “Mangagamil met na pananisia ed siak.”

“Diad abung nen Amak et walay dakel a napanayaman,” intuloy nen Jesus. “Siak so onlan mangiparaan na pasen parad sikayo . . . pian no iner so kawalaan ko et diman kayo met. Tan no iner so laen ko et amta yo so dalan.” Ag-atebek na saray apostol a say sasalitaen nen Jesus et say isesegep to’d tawen, kanian intepet nen Tomas: “Katawan, agmi amta no iner so laen mo. Panon min naamtaan so dalan?”

“Siak so dalan tan say katuaan tan say bilay,” inyebat nen Jesus. On, dia lambengat ed pangawat ed sikato tan pangalig ed kurang na bilay to a makaloob so siopaman ed mangatatawen ya abung na Ama, ta singa imbaga nen Jesus: “Anggapo so makarateng ed Ama nilikud ed panamegley ko.”

“Katawan, ipanengneng mo ed sikami so Ama,” kerew nen Felipe, “tan susto la ’tan ed sikami.” Mapatnag a labay nen Felipe a mangiter si Jesus na pakanengnengan ed indengan na Dios, a singa agawa ed kadaanan a panaon ed saray pasingawey ed si Moses, Elias, tan Isaias. Balet, diad tua, saray apostol so walaan na bengatlan magmaong nen say saray pasingawey ed ontan a klase, unong ya ibabaga nen Jesus: “Agta siak so abayag lan kakaiba yo, tan ingen, Felipe, siak so agmo ni akabatan? Sikato ya akanengneng ed siak so akanengneng met ed Ama.”

Ayadyarin tuloy so impangiwandag nen Jesus ed personalidad na Ama to a say panbibilay a kaiba to tan pangiimano ed sikato so, diad tua et singa aktual a nanenengneng so Ama. Ingen, say Ama so atagtagey nen say Anak, unong a bibidbiren nen Jesus: “Saray bengatlan ibabagak ed sikayon lalaki et agko sasalitaen ed dilin sipor a paraan ko.” Matukotukoy ya iiter nen Jesus so amin a kredito ed mangatatawen ya Ama to parad bangabangat to.

Maseguron makapaseseg parad saray apostol a narengelay Jesus a mangibabaga ed sikara natan: “Sikato a mangaagamil na pananisia ed siak, saman met a sakey so manggawa na saray kimey a gagawaen ko; tan sikatoy manggawa na saray kimey a babaleg nen saraya”! Aglabay ya ibaga nen Jesus a saray patumbok to so mangagamil na babaleg a mamilagron pakayari nen say ginawa to. Andi, noagta say labay ton ibaga et itultuloy day ministeryo ed nagkalalon andukdukey a panaon, mas malalaknab a pasen, tan ed nagkalalon dakel a totoo.

Agkaindanan nen Jesus iray babangatan to kayari itataynan to. “Antokaman a kerewen yo ed ngaran ko,” isisipan to, “gawaen ko iya.” Nagkalalo ni, ibabaga to: “Kerewen ko ed Ama tan sikato so mangiter ed sikayo na sakey nin katulongan a nakaiba yo ed ando lan ando, say espiritu na katuaan.” Saginonor, kayari isegep to ed tawen, ikalbo nen Jesus ed saray babangatan to so masanton espiritu, sayan sananey a katulongan.

Say itataynan nen Jesus so asingger la, unong ya ibabaga to: “Daiset nin panaon tan say mundo so aglan balot makanengneng ed siak.” Si Jesus so magmaliw ya espiritun pinalsa ya agnanengneng na too. Balet lamet et insipan nen Jesus ed saray matoor ya apostol to: “Nanengneng yo ak, lapud manbilay ak a kaiba yo.” On, aglambengat onapireng si Jesus ed sikara ed pormay too kayari kioli to noagta diad nigetar a panaon et paolien tora ed tawen bilang espiritu iran pinalsa a kaiba to.

Imbaga natan nen Jesus so simplin totontonen: “Sikato a walaan na saray ganggan ko tan ononor ed saratan, inaro ak na saman a sakey. Insan sikato a mangaaro ed siak et aroen nen Amak, tan siak so mangaro ed sikato tan mabitabitar kon ipanengneng so inkasiak ed sikato.”

