Panaanap ed Napanmatalkan Iran Prediksion

KAYARIN tuloy na inkitrono na ari na Macedonia ya akabatan bilang Alejandro a Baleg nen 336 K.K.P., pinasyar toy templo na Delphi a walad sentral a Gresya. Anggapo lay arum a planon piugagep to ed arapen noagta say pangonkesta ed dakel a pasen ed mundo diad saman a panaon. Balet ta pinirawat to so madibinon panamaseguro pian ontalona so abalbaleg a gawaen to. Unong ed alamat, diad samay agew na impasyar to ed Delphi, agnayarin tuplegan so managpalbeng. Lapud agto labay so onalis a paoy-paoy, impilit nen Alejandro, a pinaskar ton mangipalbeng so saserdoten bii. Kinmelyaw so saserdoten bii ed inkadismaya: “Oh, balolaki, agka natalo!” Inawat itan na malangwer ya ari bilang paborablin signos​—sakey a mamapailaloy pambiktorya diad kampanya ed militar.

Balet, naamtaan komon a nagkalalo nen Alejandro so nipaakar ed pansumpalan na kampanya to no inusisa to la iray propesiyan naromog ed libroy Biblia a Daniel. Tekep na makatantandan inkasusto, impasakbay na saratan so maples iran pangonkesta to. Unong ed tradisyon, awalaan si Alejandro na pankanawnawa ed kaunoran pian nanengneng so inrekord nen Daniel nipaakar ed sikato. Unong ed Judion manag-awaran a si Josephus, sanen linmoob so ari na Macedonia diad Jerusalem, nipanengneng ed sikato so propesiya nen Daniel​—anganko et say kapitulo 8 na satan a libro. (Daniel 8:5-8, 20, 21) Unong ed report, aliktar so syudad ed makadesyang iran armada nen Alejandro makasengeg ed saya.

Sakey a Nikasiporan a Pankaukolay Too

Ari man odino kabanyakan, kadaanan man odino moderno​—say too so mankaukolay napanmatalkan iran prediksion nipaakar ed arapen. Bilang matudio iran pinalsa, aaralen tayon totoo so agawa’d apalabas, sikakabat ed kaplesan, tan nagkalalo lan interesado ed arapen. Matukotukoy so inkuan na proverbioy Tsino: “Siopaman a nayarian ton amtaen la iray nagawa taloy agew ni so onlabas et onyaman ed loob na nilibon taon.”

Diad inlabas na saray panaon, sinali la na minilyon so manusisa nipaakar ed arapen diad itupleg ed natatalosan dan manlalapud Dios. Alaen pan alimbawa iray kadaanan a Griego. Walaan iray dakel a sagradon templo, a singa samay walad Delphi, Delos, tan Dodona, a lalaen da pian ontupleg ed dirios da nipaakar ed saray nagawa ed politika odino militar ontan met ed personal iran pamaakaran a singa say pambiahe, panangasawa, tan ananak. Aliwan saray arari tan lider na militar lambengat noagta intiro iran tribu tan nasasakopan na saray syudad so manaanap na panangigiya a manlapud saray ayaman na espiritu diad panamegley na sarayan orakulo.

Unong ed sakey a propesor, wala natan so “biglan indakel na saray organisasyon a nitalaga pian manaral nipaakar ed arapen.” Ingen, lablabayen na dakel ya ibaliwalay alenleneg a suston lapuay propesiya​—say Biblia. Butarbutar dan impulisay so antokaman a posibilidad a lugan na saray propesiya na Biblia so mismon impormasyon ya aanapen da. Ontanlay impakalingo ni ingen na arum ya iskolar diad impangipara ra ed propesiya na Biblia ed saray prediksion ya inter na saray managpalbeng nensaman. Tan maslak a susuppiaten na saray manduaruwa ed modernon panaon so propesiya na Biblia.

Imbitaan mi kan manusisan mismo ed rekord. Antoy ipaparungtal na maalwar a panangikompara ed saray prediksion na Biblia tan saray orakulo na totoo? Napanmatalkan mo kasi so propesiya na Biblia nen say kadaanan iran orakulo? Tan kasin napanpiyaan mo iray propesiya na Biblia a pangisentroan moy bilay mo?

[Litrato ed pahina 3]

Impasakbay na Biblia so maples iran pangonkesta nen Alejandro

[Credit Line]

Cortesía del Museo del Prado, Madrid, Spain

[Litrato ed pahina 4]

Alejandro a Baleg

[Credit Line]

Musei Capitolini, Roma

[Picture Credit Line ed pahina 2]

COVER: General Titus and Alexander the Great: Musei Capitolini,Roma