Kasin Nanonotan Yo?

Naapresia yo ta’n binasa so agano niran paway na Say Panag-Bantayan? Sirin, imanoen no naebatan yo so onggendan a tepetepet:

◻ Anto so manunan gagalay edukasyon parad sakey a Kristianon tobonbalo?

Say manunan gagalay edukasyon et say panginlong ed tobonbalon magmaliw ya epektibon ministro nen Jehova. Tan say sankaimportantian ya edukasyon ed amin et say espiritual ya edukasyon.​—8/15, pahina 21.

◻ Antoray rason ed pangipaamta’d seryoson gawan-mauges na kaparan Kristiano ed saray mamatatken?

Sakey a rason ed panangipaamta’d gawan-mauges et pansiansiaen toy inkadalisay na kongregasyon. Sananey nin rason ed panggawa’d satan et sakey a gawa na Kristianon aprinsipyoan ya aro a nipanengneng ed Dios, ed kongregasyon, tan ed say managgaway-mauges.​—8/15, pahina 28, 30.

◻ Anto so kabaliksan na pagmaliw a “sinononot lawas ed isabi agew nen Jehova”? (2 Pedro 3:12, NW)

Kabaliksan ton agtayo ipupulisay ed kanonotan tayo so “agew nen Jehova.” Agtayo nepeg a lingwanan ya asingsingger lay agew a deralen nen Jehova so sistema na sayan bengatla. Nepeg a magmaliw itan a tudtua ed sikatayo a sankanengneng tayo itan a malinlinew, a kuanmono walad arapan tayo. (Sofonias 1:7, 14)​—9/1, pahina 19.

◻ Akin a say kaunoran iran agew na sayan sistema so nambayag ni nen say inilaloan na dakel?

Ikokonsidera nen Jehova no antoy pankaabiganan na amin a sankatooan. Say pampapagaan to et say bilay na totoo. (Ezequiel 33:11) Makapanmatalek tayo a say anggaan so onsabin dugaruga ed panaon pian nasumpal so gagala na makabat-ed-amin tan maaron Manamalsa tayo.​—9/1, pahina 22.

◻ Panon a napansiansia so gayaga na saraman so walad sigpot-panaon a serbisyo anggaman nipaarap ira ed saray problema?

Kaukolan dan nonoten iray kinarakel na bendision da tan bidbiren a nilibo iray manasagmak na mas graben pakakairapan. (1 Pedro 5:6-9)​—9/15, pahina 24.

◻ Anto so kalat nen William Tyndale diad pangipatalos ed Biblia?

Say kalat nen Tyndale et pian napawalay Kasulatan ed kaslakan a pansasalita na too ya eksakto tan simpli no posibli.​—9/15, pahina 27.

◻ Panon tayon nipanengneng a sikatayoy matoor a manangiyalibansa na Salita na Dios?

Nipanengneng tayoy katooran tayo ed Salita na Dios diad siseseseg a pangipulong ed satan ed arum. Bilang managbangat, kaukolan tayon usaren a siaalwar so Biblia, ya agbalot pikeweten itan odino inatnat ed no antoy ibabaga to pian itukoy iray ideya tayo. (2 Timoteo 2:15)​—10/1, pahina 20.

◻ Panon a paleteyen na say makasamal ya espiritu na mundo so integridad tayo?

Paleteyen na espiritu na mundo so integridad tayo diad agtayo pankontento ed no antoy wala la’d sikatayo tan pampagaen to itayo’d saray dilin pankaukolan tan intereses tayo nen say Dios. (Ikompara so Mateo 16:21-23.)​—10/1, pahina 29.

◻ Anto so kabaliksan na panlingkor ed si Jehova ya intiron-kamarerwa?

Tutukoyen na “kamarerwa” so intiron persona, pati amin a pisikal tan mental iran abilidad to. Say panlingkor ya intiron-kamarerwa ed si Jehova et kabaliksan toy pangitalaga na inkasikatayo, ya uusaren so amin a pakayari tan biskeg tayo ed sankasigpotan a laknab diad serbisyo ed Dios. (Marcos 12:29, 30)​—10/15, pahina 13.

◻ Anto so tombok ed pagmaliw a too a walaan na maridios a prinsipyo?

Say tombok et say peteg a pangamta ed si Jehova, saray panlabayan to, agto panlabayan, tan saray gagala to. Sano uleyan na sarayan prinsipyo a misiglaotan ed Dios so bilay tayo, bilang resulta et magmaliw iratan a mabilay a prinsipyo. (Jeremias 22:16; Hebreos 4:12)​—10/15, pahina 29.

◻ Saray ariripen nen Jehova so walaan na anton asimbang ya iyaasingger no nipaakar ed pananguley na totoo?

Sikaray neutral ed politikal iran pamaakaran lapud manlilingkor ira bilang embahadores odino manangilaman na Panariay Dios. (2 Corinto 5:20) Diad biek a dapag, sikara so manpapasakop unong ed konsiensia ed saramay walad autoridad.​—11/1, pahina 17.

◻ Anton leksion so naaralan tayo manlapud kurson inala nen propeta Eliseo?

Sanen naimbitaan ed espisyal a serbisyo a kaibay Elias, tampol a tinaynan nen Eliseo so uma to pian manlingkor ed si Elias, anggaman arum ed kimkimey to et melag labat. (2 Arari 3:11) Arum ed saray ministro na Dios natan so mangipapatnag na parehon espiritu na dilin-panagsakripisyo diad panaynan ed anapan day panbilay pian ipulong so maong a balita ed arawi iran teritorya.​—11/1, pahina 30, 31.

◻ Anton makagunggunan konseho so lugan na sulat nen Santiago?

Ipapanengneng to ed sikatayo no panon tayon arapen iray subok, kokonsehoan to itayo sumpad paboritismo, tan papasesegen to itayo diad maptek iran gawa. Papasesegen itayo nen Santiago a kontroley dila, resistiay minumundon impluensia, tan iyalibansay kareenan. Ontulong met ed sikatayo iray salita to pian magmaliw a maanos tan mapikasi.​—11/15, pahina 24.

◻ Akin a si Jehova so ‘akaparaan a mamerdona’? (Salmo 86:5)

Sipaparaan si Jehova a mamerdona lapud agto lilingwanan a sikatayo et pinalsa ed dabok, walaan na saray kakabosan, odino kakapuyan, bilang resulta na ag-inkayadyari. (Salmo 103:12-14)​—12/1, pahina 10, 11.

◻ Akin a mabulos tayon perdonaey arum?

No agtayo perdonaey arum anta walay basiyan na panangasi, satan so mangapektan maong ed dilin relasyon tayo ed Dios. (Mateo 6:14, 15)​—12/1, pahina 17.