Sakey a Matalonan Kampanya na Panagtasi ed Gresya

ABAYAG lan nidunget ed isusumpa iray Tastasi nen Jehova ed Gresya. Arum ya opisyales ed pulisya, korte, tan gobierno so amasegsegang ed Tastasi, mabetbet lapud pananesdes na klero na Griegon Ortoduks. No maminsan say baraan et say ley na Gresya sumpad proselitismo, no maminsan et say nibase’d-Biblian panangipulisay na Tastasi a mibiang ed bakal odino mangawat na panangiyalis na dala.​—Isaias 2:2-5; Gawa 15:28, 29.

Diad sagpot pian lalon natalosan ira na matuan-impanpuso iran autoridad ed Gresya, manga 200 a Tastasi a bibidbiren na Griegon gobierno bilang relihyoson ministros, ontan met ed pigaran membro na abogasya, so diad agano ni et nanggawa na sakey a panbansan kampanya. Angiyopresi ira na sakey a nikaduman denesinyon brosyur, ya atituloan na Jehovah’s Witnesses in Greece, ontan met ed libron Jehovah’s Witnesses​—Proclaimers of God’s Kingdom. Angitarok met ira na sakey a pakete na saray dokumento a mangipapanengneng ya anggapo so makatunongan tan legal a basiyan na panamasegsegang ed Tastasi nen Jehova. Binisita na Tastasi iray hepe na pulisya, saray alkalde, piskal, tan arum nin opisyales.

Say kiwas? Nilasus a maabig ya eksperiensia. Konsideraen pay pigaran alimbawa.

Say komander na sakey ya istasyon na pulisya ed West Macedonia so angabrasa ed agagi tan inkuanto: “Abayag takayo lan kabat, . . . tan pandinayewan koy inka-uksoy yo. . . . Agak onabobon ed ley sumpad proselitismo, tan no wala labat lay pakayarik, panganggaen ko itan.”

Onia iray komento na saray komander ed nanduruman istasyon na pulisya ed dakel a syudad: “Komendaan takayo ed panseserbi yo ed sosyedad.” “Say komunidad yo so agbalot mamapalesa na saray problema ed saray pulis; manusumpal kayo na kimey a pansosyedad.” “Anggapon balot so problema mi ed sikayo. Rerespetoen tan aapresyaen mi kayo.”

Diad Piraeus et sakey ya atagey ya opisyal ed security police so angikuan ed agi tekep na saray lua ed saray mata to ya amta toy manpikasi ed ngaran nen Jehova a Dios diad panamegley nen Jesu-Kristo. Sinurprisa to nin nagkalalo iray Tastasi sanen inkuanto ed sikara a kabat ton iilaloan day pigaran panamasegsegang sakbay na Armagedon, tan mailalon sikatoy usaren na Dios pian sikaray tulongan ed satan a panaon! Inawat to so imbitasyon na agagi parad malaglaem a diskusyon.

Onkikiwas Iray Opisyal na Gobierno

Oniay inkuan na sakey ya alkalde ed Thessaly nipaakar ed Proclaimers a libro: “Makanepegan itan a nipasen ed librarya na munisipyo​—ed prominentin pasen!” Diad saman et inekal toray libro manlapud sakey ya istanti tan impasen so Proclaimers a libro diman pian say apis to so nanengneng.

Diad Mamaamianen a Gresya, sakey ya alkalde so ampetapetang ya angabrasa ed bisita na agagi tan inkuanto: “Sikayoray sankaabigan a totoon kaliktan kon niwala ed munisipalidad ko.” Sakey a maomaong ya alkalde ed amianen ya Euboea so angikuan ed saray agagi: “Sakey ak a datin opisyal na sundalo. Balet sikayo​—aapresyaen takayon tuloy.” Sikatoy entusiastikon inmabobon ed saray punton inyarap na Tastasi. Sanen impanengneng da so pigaran libron impalapag na Watch Tower Society, inkuanto: “No isipan kon basaen iratan ya amin, iter yo ta ira ed siak?” Inyebat da: “Siempre​—gawam lara itan!” Sikatoy aliketan tan ngalngalin agto la pataynanen iray agagi.