Diad saya et sinmalet si apostol Judas, samay tatawagen a Tadeo: “Katawan, anto so agawa a getmam ya ipanengneng mon mabitabitar so inkasika ed sikami tan andi ed mundo?”

“No siopaman et inaro to ak,” ebat nen Jesus, “onoren to so salitak, tan sikatoy aroen nen Amak . . . Sikato ya agto ak inaro so agmangonor ed saray salitak.” Aliwan singa saray matulok a patumbok to, ibabaliwala na mundo so bangabangat nen Kristo. Kanian agto ipaparungtal so inkasikato ed sikara.

Legan na mangaraldalin a ministeryo to, binangatan nen Jesus iray apostol to na dakel a bengatla. Panon dan nanonotan iratan ya amin, nagkalautla lapud, anggad sayan bekta et dakel ni agda natebek? Makapaliket, isisipan nen Jesus: “Say katulongan, say masanton espiritu, ya ibaki na Ama ed ngaran ko, saman a sakey so mangibangat ed sikayo na amin a bengabengatla tan mangipanonot ed sikayo iray amin a bengatlan imbagak ed sikayo.”

Lamet, diad panliligliwa ed sikara, kuan nen Jesus: “Ititilakan takayoy kareenan, iiter ko ed sikayo so kareenan ko. . . . Agyo aabuloyan iray puso yon nagonigon.” Tua, ontaynan lay Jesus, balet ta isasalaysay to: “No inaro yo ak, manliket kayo a siak so paarap la ed kinen Amak, lapud say Ama so mas matalona nen say siak.”

Antikey lay nakekeraan a panaon nen Jesus. “Siak so agla mansalita na dakel ed sikayo,” kuanto, “ta say manuley na mundo so onsasabi. Tan sikato so anggapoy pakayari ed siak.” Si Satanas a Diablo, samay akaloob ed si Judas tan amanlong ed sikato, so manuley ed mundo. Balet ta anggapoy makasalanan a kakapuyan a walad si Jesus a naanamot nen Satanas pian sikatoy isuawi manlapud panaglingkor ed Dios.

Panggayaga ed Maapit a Siglaotan

Kayari na memoryal a panangan, si Jesus so mamapaseseg ed saray apostol to tekep na impormal a puso-ed-puson tongtongan. Nayarin lampas lay pegley-labi. Kanian impaseseg nen Jesus: “Alagey kayo, ontaynan tayo’d dia.” Anggaman ontan, sakbay na itaynan da, si Jesus, lapud apakiwas na aro to ed sikara, so nantultuloy a nansalita, ya angitarok na manamakiwas ya ilustrasyon.

“Siak so peteg a sengeg na ubas, tan say Amak so managbayubo,” inggapo to. Say Baleg a Managbayubo, si Jehova a Dios, so nantanem na sayan simbolikon ubas sanen nilanaan to si Jesus na masanton espiritu diad bautismo to nen loglog na 29 K.P. Balet intuloy nen Jesus ya ipapanengneng a say simbolikon ubas so mangisisimboloy nagkalalo ni nen say sikato lambengat, ya ibabaga: “Kada sanga ed siak ya agmanbubunga et eekalen to, tan kada sakey a manbubunga et papalinan to, pian manbunga ni dakel. . . . Unong a say sanga so agmakapanbunga ed inkasikato nilikud no satan so mansiansia ed sengeg na ubas, diad parehon dalan nisay sikayo met, nilikud no mansiansia kayon mikasakey ed siak. Siak so sengeg na ubas, sikayoray sanga.”

Diad Pentecostes, 51 agew ed saginonor, saray apostol tan arum so nagmaliw a sangasangay sengeg na ubas sanen inkalbo ed sikara so masanton espiritu. Diad kaunoran, 144,000 a totoo so magmaliw a sangasanga na piguratibon sengeg na ubas. Kaibay simit na ubas, si Jesu-Kristo, saraya so manugyop na simbolikon ubas a mamapawala na bungabunga na Panariay Dios.

