Tastasi nen Jehova ed Interon Mundo—India
INDIA! Sayan maawang a sub-kontinenti so ayaman na 1 ed kada 6 totoo ed sayan planeta. Ami-amin, masulok a 1,000 iran lenguahe tan dialekto so sasalitaen ed sayan nansasamok a dalin. Kaslakan ed totoo et Hindu, 83 porsiento ed sikara, bangta 11 porsiento so Muslim, a tutugyopen na Sikh, Budista, Jain, tan pigaran nominal a Kristiano so nakekeraan.
Panggagayagaan la na Tastasi nen Jehova so matalonggaring ya itatalona ed India ed agano niran taon. Aromog daray kinmarneron totoo a mabulos a mangalay mapekder a talindeg ed dapag na Panarian nen Jehova, anggaman ed amin a klase na desdes tan isusumpa.
Alimbawa, sakey a bii ed sakey ya ortodukso Hindu a pamilya so piley la nanlapud inkaugaw lapud polio. Say irap a dinalanan to so nanggawa ed sikaton manisip nipaakar ed Dios tan say gagala na bilay. Inusisa to so dakel a relihyon parad ebat balet ta ag-akaromog na kainawaan. Bilang resulta, abalang to so pananisia to ed relihyon, anggaman aliwan diad Dios.
Ompapatnag ed sayan panaon duaran Tastasi so akapiabet ed sayan bii ed panagkabkaabungan a ministeryo ra. “Siak so akalua sanen arengel kon binasa ra so Apocalipsis 21:4,” nanonotan to. Sikato so angawat na dakel ed saray publikasyon na Watch Tower Society tan akipakna ed sakey a panagaral na Biblia ed ayaman anggaman ed isusumpa na ina to. Say bii so nanggawa na dakel a pananguman ed bilay to, a sipapakpel ya inarap so isusumpa manlapud kakanayon, tan nagmaliw a bautismadon Tasi. Kuanto: “Siak so nanggaway dakel a pananguman, tan nagmaliw itan a mairap a tuloy. Balet walan naynay ed siak si Jehova a Dios tan angiter ed siak na baleg a kareenan tan gayaga.”
Mapekder Parad Puron Panagdayew ed Eskuelaan
Sakey a kalangweran ya agin bii so kinerewan na maestra to ya onla ed sakey Katolikon simbaan a kaiba’ray kaklase to. Say agi so sigagalang ya ag-inmabuloy, ya ibabagan sikato so sakey ed Tastasi nen Jehova tan agmandayew ed siopaman odino antokaman nilikud ed si Jehova. Inkuan na maestra a sano amin niran arum so linma ed simbaan, nepeg to met so onla. Balet say agi so tinmalindeg a malet tan imbaga ton bangta saramay onla’d simbaan so agmanpikasi ed si Jehova, kabat ton agto kaukolan so onatendi diman.
Lapud inkapekder na bii, labay na maestra ya amtaen ni nagkalalo. Kanian diad tinmumbok ya agew et say agi so angiter ed sikato na artikulo na sakey a Panag-Bantayan nipaakar ed panagdayew ed si Jehova. Diad impandinayew ed abasa to, say maestra so nan-exempt ed sikato manlapud amin a relihyoson aktibidad diad eskuelaan. Say agi so akapangipalima na samploran magasin ed sikato tan ed arum a managbangat.
Atumangan so Itutulok ed Ganggan na Dios ed Dala
Agano ni et sakey a viral a trangkaso so tinmerak ed pormay epidemya ed pigaran parti estado na Kerala. Sayan sakit so mapalalon manederal ed saray kidney tan mansusumpal ed pankaukolan na dialysis. Say panangiyalis na dala so mabetbet a nauusar. Diad sakey a syudad et 14 a totoo so inawat ed ospital a walaan na sayan sakit. Sakey ed sarayan pasyente et sakey a Tasi, sakey a matatken ed lokal a kongregasyon. Sikatoy binagaan a say panangiyalis na dala lambengat so walan pantambal. Impaliwawa na matatken so Makasulatan iran sisiaen to tan sipepekder ya impulisay so dala. (Gawa 15:28, 29) Kayari dakel ya argumento et inkuan na saray doktor a sikatoy ompatey lapud panangipulisay to ed sakey a panangiyalis na dala.
Say 13 pasyente so angawat na dala. Makapaermen, amin ed sikara so inatey diad loob na pigaran agew. Bokbokor na agi so akaliktar! Saray autoridad ed ospital so asurpresan tuloy. Say medical staff so nandinayew a maong ed regular a bisita a ginawa na membro na say kongregasyon. Kayarin sikatoy apapaway ed ospital, say agi so linman misalamat ed saray doktor, balet ta inkuanda: “Akin a pisalamatan mo kami? Pisalamatan moy Dios yo, si Jehova. Sikato so samay Sakey ya angisalba ed sika. Ipangasin ipikasi mo kami met ed Dios yo, si Jehova.”
[Kahon ed pahina 24]
SAY KIPAPASEN NA BANSA
1994 Serbisyon Taon
PANTOK A BILANG NA MANTATASI: 14,271
RATIO: 1 a Tasi kada 65,266
INMATENDI ED MEMORYAL: 38,192
PROMEDYON MANANGIPALAPAG A PAYUNIR: 1,780
PROMEDYON PANANGIYARAL NA BIBLIA: 12,453
BILANG NA ABAUTISMOAN: 1,312
BILANG NA SARAY KONGREGASYON: 410
SANGAN OPISINA: LONAVLA
[Litrato ed pahina 25]
Sangan opisina, Lonavla
[Litrato ed pahina 25]
Panagtasin nisisiglaot ed “Everlasting Good News” kumbension nen 1963
[Litrato ed pahina 25]
Panpupulong ed sakey a managlako ed paway na Red Fort diad Delhi