Imanoen so Propesiya nen Daniel!

Katuloyan na Kapitulo Tres

Asubok​—Balet ta Nanmatoor ed si Jehova!

Say Aralem a Pakatalos tan Kakabatan Imbes a Saray Kakanen tan Alak

27, 28. Diad antoran paraan a say sistematikon totontonen a tinulok di Daniel tan saray taloran kaaro to et sakey a preparasyon parad babaleg iran bengatla ed arapen?

²⁷ Say samploran agew et impanubok labat, balet ta makakombinsin tuloy iray resulta. “Dia ed ontan say mayurdomo inekal to so saray kanen da, tan say alak ya inumen da, tan initdan to ra na pising.” (Daniel 1:16) Aliwan mairap ya isipen no antoy panmoria na arum a tobonbalo a nipapasal met nipaakar ed di Daniel tan saray kaiba to. Singa kabaglan parad sikara so ag-impangawat ed kakanen na ari lapu labat ed pisipising. Balet magano lan nagaway pakasubokan tan pakasalsalian, et saraya so mankaukolay sigpot ya inkaalerto tan inkakalmado ed biang na saray kalangweran a Hebreo. Nagkalalo ed amin, say pananisia tan panmatalek da ed si Jehova so ontulong ed sikaran naliktaran daray subok ed pananisia ra.​—Ikompara so Josue 1:7.

²⁸ Say ebidensia ya aantabayan nen Jehova irayan kalangweran so napatnagan ed onggendan a balikas: “Nipaakar ed saraya ya apat a tobonbalo, say Dios initdan to ra na pakatalos tan karunongan dia ed amin ya aral tan kakabatan: et si Daniel walaan na pakatalos dia ed saray amin a pasingawey tan saray kugkugip.” (Daniel 1:17) Pian natalonaay onsabin mairap iran panaon, mas kaukolan day aliwa labat lan kasil na laman tan maabig a bunigas. “Say kakabatan onloob naani ed pusom, tan say pakatalos makapaliket naani ed kamarerwam; say kalakal sikato naani bantay ed tagey mo; say pakatalos sikato naani mangyagel ed sika: pian ilaban to ka a manlapu ed saray totoo a mansalita na makaderal a bengabengatla.” (Uliran 2:​10-12) Eksakton ontan so impagamor nen Jehova ed sarayan apatiran matoor a tobonbalo pian nakinlongan ira ed nagawa’d arapen.

29. Akin ya ‘atalosan [nen Daniel] so amin a nengneng na pasingawey tan kugkugip’?

²⁹ Nikuan a si Daniel et “walaan na pakatalos dia ed saray amin a pasingawey tan saray kugkugip.” Agto labay ya ibagan sikatoy nagmaliw a psychic. Makapainteres, anggaman nipasen si Daniel bilang sakey ed saray matalonggaring a propetan Hebreo, sikatoy ag-apuyanan a mangibesngaw na saray panangiyabawag a singa say “onia so kuan nan Katawan a Jehova” odino “onia so kuan nen Jehova na saray ehersito.” (Isaias 28:16; Jeremias 6:9) Balet, diad panangiwanwan labat na masanton espiritu na Dios ya atalosan tan nipatalos nen Daniel iray pasingawey tan kugkugip ya angiparungtal ed gagala nen Jehova.

Say Mairap a Subok ed Kaunoran

30, 31. Panon a say kurang a pinili di Daniel tan saray kaiba to so talagan makagungguna ed sikara?

³⁰ Say taloy taon ya impangibangat tan impangondisyon so asumpal. Insan tinmumbok so mairap subok​—say personal a pituyaw da ed ari. “Kayari na saray agew a tinandaan na ari a nipaakar ed pangyarap ed sikara, say prinsipe na saray eunuko inyakar to ra ed arap nen Nabucodonosor.” (Daniel 1:18) Panaon lay pikuentaan na saray apatiran tobonbalo. Kasin say pangunor ed saray ganggan nen Jehova, imbes ya ontulok ed saray paraan na Babilonia, so peteg a makagungguna ed sikara?

³¹ “Say ari akisalita ed sikara; tan dia ed nanleleetan da ya amin anggapo so aromog a singa si Daniel, si Ananias, si Misael, tan si Azarias; kanian nanalagey ira ed arap na ari.” (Daniel 1:19) Agaylan sigpot ya inkiyalangon na inkiwas da ed apalabas a taloy taon! Aliwan kabaglan ed biang da so pansiansia ed sistematikon totontonen ya indikta na pananisia tan konsiensia ra. Lapud impagmaliw dan matoor anggaman ed singa ag-importantin bengatla, abendisionan si Daniel tan saray kaaro to na angkakabaleg iran bengatla. Say pribilihyon ‘manalalagey ed arap na ari’ so pinilalek na amin ya impasal a kalangweran. Anggapoy ibabaga na Biblia no kasin saray apatiran Hebreon tobonbalo lambengat so pinili. Antokaman a kipapasen, say matoor a kurang da so talagan angiter ed sikara na “baleg a tumang.”​—Salmo 19:11.

32. Akin et nibaga tayon nanggayagaan di Daniel, Ananias, Misael, tan Azarias so sakey a pribilihyo a babaleg nen say inkiwala ra ed duypo na opisyales na ari?