Diad sakey a distrito ed labas na Attica, sakey ya alkalde so sililiket ya angawat ed literatura ya inyopresi na agagi tan kinerew ed sikaran mantultuloy dan tuloran na saray publikasyon na Sosyedad. Legay itataynan da, inkuanto’d sikara: “Saray totoo so dismayadon tuloy na saray pulitiko tan diad arum la ra manaanap na peteg a katuaan. Maseguro ak a manlapud natan et sikayo so magmaliw ya okupadon tuloy lapud wala’d sikayo so katuaan.”

Onkikiwas Iray Piskal

Nanonotan na agagin binmisita ed sakey a katulongan a piskal ed mamaamianen a Gresya: “Sikatoy nandinayew ed saray publikasyon tan ed presentasyon tayo, pati ed saray sagpot tayon seguroen a saray kaiba tayo so aliwan anggapoy-nagawaan sano nidudunget ed seryoson isyu na panangiyalis na dala. Kaunoran et pinasalamatan to kami tan ampetapetang ya angomenda ed sikami lapud inkamabulos ya ombisita ed sikato tan pakabatan. Saginonor, aromogan min apatiran taon ed asasakbay et sikato imay anawag ed saray pulisya tan inmanda so panerel ed duaran agagi a mibibiang ed lawak a serbisyo.”

Duaran abogadon Tasi a binmisita ed saray opisina na piskal ed Atenas so asurprisa sanen inmasingger ed sikara so sakey a kabkabat tan respetadon matatatken a piskal. Sikaray impireg to tan imbaga ed sikara a say ley sumpad proselitismo so andian na letnegan tan pansesengegay inkawetwet ed sistema na Griegon korte. Pinasalamatan tora tekep na ampetang a pasamano.

Diad amianen na Gresya, sakey a piskal so makaaron tuloy tan angawat na literatura. Diad pamubukay ed libron Questions Young People Ask​—Answers That Work, sikatoy nikelawan ed nanduruman kapitulon lugan to. Inkuanto: “Agko nin balot anengneng ed interon Ortoduksiya so iyaarap na sayan libro.”

Sakey a piskal so angaksobin sikato, diad apalabas et angiganggan ed pangiter na saray panangiyalis na dala ed Tastasi sumpad linawa ra. Balet kayarin akikatunongan iray agagi ed sikato ed say pamaakaran, inkuanto: “Agko lan balot mangipaway na ontan a ganggan diad arapen!” Pinekderan ton say lokal a Hospital Liaison Committee parad Tastasi nen Jehova so nakonsulta ta pian amin a sandi ed dala so nasukimat. Sililiket ton inawat so libron Young People Ask.

Onkikiwas Iray Manangasikasoy Librarya

Say materyal so imparungtal met ed dakel a manangasikasoy librarya. Diad sakey a librarya ed Atenas, sakey a magalang a manangasikasoy librarya so angawat na literatura tan inkomento to: “Marakerakep ta tinarokan yo kami na libro yo lapud maslak ed saray libro a wala ed librarya mi so sumpa ed sikayo. . . . Sakey a pari so maingongot a tuloy a nanengneng iray libro yo ed librarya. . . . Andi bali. Nepeg a narengelan so opinyon na amin.”

Sakey ya opisyal ed sakey a librarya ed munisipyo na Crete, ya apikabkabatan toy Tastasi nen Jehova ed sakey a kampo militar, so angibaga ed saray agagi a pandinayewan toy panangipulisay na Tastasi a mibiang ed bakal. Naynay ton tetepetan so inkasikato, ‘Akin a nepeg a manirap irayan totoo?’ Sikato so angawat na literatura manlapud saray agagi tan oniay inkuanto nipaakar ed kaplesan a kampanya ra: “Ekselentin kimey so gagawaen yo tan nepeg komon a nensaman yo la ginawa iya. . . . Diad Gresya et kasmak so panangidumaduma.” Kinerew to’d agagi a sikatoy bisitaen lamet ed maganon panaon.

Legan na espisyal a kampanya, akapangipalima iray agagi na masulok a 1,000 a libron Proclaimers, 1,600 a brosyur a Jehovah’s Witnesses in Greece, ontan met ed nilasus a libro tan magasin. Nagkalalo ni, apitongtongan dan arap-arapan so nilasus a Griegon opisyales. Natan et iilaloan na matoor ya ariripen nen Jehova ed Gresya tan ed interon mundo a saray matuan-impanpuson autoridad ed Gresya so magmaliw a mas makatunongan ed panmoria ra nipaakar ed Tastasi nen Jehova.