Aaligen Mo Ta so Agmanangibiig a Dios Tayo?

AGPANANGIBIIG​—iner so pakaromogan? Wala so Sakey a sigpot ya agmanangibiig, bulos manlapud panangidumaduma, paboritismo, tan panaglabi. Sikato si Jehova a Dios, say Manamalsa na katooan. Anggaman ontan, nipaakar ed totoo, prangkan insulat na managsulat ya Ingles a si Charles Lamb nen koma-19 siglo: “Siak, diad simplin panangibaga, so napnoan na panangidumaduma​—tugyopen na saray panlabayan tan agpanlabayan.”

Nipaakar ed agpanangibiig, saray siglaotan na too so kulang a tuloy na saya. Dakel lan siglo so apalabas inkuan na makabat ya Arin Solomon na Israel a say “sakey a too walaan na pakayari ed sananey pian kaugsan to.” (Eclesiastes 8:9) Say panbubusolan ed rasa, nasyonal iran panlalaban, tan paniirangan ed pamilya so tuloytuloy ya ondaraak. Sirin, kasin realistikon panisiaan itan, diad inkasikaran dili, a natitibukel na totoo so sakey ya anggapoy panangibiig a sosyedad?

Nakakaukolan so sinononot a sagpot pian nakontrol iray awawey tayo tan iwaklit ed inkasikatayo so dinanman a nigalet iran panangidumaduma. (Efeso 4:22-24) Nayarin agtayo naamamtaan ya onkiling tayon walaan na saray awawey a resultay impluensia na sosyal tan edukasyon tayo tan nilamot ed nanlapuan tayon pamilya, rasa, tan nasyon. Sarayan ompapatnag a kaslakan iran inklinasyon so mabetbet a linmamot tan mangiyaalibansa na saray awawey a mangitotonton ed panangibiig. Inaksobi ni ingen na marunong ed ley tan editor a taga-Scotland a si Lord Francis Jeffrey: “Anggapoy bengatlan abayag lan agnaamtaan na too, nen say laknab tan biskeg na panangidumaduma to.”

Si Lenaa so sakey a toon mangaaksobi a nakakaukolan so sinononot a pansagpot pian labanan so kiling a magmaliw a manangibiig. Pian pukpokan so liknaan na panangidumaduma na sakey, inkuanto, “kakaukolanen toy baleg a sagpot lapud say mabiskeg a tuloy so impluensya na binalegan.” Bidbiren nen Lena a kaukolan so tuloytuloy iran panonot.

Say Rekord na Agpanangibiig nen Jehova

Si Jehova so ayadyarin uliran na agpanangibiig. Manlapud manangilukas iran pahina na Biblia, nabasa tayo no panon ton impatnag so agpanangibiig a pidedeneng to ed totoo. Dakel so naaralan tayo manlapud sarayan ekselintin alimbawa tan panonot.

Impanengneng nen Jehova so agpanangibiig diad panangimaneobra ed saray pamaakaran diad ontan et niproklama nen Judion apostol Pedro so maong a balita ed si Cornelio tan arum a Gentil nen 36 K.P. Inkuan nen Pedro diad saman a bekta: “Say Dios anggapo so pangiduma to ed saray totoo, noag ingen dia ed balang nasyon akoen to so antakot ed sikato tan manggawa na matunong.”​—Gawa 10:34, 35.

Diad amin a pidedeneng to ed atooan a pamilya, anggapoy-pananguman ya ipapanengneng nen Jehova so agpanangibiig to. Inkuan nen Jesus nipaakar ed Ama to: “Sikato so pabutayen to so banwa to ed saray mauges tan maong.” (Mateo 5:45) Say sakey nin panangitandoro ed si Jehova bilang sakey ya agmanangibiig a Dios, pinaneknekan nen Pedro: “Agto labay a wala so siopaman a natawtaw noag ingen amin komon nagegemtan da so panagsibkel.”​—2 Pedro 3:9.