Ipapaliwawa nen Jesus so tombok ed panamawala na bunga: “Sikato a mansiasiansia ed pikakasakey ed siak, tan siak so mikakasakey ed sikayo, sayan sakey so manbunga na dakel; lapud sian ed siak anggapon balot so nagawaan yo.” Anggaman ontan, no say sakey so agmanbunga, kuan nen Jesus, “sikato so ibantak ed paway bilang sanga tan namagaan; tan tiponen na totoo iratan a sanga tan sikaray ibuntok ed apuy tan sikaray napoolan.” Diad biek a dapag, isisipan nen Jesus: “No sikayo so mansiansia ed pikakasakey ed siak tan saray balikas ko so mansiansia ed sikayo, kerew kayo na antokaman a pirawrawat yo tan satan so nagawa parad sikayo.”

Niarum ni, inkuan nen Jesus ed saray apostol to: “Say Amak so niglogloria ed saya, a sikayo so mantultuloy a manbunga tan paneknekan yoy inkasikayon babangatan ko.” Say bungan labay na Dios manlapud sangasanga et say panangipanengneng da na singa-Kriston kualidades, nagkalautla ed aro. Nagkalalo ni, bangta si Jesus so manangiyabawag na Panariay Dios, say pipilaleken a bunga so mangilalaktip met ed aktibidad dan panggawa na saray babangatan a singa ginawa to.

“Mansiansia ed arok,” impaseseg natan nen Jesus. Ingen, panon a nagawaan itan na saray apostol to? “No onoren yo iray ganggan ko,” kuanto, “sikayo so mansiansia ed arok.” Diad pangitutuloy, isasalaysay nen Jesus. “Saya so ganggan ko, a sikayo so manaaroan ed sakey tan sakey unong na impangarok ed sikayo. Anggapoy siopaman a walaan na babaleg ya aro nen say saya, a say siopaman so mangisuko na kamarerwa to ed biang na kakaaro to.”

Diad pigara labat lan oras, ipanengneng nen Jesus iyan matalonan aro diad pangiter na bilay to ed biang na saray apostol to, ontan met ed arum a mangagamil na pananisia ed sikato. Say alimbawa to so nepeg a mamakiwas ed saray patumbok to a nawalaan na parehon dilin-panagsakrisyon aro parad sakey tan sakey. Sayan aro so pakabidbiran ed sikara, a singa sinalita nen Jesus ed asasakbay: “Diad saya et nakabatan na amin a sikayo iray babangatan ko, no walaan kayo na aro ed sakey tan sakey.”

Diad pangipapabidbir ed kakaaro to, inkuan nen Jesus: “Sikayo’ra so kakaarok no gawaen yo so igaganggan ko ed sikayo. Agtakayo la tatawagen ya ariripen, lapud ag-amta na aripen so amta na katawan to. Balet ta sikayo lay tinawag kon kakaaro, lapud amin ya arengel ko manlapud Amak et impaamtak ed sikayo.”

Agaylan mablin siglaotan so pagmaliw a maapit a kakaaro nen Jesus! Balet pian makapantultuloy a makapanggayaga ed sayan siglaotan, saray patumbok to so nepeg a “mantultuloy a manbunga.” No satan so gawaen da, kuan nen Jesus, “antokaman a kerewen yo ed ngaran ko iter to itan ed sikayo.” Maseguro, engranden tumang itan parad pamapawalay bunga na Panarian! Kayari pamapaseseg lamet ed saray apostol a “manaaroan ed sakey tan sakey,” imbaga nen Jesus a sikaray gulaen na mundo. Ingen, aabageyen tora: “No gugulaen kayo na mundo, amta yo a ginula to ak sakbay a ginula to kayo.” Tinmumbok et imparungtal nen Jesus no akin a gulaen na mundo iray patumbok to, a kuanto: “Lapud sikayo so agkabiangan na mundo, balet ta sikayoy pinilik manlapud mundo, nisesengeg ed saya et gulaen kayo na mundo.”

Diad nagkalalo nin pangipapaliwawa’d rason ed panggula na mundo, intuloy nen Jesus: “Gawaen da irayan amin a bengatla sumpad sikayo nisesengeg ed ngaran ko, lapud agda kabat iman [si Jehova a Dios] so angibaki ed siak.” Saray mamilagron kimey nen Jesus so, diad tua et manguukom ed saramay manggula ed sikato, unong a kuanto: “No agyo ginawa ed limog da iray kimey ya anggapo ni nanggawa, anggapo komon so kasalanan da; balet ta natan et sikaray namparan akanengneng tan nanggula ed siak ontan met ed kinen Amak.” Kanian, unong a kuan nen Jesus, say kasulatan so asumpal: “Ginula ra ak ya anggapoy sengegan.”

