Panamaliket ed Bilay na Pamilya Yo

Katuloyan na Kapitulo 5

“Napatulok ya Andi Salita”

36-38. Antoray arum a dalan pian nadampot so puso na sakey ya asawa ya agkapananisiaan?

³⁶ No maminsan, saray kiwas so mansalitan maksil nen saray salita, tan nagkalautlan tua ed saray kaasawaan a lalakin ag-ira kapananisiaan ed Salitay Dios. Diad sikara imbaga nen apostol Pedro: “Sikaray nayarin napatulok ya andi salita diad panamegley na ugali kaasawaan dan bibii lapud impakatasi ra ed malinis ya ugali yo a tekep na aralem ya respeto.” (1 Pedro 3:1, 2) Dakel ya agmananisian asawan lalaki so nanreklamo a say asawa ra so naynay a “manpupulong” ed sikara, tan sikaray onsanok. Diad pidumaan, arum so nagmaliw a mananisia ed pakakanengneng da’d pananguman a ginaway katuaan na Salitay Dios ed saray kaasawaan da. Naynay a lalon nasagyat iray totoo diad pakanengneng da’d sakey a sermon nen say diad pakadngel da.

³⁷ No sikay mitongtong ed agmananisian asawam, “komon say balikas mo so naynay ya atekepan na inkasayaksak,” diad maong a pakataway, odino “atimplaan na asin,” a singa panangibaga na kasulatan. Walay panaon ya pansalita. “Singa saray mansanas a balitok ed inukit a pilak so sakey a salitan imbesngaw ed dugan panaon to,” kuan na Biblia. Kasin sikatoy adismaya ed sakey a bengatla? Anganko aliway nansumpalan na saray bengatla ed trabaho. Say pigaran makatalos a salsalita so nayarin pabpablien to ed sayan bekta. “Saray marakep a salsalita so . . . masamit ed kamarerwa tan makatambal ed saray pukel.” (Colosas 4:6; Uliran 25:11; 16:24, NW) Odino, dependi ed kipapasen, anggan say pangikaplas mo labat na limam ed lima to so nayarin mangibaga lan amin: Natalosan ko, siak so walad diking mo, tulongan taka no nasarag ko.

³⁸ Anggaman sikatoy sakey ya agmo kapananisiaan, ipapanengneng na Salitay Dios a siansian sikay manpasakop ed sikato. Say maabig a konduktam so nayarin diad kaunoran et sikatoy napatulok mo, ta pian sikatoy mikasakey ed pananisiam. Agaylan satan ya agew so makapalikliket! Tan no satan ya agew so onsabi, namoria to a sikatoy walaan na lalon dakel a rason a mangaro ed sika nen say kabat to. Nisengeg ed debosyon mo, tekep na inkamapekder ed kabat mon maptek, so ontulong ed sikaton ompeket “ed peteg a bilay.”​—1 Corinto 7:13-16; 1 Timoteo 6:19.

39, 40. Antoran kualidad, a nilista ed Tito 2:4, 5, so manggawa’d sakey ya asawan biin mabmabli, aliwa lambengat ed asawa to, noagta ontan met ed si Jehova?

³⁹ Papasesegen na Kasulatan iray Kristianon bibiin kaasawaan, balang lan saray kaasawaan da so mananisia odino agmananisia, “ya aroen daray kaasawaan da, ya aroen daray ananak da, magmaliw a mabunigas ed nonot, malinis, komikimey ed abung, maong, a manpasakop ed dilin kaasawaan da, ta pian say salita na Dios so ag napauges.”​—Tito 2:4, 5, NW.

⁴⁰ No sika, say asawan bii, et gawaen mo iya ed anggaay nayarian mo, sikay naad-aron maong, aliwa lambengat ed asawam, noagta ontan met nen Jehova a Dios.