Krismas Diad Bukig
• MANGA DUANLASUS TAON LAY APALABAS, sakey a prominentin iskolar a Koreano so binmisita ed Peking, Tsina. Diad intangay to ed painting ed gubida na sakey a katedral, anengneng toy eksena a si Maria et sankaegnaan toy ugaw a Jesus. Onia so inkuanto nipaakar ed sayan makapabiglan painting:
“Sankaakwal na sakey a bii so maletletey ya ugaw, a mantaon na limara odino anemira. Ompatnag ya agnitangwa na bii so ulo to, singa agto nitepel a nengnengen so anak to lapud nakakasian to. Tan diad banda’d beneg da et walay amayamay ya anyani tan ugugaw a de-payak ya ontetekkiab. Diad panatangay ko ed saratan et singano ra ompata ed siak ya agnataltalaranan. Lapud inkabiglak et sasampaten ko ra.”
ABAYAG lan agawa itan kayarin ginmapo so Panagreporma diad Europa, abayag la kayari na mauddiem a panaon na Kapegleyan iran Panaon. Balet parad maslak a taga-Bukig, say Inkakristiano so aliwan bantog a singa say painting a mismo. Agaylan nauman la itan a kipapasen! Kada tiempoy Krismas, nipapanengneng iray eksena nipaakar ed ugaw a Jesus. Kabisado la na saray taga-Bukig iratan ya eksena, tan dakel a karsada diman natan et singa met la ed saramay diad Europa.
Nen labi na Nobyembre 25, 1998, sakey bulan ni antis na Krismas, say Champs Élysées ed Paris so maliwliwawan sinilewan na masulok a 100,000 a bombilya diad 300 a kakiewan ya atalunton ed satan a balitadon abenida. Mipadpara, diad karsada na downtown ed Seoul, Korea, sakey ya abalbaleg a Christmas tree so imparayag na baleg a department store tan nanliwawa ed labi diad satan a kabiseran syudad. Ag-abayag et saray karsada diman so inadornoan na saray dekorasyon ed Krismas.
Inagew-agew ya angipalabas so telebisyon, radyo, tan saray peryodiko na saray programan misiglaotan ed Krismas. Lapud asagyat ed kipapasen na Krismas, say intiron bansa so akibiang ed panangabrasa ed sampot na taon. Saray simbaan ed Seoul, a pigara ed saratan so akasurprisaan na dakel a bisita, so inapuran dinekoraan. Diad ontan, say Korea tan arum nin bansa ed Bukig so inimpluensiaan na espirituy Krismas a nagagawa ed panaon a pangiseselebra na Estados Unidos ed Agew na Pisasalamat a selebrasyon ed pansamposampot na Nobyembre.
Maslak a bansa na Bukig so ag-ikokonsideran kabiangan na Kakristianoan. Singa bilang, 26.3 porsiento labat na populasyoy Korea so mankuan a Kristiano. Diad Hong Kong 7.9 porsiento, diad Taiwan 7.4 porsiento, tan diad Hapon 1.2 porsiento labat. Malinew, maslak a taga-Bukig so agmangaagamil na Inkakristiano, balet ompatnag ya agda susuppiaten so panagselebray Krismas. Diad tua, ompatnag a mabetbet iran mas maseseg nipaakar ed satan nen saray taga-Sagur. Singa bilang, say Hong Kong so balitado lapud pirmin panagselebra to ed Krismas, anggaman maslak ed saray manaayam ditan et balanglan Budhista odino Taoista. Anggan diad Tsina, a wala labat lay 0.1 porsiento a mankuan a Kristiano, et maples ya ompopopular so Krismas.
Akin ya ontanlan malaknab a seselebraan so Krismas diad Bukig? Akin a saray totoon agmangawat ed si Kristo bilang say Mesias et mibibiang ed panagselebray Krismas, a momoriaen na maslak a mankuan iran Kristiano bilang agew na inkianak to? Nepeg kasin aligen na saray tuan Kristiano so panmoria ra ed Krismas? Naamtaan tayo iray ebat legan tayon konsideraen no panon a nagmaliw a popular so Krismas ed Korea, ya abayag lan bansa na Bukig.