Unong a ginawa to ed asasakbay, aabageyen lamet nen Jesus ira diad pangisisipan a mangibaki na katulongan, say masanton espiritu, a makapanyarin aktibon puersa na Dios. “Saman a sakey so mantasi nipaakar ed siak; tan sikayo, diad satan, so kaukolan a mantasi.”

Malaglaem a Simbawa ed Itataynan

Si Jesus tan saray apostol so akaparaan lan ontaynan ed tagey a kuarto. “Sinalitak ed sikayo irayan bengatla pian sikayo so agnagapol,” intuloy to. Insan inter to so seryoson pasakbay: “Pataynanen kayo na totoo manlapud sinagoga. Diad tua, onsasabi oras sano kada sakey a mamatey ed sikayo so manisip ya akapangiyapay na sagradon serbisyo ed Dios.”

Mapatnag a saray apostol so agonigon a tuloy ed sayan pasakbay. Anggaman imbaga nen Jesus ed asasakbay a sikaray gulaen na mundo, agto direktan tuloy ya imparungtal a sikaray napapatey. “Agko [iya] imbaga ed sikayo diad unaan,” kuan nen Jesus, “lapud siak so kaiba yo.” Ingen, agaylan maabig iman a sikaray pasantabian tekep na sayan impormasyon sakbay na itaynan to!

“Balet natan,” intuloy nen Jesus, “siak so oonla ed sikato ya angibaki ed siak, balet ta anggapo ni ed sikayo so nantepet ed siak, ‘Iner so laen mo?’” Asasakbay ed labi, sikaray tinmepet nipaakar ed no iner so laen to, balet natan et sikara so atalagnaw a tuloy ed imbaga to ed sikara a sikaray sinmaew a mantepet na nagkalalo ni nipaakar ed saya. Unong a kuan nen Jesus: “Lapud sinalitak irayan bengatla ed sikayo et apano’y ermen so kapusoan yo.” Paneermenan na saray apostol aglambengat lapud naamtaan dan sikaray makasagmak na mapalalon panamasegsegang tan napapatey noagta lapud sikaray taynan na Katawan da.

Kanian impaliwawa nen Jesus: “Parad kagunggunaan yo a siak so ontataynan. Ta no siak so ag-ontaynan, say katulongan so agbalot onla ed sikayo; balet no siak so ontaynan, sikatoy ibakik ed sikayo.” Bilang too, si Jesus so makaonla’d sansakey a pasen lambengat, balet sano wala la’d tawen, sikatoy makapangibaki ed katulongan, say masanton espiritu na Dios, ed saray patumbok to inerman so kawalaan da ed dalin. Kanian say itataynan nen Jesus so makagungguna.

Say masanton espiritu, kuan nen Jesus, “so mangiter na makakumbinsin ebidensya nipaakar ed kasalanan tan nipaakar ed inkatunong tan nipaakar ed panangukom.” Say kasalanan na mundo, say insaew ton mangagamil na pananisia ed Anak na Dios, so niwalwal. Niarum ni, say makakumbinsin ebidensya na inkatunong nen Jesus so nidemostra diad isegep to ed Ama. Tan say isaew nen Satanas tan say marelmeng a mundo to a mamuyak ed integridad nen Jesus so mamaneknek a say manuley na mundo so mauges a naukom.

“Dakel ni labay kon ibaga ed sikayo,” intuloy nen Jesus, “balet ta agyo ni nayarian a taroken diad kaplesan.” Kanian isisipan nen Jesus a sano nikalbo to so masanton espiritu, say aktibon puersa na Dios, satan so mangiwanwan ed sikara’d pakatalos ed sarayan bengatla a mitunosan ed abilidad dan mantalos ed saratan.

Saray apostol so nagkalautlan sinmaew a makatalos a si Jesus so ompatey tan insan onapireng ed sikara kayarin napaoli. Kanian nantetepetan ira: “Anto so kabaliksan na saya ya ibabaga to ed sikatayo, ‘Daiset nin panaon et agyo ak la nanengneng, tan, lamet, daiset nin panaon et nanengneng yo ak,’ tan, ‘lapud siak so onla ed Ama’?”