Diad agew nen Noe, sanen “say kabaglan na too ed dalin abalbaleg tan mauges labat a lanang so amin a pimorekdek na nonot tan puso to,” intalaga nen Jehova a naderal iman a mundo na katooan. (Genesis 6:5-7, 11, 12) Anggaman ontan, diad ganggan na Dios tan ed sigpot a pakaimano na saray kapanaonan to, amaalagey si Noe na biong. Legan ya ipapaalagey to tan saray ilalak to so biong, si Noe met so “sakey a managpulong na katunongan.” (2 Pedro 2:5) Anggaman amta nen Jehova so marelmeng a kiling na puso na saman a kailalakan, diad agmanangibiig a paraan sikatoy angipasabi na malinew a mensahe ed sikara. Sinagyat to so kaisipan tan kapusoan da diad pamapaalagey tan panpupulong nen Noe. Walaan ira na amin a pankanawnawa pian onkiwas, balet imbes “agda akabkabatan angga ed sinmabi delap et inyanor to ra ya amin.”​—Mateo 24:39.

Agaylan ekselintin uliran na agpanangibiig nen Jehova! Diad sarayan maatap a kaunoran ya agew, satan so mamapakiwas ed saray ariripen nen Jehova a mangiproklama na maong a balita na Panarian tekep met na miparan agpanangibiig. Sakey ni, ag-ontutundan mangidedeklara ed agew na panangibales nen Jehova. Diad paraan a sigpot a naimano na publiko, andiay panangibiig ya ipaparungtal da so mensahe nen Jehova pian narengel na amin.​—Isaias 61:1, 2.

Ipapatnag na saray sipan nen Jehova ed saray patriarkan di Abraham, Isaac, tan Jacob a sikatoy agmanangibiig a Dios. Diad panamegley na espisipikon kapolian da et onsabi so aturon Sakey a diad panamegley to ‘amin a nasyon ed dalin so maseguron nabendisyonan ed inkasikara.’ (Genesis 22:18; 26:4; 28:14) Apaneknekan a si Kristo Jesus itan ya aturon Sakey. Diad panamegley na impatey tan inkioli nen Jesus, intarya nen Jehova so dalan na kilalaban parad amin a matulok a katooan. On, saray gungguna na dondon bagat nen Kristo so nayarin panggayagaan ya andiay panangibiig.

Diad saray agew nen Moises, impatnag a mismo na agpanangibiig nen Jehova diad sakey a talagan sankakanaan a paraan a manasaglawi ed saray anak a bibii nen Salfaad. Baleg so problema na sarayan limaran bibii nipaakar ed tawir nen ama ra ed Insipan a Dalin. Saya so tua lapud kaugalian ed Israel a say tawiren a dalin et nipasa ed ananak a lalaki na sakey a too. Balet, inatey si Salfaad ya andian na pangipatawiran ya anak a laki. Kanian intupleg na saray limaran anak a bibii nen Salfaad ed si Moises so kerew da parad agmanangibiig a tratamento, a kuanda: “Akin ta et naekal kasi so ngaran nen ama mi ed saray pamilya to, lapu ed sikato et anggapo nen saman so laki ya anak to? Itdan mo kami pikayarianan mi ed saray agagi nen ama mi.” Tinalineng nen Jehova iray kerew da tan binilin to si Moises: “No say sakey a too et ompatey tan anggapo so laki ya anak to, yawat yo ed satan so tawir ed bii ya anak to.”​—Numeros 27:1-11.

Agaylan maaro tan agmanangibiig a pangaligan! Pian nipaseguron agnipasa so tawir na tribu ed sananey a tribu sano miasawa iray anak a bibii, sikaray kinaukolan a miasawa lambengat ed “baranggay [tribu, NW] na pamilya na ama ra.”​—Numeros 36:5-12.