³² “Nanengneng mo so sakey a too a makuli ed saray kimey to? Sikato onalagey naani ed arap na saray arari,” so kuan na Kasulatan. (Uliran 22:29) Kanian si Daniel, Ananias, Misael, tan Azarias so pinili nen Nabucodonosor ya onalagey ed arap na ari, salanti, pian napibilang ed maarin duypo na opisyales. Diad amin na saya, natalosan tayo ya imamaneobra nen Jehova iray pamaakaran ta pian diad panamegley na sarayan kalangweran, nagkalalo la’d si Daniel et nipakabat iray importantin aspekto na madibinon gagala. Anggaman sakey a kagalangan so inkapilin kabiangan na maarin duypo na opisyales nen Nabucodonosor, lalon kagalangan so kausar ed ontan a makapakelaw a dalan na say Ari ed Uniberso, si Jehova.

33, 34. (a) Akin a mandinayew so ari ed saray kalangweran a Hebreo? (b) Anton leksion so nagamoran tayo manlapud eksperiensia na apatiran Hebreos?

³³ Naamtaan a siansia nen Nabucodonosor a say impagamor nen Jehova a kakabatan tan aralem a pakatalos ed sarayan apatiran Hebreon tobonbalo so mas superyor nen say niwala’d amin a mananimbawa tan makabat a lalakin kaiba ed duypo na opisyales to. “Dia ed amin a pamaakaran na kakabatan tan pakatalos, ya akibalitaan na ari ed sikara, aromog to ra a maminpolo a magmaong nen saray amin a mago tan mangkukulam a wala ed amin a nanarian to.” (Daniel 1:20) Panon ya ontan? Saray “mago” tan “mangkukulam” so nanmatalek ed ordinaryo tan maaniton aral na Babilonia, bangta si Daniel tan saray kaaro to so nanmatalek ed kakabatan a manlapud tagey. Agdan balot naparengan, nisay nadaeg!

³⁴ Agtanto anguman iray bengatla ed inlabas na panaon. Nen inmunan siglo K.P., sanen popular so Griegon pilosopiya tan ganggan na Romano, si apostol Pablo so apuyanan ya angisulat: “Say karunongan na sayan mundo kakulangkulangan ed Dios. Ta nisulat, Sikato erelen to so saray makabat ed kasiliban da: Tan aminsan lamet, Say Katawan amta to so kanonotan na saray marunong, a mapangta ra. No ontan sirin anggapo komoy siopaman ya ongloria ed saray totoo.” (1 Corinto 3:​19-21) Natan, kaukolan itayon ombemben a malet ed imbangat ed sikatayo nen Jehova pian agmainomay a naayat ed makaroyroyo tan makapaayat ed mundo.​—1 Juan 2:​15-17.

Matoor Anggad Anggaan

35. Kaunongay nibaga ed sikatayo nipaakar ed taloran kaiba nen Daniel?

³⁵ Mabitabitar a niyilustra diad Daniel kapitulo 3 so mabiskeg a pananisia di Ananias, Misael, tan Azarias nipaakar ed binalitokan ya imahen nen Nabucodonosor a walad patar na Dura tan say subok ed manliob a palbaan. Sarayan matakot ed Dios a Hebreo so talagan nansiansian matoor ed si Jehova anggad impatey da. Kabisado tayo iya lapud andi-duaruwan sikaray tinukoy nen apostol Pablo sanen insulat to a “lapu ed pananisia . . . inerep da so biskeg na apoy.” (Hebreos 11:​33, 34) Sikaray matalonggaring ya alimbawa parad saray lingkor nen Jehova, a malangwer man odino matakken.

36. Anto so matalonggaring a karera nen Daniel?

³⁶ Nipaakar ed si Daniel, say manangisaran bersikulo na kapitulo 1 kuanto: “Si Daniel nansiansia angga ed inmuna a taon nen ari Ciro.” Ipaparungtal na awaran a binagbag nen Ciro so Babilonia ed sakey labi, nen 539 K.K.P. Mapatnag a lapu ed reputasyon tan talindeg to, si Daniel so nantultuloy a nanlingkor ed duypo na opisyales nen Ciro. Diad tua, inkuan ed sikatayo na Daniel 10:1 a “dia ed komatlo a taon nen Ciro ya ari na Persia,” imparungtal nen Jehova so makatantandan bengatla ed si Daniel. No sikato so tin-edyer sanen sikatoy inawit ed Babilonia nen 617 K.K.P., nayarin ngalngali la 100 so taon to sanen naawat to itan ya unor a pasingawey. Agaylan karukey tan abenditon karera na matoor ya impanlingkor to ed si Jehova!

37. Antoran leksion so nagamoran tayo manlapud impangonsidera ed Daniel kapitulo 1?

³⁷ Aliwa labat lan istorya na apatiran matoor a kalangweran a matalonan inmarap ed saray subok na pananisia so ibabaga na manangilukas a kapitulo na libro a Daniel. Ipanengneng na satan ed sikatayo no panon ya usaren nen Jehova so anggan siopa a kaliktan to pian nasumpal so gagala to. Papaneknekan na salaysay a no iyabuloy nen Jehova, say ompatnag a pakarisgoan et onkanan mausausar. Tan ibabaga na satan ed sikatayo a say inkamatoor ed melag iran bengatla et mangitarok na baleg a tumang.

Anto so Atebek Yo?

• Anto so nibaga tayo nipaakar ed nanlapuan nen Daniel tan saray taloran kalangweran a kaaro to?

• Panon ya asubok so maabig ya impamabaleg ed apatiran Hebreon tobonbalo?

• Panon a tinumangan nen Jehova so apatiran Hebreo ed makpel a talindeg da?

• Antoran leksion so naaralan na saray lingkor nen Jehova natan manlapud si Daniel tan saray taloran kaiba to?