Amoria nen Jesus a labay day mantepet ed sikato, kanian impaliwawa to: “Tua kuan ko ed sikayo, Mandageyem tan manugaog kayo, balet ta manliket so mundo; manermen kayo, balet ta say ermen yo so magmaliw a gayaga.” Saginonor ed saman ya agew, ed ngarem, sanen pinatey si Jesus, saray minumundon relihyoson pangulo so nanliliket, balet saray babangatan so nanermen. Anggaman ontan, say ermen da so asalatan na gayaga, sanen apaoli Jesus! Tan nantultuloy so gayaga ra sanen inikdan tora na pakayari diad Pentecostes pian magmaliw a tastasi to diad impangikalbo ed sikara na masanton espiritu na Dios!

Diad pangikukumpara na kipapasen na saray apostol ed bii legan na panpapasakit to lapud lukon to, inkuan nen Jesus: “Sakey a bii, sano sikatoy manaanak, so walaan na ermen, lapud say oras to so asabi la.” Balet ibabaga nen Jesus ya agto la nanonotan so panpasakit to bektan niyanak toy anak to, tan papasesegen nen Jesus iray apostol to, ya ibabaga: “Ontan yo met natan, sirin, so peteg a maermen; balet ta nanengneng takayo lamet [sano siak so apaoli] tan manliket so kapusoan tayo, tan anggapoy siopaman a mangekal ed gayaga yo.”

Anggad sayan bekta, saray apostol so agnin balot kinmerew ed ngaran nen Jesus. Balet inkuanto natan: “No onkerew kayo na antokaman ed Ama, iter to itan ed sikayo diad ngaran ko. . . . Ta say Ama a mismo so walaan na aro ed sikayo, lapud awalaan kayo na aro ed siak tan anisia a siak so pinmaway bilang manangilaman na Ama. Niarum ni, tataynanan ko so mundo tan oonla ak ed Ama.”

Saray salita nen Jesus so baleg a panamaseseg ed saray apostol. “Diad saya et manisia kami a sika so pinmaway manlapud Dios,” kuanda. “Manisia kayo ta ed kaplesan?” tepet nen Jesus. “Nia! peteg ya onsasabi oras, tan asabi la, sano sikayo so nataytayak kada sakey ed dilin abung to tan taynanan yo ak a bokor.” Ompatnag a singa agnapanisiaan, saya so agawa sakbay a nasumpal so labi!

“Imbagak irayan bengatla ed sikayo pian diad panamegley ko et nawalaan kayo na kareenan.” Sinampotan nen Jesus: “Diad mundo et walaan kayo na irap, balet manpakpel! Tinalok so mundo.” Tinalo nen Jesus so mundo diad sitotoor ya impanumpal ed linaway Dios anggaman ed amin a bengatlan sinalin gawaen nen Satanas tan say mundo to pian buyakey katooran nen Jesus.

Pansaran Pikakasi ed Tagey a Kuarto

Apakiwas na aralem ya aro parad saray apostol to, ipaparaan ira nen Jesus parad manasingger ya itataynan to. Natan, kayari malaglaem ya impanimbawa tan impangabagey ed sikara, sikatoy tinmangwa ed tawen tan akikasi ed Ama to: “Igloriam so anak mo, pian nigloria ka na anak mo, unong a sikatoy inikdan mo na autoridad ed amin a laman, pian, nipaakar ed interon bilang ya inter mo ed sikato, ikdan to na andi-anggaan a bilay.”

Agaylan makapasagyat a tema so imparungtal nen Jesus​—andi-anggaan a bilay! Diad impakawalaan na “autoridad ed amin a laman,” si Jesus so makapangitarok na saray gungguna na dondon bagat to ed amin ya ompapatey a katooan. Ingen, sikatoy mangiiter na “andi-anggaan a bilay” ed saraman lambengat so aabobonan nen Ama to. Diad pangitutuloy ed sayan teman bilay ya andi-anggaan, intuloy nen Jesus so pikakasi to:

“Saya so mankabaliksan na andi-anggaan a bilay, say pangala ra na pikakabat ed sika, say alenleneg a tuan Dios, tan ed saman so imbakim, si Jesu-Kristo.” On, say kilalaban so mandependi ed panangala tayoy pikakabat ed Dios tan ed Anak to. Balet nagkalalo ni so nakakaukolan nen say basta inyulon pikakabat.

