Say Sankabalgan a Toon Nambilay ed Kapiganman

Kapitulo 118

Panangitapat tan Panangerel

Saman so lampas lan tuloy na pegley-labi legan ya iwawanwan nen Judas so baleg a karaklan na saray sundalo, manuna iran saserdote, Pariseos, tan arum nira ed harden na Getsemani. Saray saserdote so inmabuloy a manbayar ed si Judas na 30 pirason pilak pian itapat si Jesus.

Asasakbay, sanen pinataynan la si Judas manlapud panangan ed Paskua, mapatnag a sikato so direktan linma ed saray manunan saserdote. Saraya so tampol ya anguksoy ed dili ran opisyales, ontan met ed ulop na sundalo. Anganko ta inwanwan lara nen Judas ya unaan ed pasen a nanselebraan nen Jesus tan saray apostol to na Paskua. Diad impakaamtan sikara lay akaalis, say baleg a karaklan a walaay tarok iran ayura tan walay sankaawit a lampara tan silewan so tinmumbok ed si Judas a papaway ed Jerusalem tan pabeltang ed Lawak na Kidron.

Legan ya iwawanwan nen Judas so prosisyon a patatdang ed Palandey na saray Olibo, liknaen ton seguradon amta to no iner so pakaromogan ed si Jesus. Legan na apalabas a simba, legan na pambabaroy nen Jesus tan saray apostol a paarap tan papawil ed baetan na Betania tan Jerusalem, mabetbet iran ontunda ed harden na Getsemani pian manpainawa tan mantotongtong. Balet, natan, lapud posiblin asaniban si Jesus ed kabilungetan ed silong na saray kiew na olibo, panon dan nabidbir? Nayarin sikatoy agda nin balot anengneng. Kanian si Judas so angitarok na tanda, ya ibabaga: “Siopamay angoban ko, sikato iya; erel yo tan itagar yon matintinunos.”

Inwanwan nen Judas so baleg a karaklan ed harden, anengneng si Jesus a kaiba iray apostol to, tan diretson inmasingger ed sikato. “Maong ya agew, Rabbi!” inkuanto tan matamoy ton tuloy ya inangoban.

“Kaaro, parad anton gagala a sika so wadia?” tepet nen Jesus. Insan, diad pangeebat ed dilin tepet to, inkuanto: “Judas, kasin itapat mo so Anak na too diad sakey ya angob?” Balet susto la ed manangitapat to! Si Jesus so inmasingger ed liwawa na saray silewan tan saray lampara tan tinmepet: “Siopa so aanapen yo?”

“Si Jesus a Nazareno,” so ebat.

“Siak iman,” inyebat nen Jesus, legan a sikatoy manalalagey a sipapakpel ed arapan dan amin. Atalagnaw diad inkapakpel to tan ag-amta no anto so ilaloan, saray lalaki so sinmener tan alokbob.

“Imbagak ed sikayo, siak iman,” mapalnan intuloy nen Jesus. “Sirin, no siak so aanapen yo, pataynan yo iraya.” Agni abayag diad kuarto’d tagey, imbaga nen Jesus ed kinen Ama to diad pikakasi a sikatoy amasiansia ed matoor iran apostol to tan anggapoy sakey ed sikaran abalang “nilikud ed anak na kadederal.” Kanian, pian say salita to so nasumpal, kinerew ton napataynan iray patumbok to.

Legan a nipapawil so talindeg na saray sundalo, onaalagey, tan gagapoay panaker ed si Jesus, abidbir na saray apostol no anto so magano lan nagawa. “Katawan, mangabil kami diad saray kampilan?” tepet da. Sakbay na iyebat nen Jesus, si Pedro, diad panguuyos ed sakey ed duaran kampilan ya inawit na saray apostol, so angataki ed si Malco, sakey ya aripen na atagey a saserdote. Say sigbat nen Pedro so akamintis ed ulo na aripen balet ta asingwat so kawanan a layag to.

“Angga la’d satan labat,” inkuan nen Jesus legan na isasalet to. Diad panidiwit ed layag nen Malco, pinaabig to so sugat. Insan sikatoy angibangat na importantin leksion, a mangigaganggan ed si Pedro: “Ipawil moy kampilan mo ed pasen to, ta amin iraman so mangala na kampilan so ompatey diad kampilan. Odino isipen mo ya agko nayarian a kerewen ed Amak pian mangitarok ed siak diad sayan bekta na masulok ni nen labinduan legion na saray anghel?”

Si Jesus so mabulos a paerel, ta ibabaga to: “Panon a nasumpal Iray Kasulatan a kaukolan a nagawan singa onia?” Tan inyarum to: “Say kopan inter ed siak na Amak, agko ta nepeg ya inumen?” Sikato so sigpot a mitunosan ed linawa na Dios parad sikato!

Insan tinukoy nen Jesus so karaklan. “Kasin pinmaway kayon tekep na saray kampilan tan saray patngen a singa sumpa ed sakey a matakew pian erelen yo ak?” tepet to. “Inagew-agew nensaman a manyodyorong ak ed templo a manbabangat, tan ingen agyo ak inerel. Balet amin iraya so agawa pian nasumpal iray kasulatan na saray propeta.”

Diad saman et inerel na saray ulop na sundalo tan say komander na militar tan saray opisyal na saray Judio si Jesus tan sikatoy tinaker da. Diad impakanengneng ed saya, inkaindan na saray apostol si Jesus tan tinmaynan. Anggaman ontan, sakey a kalangweran a laki​—anganko et say babangatan a Marcos—​so nansiansia ed limog na karaklan. Nayarin sikatoy walad abung a nanselebraan nen Jesus na Paskua tan kayari to et tinmumbok ed karaklan manlapud diman.

Anggaman ontan, natan et sikatoy abidbir, tan sinalin sikatoy erelen. Balet ta intilak toy linon kawes to tan binmatik. Mateo 26:47-56; Marcos 14:43-52; Lucas 22:47-53; Juan 17:12; 18:3-12.—NW.

▪ Akin a liknaen nen Judas a seguradon naromog toy Jesus ed harden na Getsemani?

▪ Panon ya impanengneng nen Jesus so kapagaan to parad saray apostol?

▪ Anton kiwas so ginawa nen Pedro diad pangiyagel ed si Jesus, balet ta anto so imbaga nen Jesus ed si Pedro nipaakar ed satan?

▪ Panon ya imparungtal nen Jesus a sikatoy walad sigpot a pitutunosan ed linawa na Dios parad sikato?

▪ Sanen inkaindan na saray apostol si Jesus, siopa so atilak, tan anto so agawa ed sikato?