Nanengneng ni so nagkalalon aralem a pakatalos ed agpanangibiig nen Jehova diad saray agew nen ukom tan propetan si Samuel. Ginanggan nen Jehova a lanaan to so sakey a balon ari ed tribu na Juda diad pamilya nen Jesse a taga-Bethlehem. Balet waloray ilalak a lalaki nen Jesse. Siopa so nalanaan bilang ari? Nandinayewan nen Samuel so inkataraki nen Eliab. Balet, agnapalikdo si Jehova ed akinpaway ya ereng. Inkuan to ed si Samuel: “Agmo nengnengen so lupa to, no say kaatagey na kabalgan to . . . Si Jehova onnengneng ya aliwa a singa too ya onnengneng, ta say too onnengneng ed mapaway a nengneng, balet si Jehova onnengneng ed puso.” Si David, say sankayogtanan ya ilalak a laki nen Jesse, so apili.​—1 Samuel 16:1, 6-13.

Pakaaral Manlapud Agpanangibiig nen Jehova

Makagungguna ed Kristianon mamatatken so pangalig da ed si Jehova diad inengneng ed espiritual iran kualidad na sakey a kapananisiaan. Mainomay so pangukom ed sakey unong ed dili tayoran estandarti, ya abuloyan na satan a naapektoan na liknaan tayo so desisyon tayo. Singa inkuan na sakey a matatken, “Panggugunaetan ko a pidenengan so arum diad paraan a mamaliket ed si Jehova, ya agnibase’d dilin akauna la iran ideyak.” Agaylan makagungguna parad amin ya ariripen nen Jehova ya usaren so Salita to bilang estandarti ra!

Saray asalambit la ya alimbawa ed Biblia so ontutulong ed sikatayon naresistian so linmamot iran liknaan ed rasa odino nasyonalistikon panangidumaduma. Diad pangaalig ed agpanangibiig nen Jehova, nasasalimbengan tayo so Kristianon kongregasyon manlapud panangidumaduma, panaglabi, tan paboritismo.

Naaralan nen apostol Pedro a “say Dios anggapo so pangiduma to.” (Gawa 10:34) Kalaban na paboritismo so agpanangibiig tan susumlangen to so prinsipyo na aro tan pankakasakey. Asibegan nen Jesus so duruka, makapuy, tan mapaabeba, tan pinalemew toy awit da. (Mateo 11:28-30) Sankapatnag so pidumaan to ed Judion relihyoson papangulo, a pakakatawan ed totoo, a papasakbatan ira na ambebelat ya awit a totontonen. (Lucas 11:45, 46) Say panggawa ed satan tan say pangipanengneng na paboritismo ed saray mayaman tan prominenti so maseguron agmitunosan ed saray bangat nen Kristo.​—Santiago 2:1-4, 9.

Natan, manpapasakop iray Kristianon mamatatken ed inkaulo nen Kristo tan ipapanengneng so agpanangibiig ed amin a dedikadon totoo nen Jehova. Legan a sikara so ‘mamapastol ed pulok na Dios ed panangasikaso ra,’ sikaray ompaliis manlapud panangipanengneng na paboritismo lapud ekonomikon kipapasen, pandurumaan ed personalidad, odino siglaotan ed pamilya. (1 Pedro 5:2) Diad pangaalig ed agmanangibiig a Dios tan itatalineng ed panamasakbay to sumpad saray kiwas na paboritismo, idadalangirang na Kristianon mamatatken so espiritu na agpanangibiig diad kongregasyon.

Say Kristianon kongregasyon na Tastasi nen Jehova so sakey ya internasyonal ya impanaagi. Satan so mabilay ya ebidensia a say bulos ed panangidumaduma, agmanangibiig a sosyedad so magmaliw ya inkapeteg diad silong na panangiwanwan nen Jesu-Kristo. Saray Tastasi so ‘angisulong ed balon personalidad a satan so pinalsa unong ed linawa na Dios diad tuan inkatunong tan katooran.’ (Efeso 4:24) On, makakaaral ira manlapud ayadyarin alimbawa na agmanangibiig a Dios, si Jehova, tan walaan na ilalon magnayon a bilay diad balon mundo a bulos ed amin a panangibiig.​—2 Pedro 3:13.

[Paimano ed leksab]

[Litrato ed pahina 26]

Naaralan nen apostol Pedro a say Dios so agmanangibiig