Kasin Naaandi lay Kabaliksan na Salitan “Kristiano”?

ANTO ta so kabaliksan na pagmaliw a sakey a Kristiano? Panoy pangebat mo? Ontan so intepet ed saray totoo ed nanduruman bansa, tan nia so pigara ed saray ebat da:

“Pian tumboken tan aligen si Jesus.”

“Pian magmaliw a maong a too tan manginabang ed arum.”

“Pian panisiaan si Kristo bilang Katawan tan Manangisalba.”

“Pian mimisa, manrosaryo, tan mankomunyon.”

“Agko panisiaan a kaukolan mo ni so onla ed simbaan pian magmaliw a Kristiano.”

Anggan saray diksyonaryo so mangiiter na dakel a makawetwet iran kabaliksan. Diad tua, sakey a reperensia so walaan na samploran kabaliksan ed silong na salitan “Kristiano,” a saknapen toy manlapud “panisia ed odino kabiangan na relihyon nen Jesu-Kristo” anggad “desenti odino maong a too.” Agpankelawan a dakel so naiirapan a mangipaliwawa ed no antoy kabaliksan na pagmaliw a sakey a Kristiano.

Malukak a Kurang na Kaslakan

Natan, diad limog na saray mankuan a Kristiano​—anggan ed limog na saramay mimimisa​—naromogan na sakey so malaknab iran panmoria ed saray teman singa say impangipuyan na Dios ed Biblia, say teorya na ebolusyon, say pibabali na relihyon ed politika, tan say pananginabang na pananisia na sakey ed arum. Saray isyu nipaakar ed moral, a singa saray tema nipaakar ed aborsion, homoseksualidad, tan saray manaamong ya agkasal, so mabetbet a pansasangsangan. Say mabitar a kurang na kaslakan et malukak.

Singa bilbilang, agano nin imboto na sakey a tribunal na simbaan na Protestanti so pangiyalibansa ed kanepegan na sakey a relihyon “a mamili na baklan elder a mibiang ed saray membro na mananguley na satan,” so inreport na dyurnal a Christian Century. Insuheri ni ingen na saray pigaran teologo so panmorian say pananisia ed si Jesus et aliwan importanti ed kilalaban. Panisiaan dan saray Judio, Muslim, tan arum ni so “nayarin onla met ed tawen [a singa saray Kristiano],” so inkuan na report ed The New York Times.

Isipen mo pa labat, sakey a Marxist a mangiyaalibansa na kapitalismo odino makademokrasya a mangitatandoro na inkadiktador odino sakey ya environmentalist a manusuporta ed pakakakalbo na takel. “Satan a too so aliwan peteg a sakey a Marxist odino sakey a makademokrasya odino sakey ya environmentalist,” so ikuan mo​—tan susto ka. Ingen, sano konsideraen moy nanduruman panmoria na saray mankuan a Kristiano natan, naimanom iray sisiaen a mansusumlangan a tuloy tan mabetbet ya onkontra ed imbangat na Manangiletneg na Inkakristiano, si Jesu-Kristo. Antoy ibabaga na satan a nanduruman panmoria ed tawag dan Inkakristiano?​—1 Corinto 1:10.

Say pangipipilit ya umanen iray bangat na Kristiano pian ontukoy ed paraan na panag-isip ed saray panaon so walaan na abayag lan awaran, a singa imanoen tayo. Antoy liknaan na Dios tan si Jesu-Kristo nipaakar ed saratan a pananguman? Kasin walay kanepegan na saray relihyon a responsabli ed saray bangat ya agnanlapu ed si Kristo a tawagen day inkasikaran Kristiano? Sarayan tepet so nakonsidera ed ontumbok ya artikulo.