Asingsingger La so Maong a Balita!

AMIN tayo so naeermenan kapiganman ya akaawat tayo na mauges a balitan personal a mangapekta’d sikatayo. Diad biek a dapag, panliketan tayo sano onsabi maong a balita​—saray balita na gayaga parad sarili tayo odino ed saray inad-aro tayo. Balet sano aliwan sikatayo noagta say arum so apektado na mauges a balita, mabetbet a panpirawatan tayon amtaen itan; panggayagaan na arum ni ingen so insaew na arum. Saya ed sakey a banda so nayarin sengegan no akin a masaliw so mauges a balita!

Diad asakbay a kabiangan na Guerra Mundial II, wala so sakey a malinew ya alimbawa na makapageget ya interes na arum ed kalamidad. Sakey a 10,000-toneladan armadon barkon pangguerra, say Graf Spee, so ikikinon na saray armada na Aleman nen 1939. Pigara lan simban mamapawala na deral iyan barkon pangguerra ed saray barkon pannegosyo na saray Alyado ed kadayatan na Abalaten ya Atlantiko tan Indian. Diad kaunoran, taloran barkon pangguerra na Britanya so angusil tan angataki ed Graf Spee, a nansengay inkaandi bilay tan say barko so apilitan a dinmaung pian naapiger diad puerto na Montevideo ed Uruguay. Ingganggan na gobiernoy Uruguay ya ipawil a tampol ed taew so barkon pangguerra, tano andi et kompiskaen iya. Kanian singano asingsingger lay sakey a pirmi tan nilabin panlalaban.

Diad impakabalita’d saya, sakey a grupo na mayayaman a negosyante ed Estados Unidos so nanarkila na sakey ya eroplano, diad kantidad ya ag-onkulang a $2,500 [E.U.] ed kada pasahero, pian nipatekkiab a mamaarap ed Uruguay pian bantayan so madalan panlalaban. Baleg so insaew da, ta ag-agawa so impanlalaban. Ingganggan nen Adolf Hitler a paleregen so Graf Spee. Imbes, say nilibon manbabantay a dinmagup ed daungan ed panilalon natasian so nagawan maruksan panlalaban ed dayat so akanengneng tan akadngel ed makatelek ya insabog ya amalereg ed Graf Spee, na mismon tripulante to. Say kapitan so nanbitkel diad impamaltog to’d ulo to.

Anggaman ed samet ya inkahilig na pigaran totoo ed makapataktakot a bengabengatla, maslak so mipakna a lablabayen da so maong a balita imbes ed mauges a balita. Agta ontan met so labay mo? Akin, sirin, a mangirerekord so awaran na dakerakel a mauges a balita tan dagdaiset a maong a balita? Nauman ta ni situasyon?

Sengegan na Amin a Mauges a Balita

Sasaglawien na Biblia so panaon a puros maong a balita labat lay wala. Say mauges a balita so bengatlan agkabat, agnarengelan. Sanen akumpleto nen Jehova a Dios so panamalsan kimey to, say planetan Dalin so akatarya lan panggayagaan na too tan ayep. Oniay ibabaga ed sikatayo na salaysay na Genesis: “Anengneng na Dios so amin a bengatlan ginawa to tan, nia! satan so alay abig.”​—Genesis 1:31.

Say inkaandi mauges a balita so agnambayag kayari inkapalsa na too. Sakbay ya awalaay anak si Adan tan si Eva, nireport lay mauges a balita ed impanrebelde sumpad Dios tan diad unibersal ya areglo na inka-uksoy. Sakey ya atagey-ranggon espiritun ilalak so nagmaliw a traidor ed nimatalek a posisyon tan tinmalonan amakiwas ed inmunan sanasawan too pian miulop ed sikato diad rebelyoso, traidor a kurang to.​—Genesis 3:1-6.

Ginmapo ed satan a panaon so indaak na mauges a balitan atasian na katooan. Agpankelawan a say intriga, panamalikdo, katilaan, agkatuaan, tan agpangibagay amin a katuaan so mabitar a tuloy ed mauges iran balitan manedelap ed mundo nanlapulad saman. Direktan imbunton nen Jesu-Kristo so pakatetelan ed si Satanas a Diablo bilang say Manangigapo na mauges a balita, ya ibabaga ed saray relihyoson lider ed agew To: “Sikayo so nanlapud ama yon Diablo, tan kaliktan yo a gawaen iray pilalek na ama yo. Satan a sakey so manamatey sanen ginmapo, tan agto tinmalindeg a malet ed katuaan, lapud say katuaan so anggapo ed sikato. Sano sasalitaen toy tila, sikatoy mansasalita unong ed dili ton disposisyon, lapud sikato so sakey a matila tan say ama na tila.”​—Juan 8:44.

Legay ibabaleg na populasyon na too, kabansag met na saya so idaraak na mauges a balita. Siempre, agkabaliksan na saya ya anggapo lay panaon na gayaga tan liket, ta dakel so bengatla ed bilay a pansengegan na panggayaga. Ingen, saray lurem na problema tan ermen so sankapatnag ed kada kailalakan na katooan ya angga ni’d natan.