Say sakey so nepeg a sigpot a makakabat ed sikara, a babayuboan so walaay pikakabat a pikakaaro ed sikara. Nepeg a nalikna na sakey so singa nalilikna ra nipaakar ed saray pamaakaran tan nengnengen iray bengatla unong ed pakanengneng da. Tan manuna’d amin, nepeg a panggunaetan na sakey so pangalig ed anggapoy-kapara iran kualidad da ed pidedeneng ed arum.

Insublay ya impikasi nen Jesus: “Ingloria ta ka dia ed dalin, ya asumpal so kimey ya inter mo ed siak a gawaen.” Diad impakasumpal ed inpabtang ed sikato anggad sayan bekta tan diad panmamatalek ed arapen ya itatalona to, kerew to: “Ama, igloria mo ak ed abay mo mismo tekep na glorian walad siak sakbay na mundo.” On, kekerewen to natan a sikatoy nipawil ed datin mangatatawen a gloria to diad panamegley na kioli.

Diad pangibibinsabinsa ed saray manunan kimey to diad dalin, ibabaga nen Jesus: “Imparungtal ko so ngaran mo ed totoon inter mo ed siak manlapud mundo. Sikara so kien mo, tan inter mo ed siak, tan inonor da so salitam.” Inusar nen Jesus so ngaran na Dios, a Jehova, ed ministeryo to tan indemostra so suston balikas na satan, balet ta sikatoy nanggawa na nagkalalo ni nen say satan pian iparungtal so ngaran na Dios ed saray apostol to. Pinalaknab to met so pikakabat tan apresasyon da ed si Jehova, ed personalidad to, tan ed saray gagala to.

Diad pamagalang ed si Jehova bilang Ulo to, say Sakey a panlilingkoran to, mapaabeban binidbir nen Jesus: “Saray salita ya inter mo ed siak so inter ko ed sikara, tan inawat da ira tan petepeteg ya akabatan a siak so pinmaway bilang manangilaman mo, tan anisia ran imbaki mo ak.”

Diad panggagawa na pandumaan ed baetan na saray patumbok to tan ed arum ed katooan, insublay ya impikasi nen Jesus: “Manggawa ak na kerew, agnipaakar ed mundo, noagta nipaakar ed saraman so inter mo ed siak . . . Sanen siak so kaiba ra et sipor-sipor ko’ran babantayan . . . , tan inasikasok ira, tan anggapoy sakey ed sikara so atawtaw nilikud ed anak na kadederal,” salanti, si Judas Iscariote. Diad sayan mismon bekta, si Judas so paarap ed makarimdimlan misyon to pian itapat si Jesus. Kanian, agsikakabat si Judas a manusumpal ed Kasulatan.

“Ginula ira na mundo,” intuloy nen Jesus ya ipikasi. “Kerew ko ed sika, aliwan say pangekal ed sikara manlapud mundo, noagta sikaray bantayan nisesengeg ed marelmeng a sakey. Sikaray agkabiangan na mundo, unong a siak so agkabiangan na mundo.” Saray patumbok nen Jesus so walad mundo, sayan organisadon sosyedad na katooan ya uuleyan nen Satanas, balet ta sikara so biig ed mundo tan kaukolan a mansiansian biig manlapud satan tan ed kaugsan to.

“Pasantosen mo’ra diad panamegley na katuaan,” intuloy nen Jesus, “say salitam so katuaan.” Dia et tatawagen nen Jesus so apuyanan a Hebreon Kasulatan, a nantultuloy ton pangaonan, a “say katuaan.” Balet say inbangat to ed saray babangatan to tan say insulat da ed saginonor diad panangipuyan bilang say Kristianon Griegon Kasulatan so ontan met a “say katuaan.” Sayan katuaan so mamasanto ed too, sigpot a makapanguman na bilay to, tan manggawa ed sikaton sakey a toon biig manlapud mundo.

