Anamoten Iyan Nikadkaduman Pankanawnawa!

ASINGGER lan nasumpal si Peter ed kurso ton medisina sanen asagyat so interes to ed mensahe na Biblia nipaakar ed kilalaban. Sanen nangraduar tan ginmapon iyaplikay inkadoktor to ed sakey ya ospital, tuloytuloy a sikatoy pinaseseg na saray superyor to a man-espisyalista bilang sakey a neurosurgeon. Saya so sakey a pankanawnawa ya anamoten na dakel a balon doktor.

Balet, dinisidi nen Petera a palampasen iyan pankanawnawa. Akin? Kasin lapud sikatoy andian labat na ambisyon tan motibasyon? Andi, ta ninonot a maong nen Peter so opresi. Kayarin nagmaliw a dedikado tan bautismadon Tasi nen Jehova, pinilalek toy makapangusar na dakel a panaon anggad posibli ed nanduruman nengneng na Kristianon ministeryo. Bektan kinmualipika bilang sakey a neurosurgeon, inkatunongan to, say propisyon to so mangupot na dakel a panaon tan sagpot to. Kasin sikatoy makulangkulang pian palampasen iyan nikadkaduman iilaloan, odino kasin sikatoy makabat?

Parad arum, nayarin ompatnag a makulangkulang so desisyon nen Peter. Anggaman ontan, kinonsidera toray teksto na Biblia a singa say Efeso 5:15, 16. Ditan et pinaseseg nen apostol Pablo iray kaparan Kristiano: “Nengneng yo sirin a tinekepan na panlikas no panon so panakar yo, aliwan singa andi kalakal, noag ingen singa makalakal, ya anamoten yo so [pankanawnawan, NW] panaon, ta saray agew sikara so mauges.”

Ipangasin imanoen so balikas a “pankanawnawan panaon.” Satan so nipatalos manlapud Griegon salita ya inusar ed Biblia a maslak a manutukoy ed sakey a panaon odino peryodo ya atandaan na pigaran nengneng odino matukoy parad sakey ya espisipikon aktibidad. Indanet ditan nen Pablo a nepeg a mangipanaon iray Kristiano parad importanti iran pamaakaran. On, kaukolan dan “abobonan so bengatla ran sankaabigan.” (Filipos 1:10) Pamaakaran itan nipaakar ed panangiletneg na saray prayuridad.

Kanian, sirin, anto so madibinon gagala parad panaon tayo? Anto so linawa na Dios parad saramay mangaaro ed sikato? Malinlinew ya ipapabidbir na saray propesiya na Biblia so agew tayo bilang “panaon na kasumpalan,” odino “saray kaunoran ya agew.” (Daniel 12:4; 2 Timoteo 3:1) Nilinew nen Kristo Jesus no anto so manunan importanti ed agew tayo. Espisipikon imbaga to a sakbay a manampot iyan marelmeng a sistema na bengabengatla, ‘saya ya evanghelio na panarian nipulong naani ed sankamundoan ya onkanan pamintuaan ed saray amin a nasyones.’ Diad ontan et insan onsabi so anggaan.​—Mateo 24:3, 14.

Sirin, kaukolan tayon anamoten so kada pankanawnawa ya ipulong so maong a balita na Panarian tan manggawa na saray babangatan. (Mateo 28:19, 20) Lapud sarayan aktibidad so aglan-balot-naulit, saya la so unor a pankanawnawa pian gawaey anggaay nayarian tayo ed sayan manangiliktar-bilay a kimey. “Natan so makanan panaon.” On, “natan so agew na panangilaban.”​—2 Corinto 6:2.

Panggawa na Makabat a Desisyon

Si Peter​—say balolakin asalambit ed gapo​—so maalalwar a nanisip nipaakar ed desisyon to tan sinimbang iray napanpilian to. Amoria ton agmauges so panaral diad getman magmaliw a sakey a neurosurgeon. Balet anto ta so sankaimportantian ed sikato? Saman et say aktibidad to ed Kristianon ministeryo, diad pangikokonsidera ed kaganatan na sayan kimey. Diad parehon bekta, sikatoy walaan na obligasyon a sumpalen. Sikato so kasado tan kaukolan ton suportaay asawa to, a mibibiang ed sigpot-panaon a panagpulong. (1 Timoteo 5:8) Kaukolan a bayaran nen Peter iray otang ed impanaral to. Anto, sirin, so denisidi ton gawaen?

Denisidi nen Peter a man-espisyalista ed radiology tan panangusisa ed panamegley na ultra sound. Saya so kimey a mangiyabuloy na normal a kimey ed sanagew. Sikatoy nipapasal met legan na regular a panagtrabahon oras to. On, nayarin ipasen na arum iya bilang aliwan tanton atagey a posisyon, balet ta mangiyabuloy ed sikato na mas dakel a panaon ya italaga ed espiritual iran gegemtan.

Sananey nin kokonsidiraen so anagyat ed desisyon nen Peter. Bangta aghuhusgaen so arum a dumay desisyon da, kabat ton say pagmaliw a nigalet a tuloy ed sekular iran pamaakaran so mameligro ed sakey a Kristiano. Pansengegan itan na pakapaulyan to ed espiritual iran responsabilidad. Saya so iyiilustra na sakey nin alimbawa a nisesentro ed impleyo.