Wala ni sakey a manunan sengegan na sayan maermen a kipapasen. Satan et say atawir tayon ikiling ed panggaway-mauges tan kalamidad. Ipapaamta a mismo nen Jehova iyan agnapaliisan a sengegan na mauges a balita diad impangibagan: “Say inklinasyon na puso na too so mauges nanlapula’d inkatobonbalo to.”​—Genesis 8:21.

Akin ya Ondarakel so Mauges a Balita?

Anggaman ontan, walay sakey a rason no akin ya ontanlay idarakel na mauges a balita ed sayan koma-20 siglo. Sayan rason so malinlinew ya imparungtal na Biblia, ya angipasakbay a say katooan diad koma-20 siglo so onloob ed sakey a nikadkaduman panat na panaon a kabkabat bilang “say kaunoran iran agew” odino “say panaon na anggaan.” (2 Timoteo 3:1; Daniel 12:4) Ipapaamta na propesiya ed Biblia tan Biblikon kronolohiya iya ya “anggaan a peryodo,” a ginmapo nen 1914. Parad detalyadon Makasulatan a prueba ed saya, ipangasin nengnengen so kapitulo 11 na libron Pikakabat a Mangitonton ed Andi-Anggaan a Bilay, impalapag na Watchtower Bible and Tract Society of New York, Inc.

Say kaunoran iran agew so onggapo ed sakey ya ebenton automatikon pansengegan na idakel na mauges a balita ed dalin. Anto itan? Satan et say kibasileng nen Satanas a Diablo tan saray ulop ton demonyo manlapud tawen. Nabasam so malinew a deskripsyon na sayan agnapaliisan ya idaraak na mauges a balita ed Apocalipsis 12:9, 12: “Imbasileng so baleg a dragon, say orihinal a serpiente, say tatawagen a Diablo tan Satanas, a sikato so mangibabalang ed interon panaayaman a dalin, sikato so imbasileng ed dalin, tan saray anghel to so imbasileng a kaiba to. . . . ‘Kasi la parad dalin tan parad dayat, lapud say Diablo so linmeksab la ed sikayo, a walaan na baleg a sanok, diad pakaamtan antikey lay panat na panaon to.’”

Kanian antokaman ni panaon a natitilak ya anggad konklusyon na kaunoran iran agew, nailaloan tayo a say mauges a balita so mantultuloy, ondaak tan onloor ni ingen.

Aliwan Onia lan Naynay

Makapaliket parad saray manaayam ed dalin, aliwan naynay a wadtay miserablin kipapasen na saray pakurang a mamapawalay epidemya natan na mauges a balita. Diad tua, nibaga tayo tekep na kompiyansa a saray agew na mantultuloy a mauges a balita so abilang la. Wala ni nailaloan ed situasyon, anggaman ed saray nagagawgawa. Asingsingger la so anggaan na amin a mauges a balita tan agnaumas ya onsabi nigeter a panaon na Dios.

Naseguro tayo iya lapud say kaunoran iran agew so nipropesiyan mamantok odino manampot ed paneral tan pangekal na Dios ed amin a pansesengegay mauges a balita. Ekalen to so marelmeng a totoon mansusugsog na panlalaban ya agda labay so manguman tan taynan so lingon kurang da. Pantokan iya na bakal na say baleg ya agew na Dios a Makapanyarin-amin, a kaslakan a kabkabat bilang bakal na Armagedon. (Apocalipsis 16:16) Kayarin tuloy na satan, si Satanas a Diablo tan saray ulop ton demonyon puersa so napagit. Dedeskribien na Apocalipsis so kibalor nen Satanas, say panlalapuan na amin a mauges a balita: “Anengneng ko so sakey ya anghel ya onleleksab manlapud tawen a walaan na tombok na kaaralman tan sakey a baleg a gulong-gulong so walad lima to. Tan inerel to so dragon, say orihinal a serpienti, a sikato so Diablo tan Satanas, tan binalor to ed loob na sanlibon taon. Tan imbasileng to ed kaaralman tan kinapotan to tan tinatakan iman ed tapew to, ta pian agto la nibalang niray nasyon.”

Kayari na sarayan dramatikon ebento, onsabi panaon ya anggapo ni kaparan maong a balita parad dalin tan ed saray manaayam to. Kaiba ed sarayan manaayam so minilyon ya akaliktar ed pinal a bakal na Armagedon tan binilyon a paolien manlapud ugip na ipapatey ed saray lubok. Sayan sankaabigan ed amin a maong a balita so nadedeskribe ed kaunoran a libro na say Biblia: “Say tolda na Dios so wala’d katooan, tan miayam a kaiba ra, tan sikaray magmaliw a totoo to. Tan say Dios mismo so niwala ed sikara. Tan punasen to so lua manlapud kamataan da, tan anggapo la so patey, anggan say pandageyem nisay pannangis nisay ot-ot so anggapo la. Ta saray inmuna a bengatla so linmabas la.”​—Apocalipsis 21:3, 4.

Kasin naisip mo itan a maliket a panaon? Peteg a sakey a maglorian arapen a ditan et anggapo la so mauges a balita. On, amin a mauges a balita so anampot la’d satan tan agla narengelan lamet. Diad ontan et say maong a balita so manalona, tan onkayat itan ed amin ya inkamagnayon.