Si Jesus natan so manpipikasi “aliwan nipaakar ed saraya lambengat, noagta ontan met ed saraman so mangileletneg na pananisia ed [sikato] diad salita ra.” Kanian manpipikasi si Jesus parad saramay magmaliw ya alanaan iran patumbok to tan arum niran arapen a babangatan a natipon ni ed “sakey a pulok.” Anto so kekerewen to parad amin na saraya?

“Pian sikaray magmaliw a sakey, unong a sika, Ama, so walad pikakasakey ed siak tan siak et walad pikakasakey ed sika, . . . pian sikaray magmaliw a sakey unong a sikata so saksakey.” Si Jesus tan say Ama to so aliwan literal a saksakey a persona, balet ta sikaray walaay pankakasakey ed amin a bengabengatla. Ipipikasi nen Jesus a saray patumbok to so manggayaga ed sayan parehon pankakasakey pian “say mundo so nawalaan na pikakabat ya imbaki mo ak tan inarom ira unong ya inaro mo ak.”

Diad biang na saramay magmaliw ya alanaan iran patumbok to, si Jesus natan so manggagawa na sakey a kerew ed mangatatawen ya Ama to. Parad anto? “Pian, no iner so kawalaan ko, sikara met so nakaibak, pian nanengneng da so gloriak a inter mo ed siak, lapud inaro mo ak sakbay na inkiletneg na mundo,” salanti, sakbay a di Adan tan Eva so akapan-anak. Abayag la sakbay na satan, inaro na Dios so bugbugtong ya Anak to, a nagmaliw a Jesu-Kristo.

Diad panasampot ed pikakasi to, indanet lamet nen Jesus: “Impaamtak so ngaran mo ed sikara tan ipaamtak ni, pian say aro ya impangarom ed siak so niwalad sikara tan siak so walad pikakasakey ed sikara.” Parad saray apostol, say pangamta ed ngaran na Dios so mangilalanor na personal a pikakabat ed aro na Dios. Juan 14:1–17:26; 13:27, 35, 36; Lucas 22:3, 4; Exodo 24:10; 1 Arari 19:9-13; Isaias 6:1-5; Galacia 6:16; Salmo 35:19; 69:4; Uliran 8:22, 30.—NW.

▪ Iner so laen nen Jesus, tan anton ebat so naawat nen Tomas nipaakar ed say dalan diman?

▪ Diad kerew to, antoy mapatnag a labay nen Felipe ya itarok nen Jesus?

▪ Akin a say sakey ya akanengneng ed si Jesus so akanengneng met ed Ama?

▪ Panon a saray patumbok nen Jesus so manggawa na babaleg iran kimey nen say ginawa to?

▪ Diad anton pantalos ya anggapoy pakayari nen Satanas ed si Jesus?

▪ Kapigan ya intanem nen Jehova so simbolikon sengeg na ubas, tan kapigan tan panon a magmaliw a kabiangan na ubas iray arum?

▪ Diad kaunoran, pigaran sangasanga so niwala ed simbolikon sengeg na ubas?

▪ Anton bunga so labay na Dios manlapud sanganga?

▪ Panon itayon magmaliw a kakaaro nen Jesus?

▪ Anton pasakbay nen Jesus so angonigon ed saray apostol to?

▪ Akin a sinmaew iray apostol a mantepet ed si Jesus nipaakar ed no iner so laen to?

▪ Anto so nagkalautlan sinaewan na saray apostol a talosan?

▪ Panon ya inyilustra nen Jesus a say kipapasen na saray apostol so nauman manlapud ermen a magmaliw a gayaga?

▪ Anto so imbaga nen Jesus ya asingger lan gawaen na saray apostol?

▪ Panon a tinalo nen Jesus so mundo?

▪ Diad anton pantalos ya inikdan si Jesus na “autoridad ed amin a laman”?

▪ Antoy kabaliksan na pangalay pikakabat ed Dios tan say Anak to?

▪ Diad antoran paraan ya imparungtal nen Jesus so ngaran na Dios?

▪ Anto so “say katuaan,” tan panon itan a ‘mamapasanto’ ed sakey a Kristiano?

▪ Panon a say Dios, say Anak to, tan amin a tuan managdayew so saksakey?

▪ Kapigan so “inkiletneg na mundo”?