Pinaletan Lamet so Kanepegan ed Manonot a Panangiyabuloy
PINALETAN lamet so agano nin desisyon na Huis parad Preliminaryon Imbestigasyon ed Korti na Messina, Italya, a saray kerew ed panpatambal na sakey a wala la’d suston edad a pasienti so nepeg a rispitoen na saray doktor. Say pananontonan so inpaway ed sakey a kason nalalanor so sakey ed Tastasi nen Jehova.
Nen Enero 1994, si Antonino Stellario Lentini, sakey a manedad na 64-taon a Tasin walaay sakit a hemophiliac, so inbatik ed ospital ed Taormina, Messina. Inkuan nen Catena, say akulaw nen Antonino, ed staff na ospital a bilang Tastasi nen Jehova et sikato tan say masiken to so ag-onabuloy ed panangiyalis na dala. (Gawa 15:20, 28, 29) Nirispito so kerew da.
Balet, sanen niyaalis ed sananey a health care center, si Antonino so nairapan a tuloy ya onlinawa tan nangrabi so kipapasen to. Ag-abayag kayari na satan, sikato so inatey. Alay ermen nen Catena, balet sikatoy aligliwa ed sipan na Biblia nipaakar ed kioli. (Gawa 24:15) Insan, diad agto ilaloan, saray mahistrado—anganko lapud aliwan impangibalita na media—so angakusa ed sikaton kasalanan toy impatey na masiken to lapud agto impangiyabuloy ed operasyon ya impasen a kapilitan na saray doktor.
Kayari masulok a sakey taon, nen Hulyo 11, 1995, et si Catena so naabsuelto, lapud anggapoy ginawa ton krimen. Diad tua, impanengneng na impanestigo na saray eksperto ed medikal, a diad pangonsidera ed kipapasen na pasienti et anggapo lanlamang so nagawaan na panag-opera.
Balet ipapanengneng na saray salita na huis no anto so manunan isyu. Mairap ya awaten, unong ed sikara, so ideyan saray managtambal so kaukolan a mibali sano say pantambal so ipulisay na pasienti odino na totoon mangilalaman ed sikato. Inkuanto to ni a say medical deontological code ed Italya so “anengneng to lan inmuna so kapilitan a pangala ed manonot a panangiyabuloy na toon nasasaglawi sakbay na antokaman a pibabali.” Kanian, sinaglawi to a “mitunosan ed ganggan so impangamper [nen Catena] ya agnisilong ed ontan ya operasyon so masiken to.”
Apaletan lamet na sayan desisyon so kanepegan na sakey a wala-la’d-edad a mangipulisay ed panagtambal a sumlang ed kekerewen to.