Sakey a sigpot-panaon a manangipulong na Panarian so maong a pintor. Ayarian ton suportaay inkasikato ed pinansyal diad pangilako na saray impinta to. Legan ya itatalaga to so dakel ed panaon to ed sankaimportantian a Kristianon ministeryo, nayarian to’d satan a suportaan so inkasikato a magmainawa. Balet, linmesa so sakey a pilalek a napaaligwas so karera ton managpinta. Nagmaliw a sikatoy lalon nigalet ed panagpinta tan say mundoy arti, tinaynan so sigpot-panaon a ministeryo, tan kabekta et nagmaliw a sigpot ya inaktibo ya anggad alanor lay panangipulong na Panarian. Asabi panaon, sikatoy alanor ed agmakasulatan a kondukta, a nanresulta ed agto la pagmamaliw a kabiangan na Kristianon kongregasyon.​—1 Corinto 5:11-13.

Sayan Panaon Tayo so Nikadkaduma

Bilang saramay manlilingkor natan ed si Jehova, maseguron kaliktan tayoy mansiansian matoor ed sikato. Kabat tayon sikatayoy manbibilay ed nikadkaduman tuloy a panaon ed awaran na too. Pian makapantultuloy a manlingkor ed Dios tan pian epektibon makatalona ed kaplesan iran kipapasen, nakaukolan tayoy manggawa na pigaran pananguman. Nikompara tayo iya ed panagani na dumaralos. Saya so panaon na nikaduman aktibidad, sano saray dumaralos so iilaloan a mangisekar ed inkasikara na nagkalalo nen say gendat tan mantrabahon andukdukey. Akin? Lapud say aanien so nepeg a natipon diad loob na limitadon panaon.

Wala lambengat so limitadon tuloy a panaon a nakekeraan parad say peles a sistema na bengabengatla. Natan mas ni nen kapiganman, nakakaukolan na tuan Kristiano ya isekar so inkasikato a manumbok ed uliran nen Jesus tan manakar ed saray bakat to. Say kurang na bilay to ed dalin so malinlinew ya angidemostra no anto so sankaimportantian ed sikato. Inkuanto: “Nakaukolan tayo’n gawaen so saray kimey na angibaki dia ed siak, leleg ya agew ni; say labi onsabi sano anggapo lay too a makapankimey.” (Juan 9:4) Diad pangibabagan say labi so onsasabi, tutukoyen nen Jesus ed saman so panaon na subok, kipasak, tan ipapatey to, sano say mangaraldalin a ministeryo to so manampot tan agto la nayarian ed satan so mibiang ed saray kimey na mangatatawen ya Ama to.

Tua, legan na talora-tan-kapalduan taon na ministeryo to, inusar nen Jesus so arum a panaon to diad impanggagawa na saray milagro tan impamaabig ed saray mansasakit. Anggaman kuan, inusar to so dakel ed panaon to ya ipulong so mensahe na Panarian tan “mangipakabat na kawayangan ed saray arakep” na palson relihyon. (Lucas 4:18; Mateo 4:17) Angisekar si Jesus na masimoon a sagpot ed ministeryo to tan angipanaon met pian ipasal iray babangatan to pian makapangipaalagey ira ed pundasyon ya inletneg to tan epektibon makapantultuloy ed panagpulong a kimey. Inanamot nen Jesus so kada pankanawnawa pian iyalibansa so intereses na Panarian tan kinaliktan ton ontan met so gawaen na saray babangatan to.​—Mateo 5:14-16; Juan 8:12.

Singa si Jesus, sikatayo a modernon-agew a papatumbok to so kaukolan a makanengneng ed kipapasen na katooan a singa ed pakanengneng nen Jehova a Dios. Nanaupot la so panaon parad sayan sistema na bengabengatla, tan sipapangasin kaliktan na Dios ya amin so nawalaan na pankanawnawa a makagamor na kilalaban. (2 Pedro 3:9) Sirin, agta makabat so pangisaginonor ed amin nin arum a gegemtan tayo diad panggawa na linawa nen Jehova? (Mateo 6:25-33) Nagkalalo la legan na nikaduman panaon a singa saya, wala so bengatlan gendagendat ya ipasen bilang importanti a nayari ni ingen a magmaliw ya aliwan tanton importanti ed bilay tayo bilang Kristianos.

Manermen itayo ta diad pangiyuuna na linawa na Dios ed bilay tayo? Andin balot, ta say Kristianon kurang na dilin-panagsakripisyo so makapakelaw a makatumang. Singa bilang, inkuan nen Jesus ed saray babangatan to: “Tua kuan ko ed sikayo, Anggapoy too ya anainan na abung odino agagin lalaki odino agagin bibii odino ina odino saray anak odino daldalin nisengeg ed siak tan nisengeg ed evanghelio. Ingen awaten to so maminlasus natan ed sayan panaon, abu-abung tan agagin lalaki tan agagin bibii tan saray ina tan saray anak tan daldalin pati saray kapasegsegang tan dia ed mundo ya onsabi say bilay a maando.”​—Marcos 10:29, 30.

Agnaparaan na kuarta iray tumang a panggagayagaan na saramay manguusar ed panaon da pian dayewen si Jehova tan iyabawag so mensahe na Panarian. Dakel a tuloy a bendisyon so panggagayagaan da! Lalaktipen na saraya so tuan kakaaro, say pakapnek ed panggawa ed madibinon linawa, imis na abobon na Dios, tan say iilaloan ya agmanganggan bilay. (Apocalipsis 21:3, 4) Tan agaylan bendisyon so itulong ed totoo ed espiritual a paraan tan mangigalang ed masanton ngaran nen Jehova bilang Tastasi to! Anggapoy suppiat, say ‘panganamot ed pankanawnawan panaon’ so peteg a makabat tan makatumang a kurang. Natan mas ni nen say kapiganman so panaon pian mibiang ed panangiyabawag na maong a balita na Panariay Dios. Kasin anamoten mo tan benbenan iyan nikadkaduman pankanawnawa?

[Paimano ed leksab]