Say Sankabalgan a Toon Nambilay ed Kapiganman

Kapitulo 117

Masyadon Kairapan ed Harden

Sanen asumpal nen Jesus so panpipikasi, sikato tan saray 11 a matoor ya apostol to so anganta na panangidayew ed si Jehova. Insan linmeksab ira manlapud kuarto’d tagey, pinmaway ed ambetel a kabilungetan na labi, tan amawil pabeltang ed Lawak na Kidron paarap ed Betania. Balet diad dalan, sikaray tinmunda ed paboriton pasen, say harden na Getsemani. Saya so walad Palandey na saray Olibo odino diad liber to. Mabetbet dian akibanaan si Jesus ed saray apostol to diad utel na saray kiew na olibo.

Ititilak so walora ed saray apostol​—anganko asingger ed looban na harden—​inbilin to’d sikara: “Yurong kayo’d dia legan ya onla ak ed babanda’d ’man tan manpikasi.” Insan to intagar so talora​—si Pedro, Santiago, tan si Juan—​tan tinmuloy ni ed harden. Si Jesus so naermenan tan agonigon a tuloy. “Say kamarerwak so maermen a tuloy, anggan diad ipapatey,” inkuan to’d sikara. “Dia kayo tan mansiansian manbantay a kaibak.”

Diad iyaabante na daiset, si Jesus so tinmalimukor tan ginmapon masimoon a manpikasi: “Amak, no nayari, onlabas komon iyan kopa manlapud siak. Ingen, aliwan unong ed linawak, noagta unong ed linawam.” Antoy labay ton ibaga? Akin a sikatoy “maermen a tuloy, anggan diad ipapatey”? Kasin sikatoy onsesener manlapud desisyon ton ompatey tan mangitarok na dondon?

Andin balot! Si Jesus so ag-onaapila a niliktar manlapud ipapatey. Anggan say kanonotan ya arawiay masakripisyon ipapatey, ya aminsan ya insuheri nen Pedro, so kainglit to. Imbes, sikatoy walad gonigon lapud tatakotan to a say paraan na asingger lan ipatey to​—bilang karimdimlan kriminal—​so mangitarok na balaw ed ngaran na Ama to. Nalilikas to natan a diad la’d pigaran oras et sikatoy ipasak ed palitek bilang say sankaugsan a too​—sakey a manangayew sumpad Dios! Saya so mangogonigon ed sikaton tuloy.

Kayari andukey ya impanpikasi, amawil si Jesus tan nalmoan so taloran nanaugip. Diad panutukoy ed si Pedro, inkuanto: “Agnayari ta a sikayon lalaki so malaglaem a makapanbantay a kaibak? Mansiansian akabantay tan mantultuloy a manpikasi, pian sikayo so agmakaloob ed tukso.” Anggaman ontan, diad pakakatalos ed inkabanalan da tan say inka-atrasado lay oras, inkuanto: “Say espiritu, siempre, so mabulos, balet say laman so makapuy.”

Insan linma si Jesus diad komaduan pankanawnawa tan kinerew ed Dios ya ekalen manlapud sikato so “sayan kopa,” salanti, say inpabtang nen Jehova a [parti], odino linawa, parad sikato. Sanen sikatoy amawil, asabian to lamet so talora a nanaugip sanen sikaray nepeg komon a manpipikasi a sikaray agmakaloob ed tukso. Sanen nansalita si Jesus ed sikara, agda amtay iyebat da.

Kaunoran, diad komatlon pankanawnawa, tinmaynan si Jesus, nayarin asingger labat, tan diad itatalimukor, tekep na maksil a pikekerew tan saray lua, impikasi to: “Ama, no labay mo, ekal mo iyan kopa manlapud siak.” Naliliknan tuloy nen Jesus so mapalalo iran irap lapud balaw ya itarok na ipapatey to bilang sakey a kriminal ed ngaran na Ama to. Agayla, say pakaukom bilang manangayew​—sakey a mansasalitay mauges ed Dios—​so ngalngalin alabas lan tuloy a sakbaten!

Anggaman kuan, intuloy nen Jesus ya ipikasi: “Aliwan say labay ko, noagta say labay mo.” Situtulok ya impasakup nen Jesus so linawa to ed linaway Dios. Diad saya, sakey ya anghel manlapud tawen so inmapireng tan amaseseg ed sikato tekep na makapaseseg iran salita. Maseguro, imbaga na anghel ed si Jesus a sikatoy walaan na imis na abobon na Ama to.

Ingen, agaylan belat so walad takeb nen Jesus! Say dilin magnayon a bilay to tan ed interon atooan a rasa so walad kaatapan. Say emosyonal ya irap so mapalalo. Kanian intuloy nen Jesus so manpikasi na lalon sisisimoon, tan say linget to so nagmaliw a singa saray tedter na dala. “Anggaman saya so mataltalag a nagawa,” ibabaga na The Journal of the American Medical Association, “say panlinget na dala . . . so nayarin nagawa ed mapalalon emosyonal a kipapasen.”

Kabekta, si Jesus so amawil ed komatlon pankanawnawa ed saray apostol to, tan aminsan lamet ya asabian toran nanaugip. Sikara so abanalan manlapud mapalalon ermen. “Anggad panaon a singa onia et sikayoy nanaugip tan manpapainawa!” inkelyaw to. “Susto la! Asabi lay oras! Nia! Say Anak na too so nitapat ed kalimaan na saray managkasalanan. Alagey kayo, ’tila la. Nia! Say manangitapat ko so inmasingger la.”

Legan a sikatoy mansasalita ni, inmasingger si Judas Iscariote, ya uulopen na baleg a karaklan a walaay awit-awit iran silewan tan saray lampara tan saray ayura. Mateo 26:30, 36-47; 16:21-23; Marcos 14:26, 32-43; Lucas 22:39-47; Juan 18:1-3; Hebreos 5:7.—NW.

▪ Kayari intaynan ed kuarto’d tagey, iner so angipaarapan nen Jesus ed saray apostol, tan anto so ginawa to diman?

▪ Legan a manpipikasi si Jesus, anto so gagawaen na saray apostol?

▪ Akin a si Jesus so walad masyadon kairapan, tan anton kerew so ginawa to ed Dios?

▪ Anto so ipapatnag na panlilinget nen Jesus a singa tedter na dala?