Imanoen so Propesiya nen Daniel!

Kapitulo Dose

Pinabiskeg na Mensahero na Dios

1. Panon ya abendisionan si Daniel lapud pirmin interes to ed kasumpalan na gagala nen Jehova?

ATUMANGAN a maong so pirmin interes nen Daniel ed kasumpalan na gagala na Dios. Sikatoy naikdan na makapasagyat a propesiya na 70 a simba nipaakar ed panaon na ipatnag na Mesias. Abendisionan met si Daniel ta anengneng toy impawil na matoor a nakdaan a kabaleyan to ed dalin da. Agawa itan nen 537 K.K.P, diad bandad unor na “inmuna a taon nen Ciro ari ed Persia.”​—Esdras 1:1-4.

2, 3. Akin ya ag-akiulop si Daniel ed saray Judion nakdaan diad dalin na Juda?

² Ag-akiulop si Daniel ed saramay pinmawil ed dalin na Juda. Nayarin nairapan lan manbiahe lapud masiken la. Antokaman so kipapasen, wala ni so pagawa na Dios ed sikato dima’d Babilonia. Duay taon lay linmabas. Insan, inkuan na salaysay ed sikatayo: “Dia ed komatlo a taon nen Ciro ya ari na Persia sakey a bengatla so nipuyan ed Daniel, a say ngaran to atawag a Beltsasar; et say bengatla sikato so tua, a sakey a baleg a bakal; et sikato atalosan to so bengatla, tan atalosan to so pasingawey.”​—Daniel 10:1.

³ Say “komatlo a taon nen Ciro” so mipetekan ed 536/535 K.K.P. Masulok a 80 taon lay linmabas sanen nitarok si Daniel dima’d Babilonia a kaiba iray maarin ilalak tan saray aristokrata a tobonbalo na Juda. (Daniel 1:3) No sikatoy tin-edyer ni labat sanen kasabisabi to diad Babilonia, nayarin ngalngali la 100 so taon to la ed saman. Agaylan abig so rekord na matoor ya impanlingkor to!

4. Anggaman masiken lay Daniel, anton makatantandan betang so ginawa to ed serbisyo ed si Jehova?

⁴ Anggaman masiken la, agni asumpal so serbisyo nen Daniel ed si Jehova. Diad panamegley to, paiyabawag ni na Dios so mapropetikon mensahe a makabkabaliksan. Satan a propesiya so onsabi angga ed panaon tayo tan manpatuloy. Pian niparaan si Daniel ed sayan kaaruman a kimey, walay ginawa nen Jehova parad si Daniel, a mamabiskeg ed sikato parad arapen a serbisyo.

Sengeg na Kapagaan

5. Antoran balita so nayarin nampagaan nen Daniel?

⁵ Anggaman agla akiulop si Daniel ed saray Judion nakdaan a pinmawil ed dalin na Juda, sikatoy interesadon maong ed nagagawa diad pinabpabli ton dalin. Unong ed saray balitan akasabi ed sikato, naamtaan nen Daniel ya aliwan marakep so nagagawa diman. Nipaalagey lamet so altar diman tan niletneg so pundasyon na templo diad Jerusalem. (Esdras, kapitulo 3) Balet onsusumpa iray kabangibang a nasyon ed say panagpaalagey lamet, tan getma ran sakitan iray pinmawil a Judio. (Esdras 4:1-5) On, seguradon dakel so bengatlan kapapagaan nen Daniel.

6. Akin ya agonigon si Daniel ed saray kipapasen diad Jerusalem?

⁶ Kabisado nen Daniel so propesiya nen Jeremias. (Daniel 9:2) Amta ton say pangipaalagey lamet ed templo diad Jerusalem tan say kipawil na tuan panagdayew diman so maapit a misiglaotan ed gagala nen Jehova nipaakar ed totoo To tan amin na satan so nasumpal sakbay na ipatnag na insipan a Mesias. Diad tua, baleg so pribilihyo nen Daniel ed impakaawat to na propesiya ed si Jehova nipaakar ed “pitomplo a simba.” Manlapud satan et atalosan ton onsabi so Mesias ed 69 a “simba” kayari na kipaway na ganggan a mangipawil tan mangipaalagey lamet ed Jerusalem. (Daniel 9:24-27) Balet, lapu ed pirmin inkaderal na Jerusalem tan nipaleen so panangipaalagey na templo, mainomay a natalosan no akin dismayado, maermen, tan agonigon si Daniel.

7. Antoy ginawa nen Daniel ed loob na taloy simba?

⁷ “Dia ed saraman ya agew siak, si Daniel, nanermen ak ed leleg na talora a simba,” kuan na salaysay. “Agak angan na masamit a tinapay, tan anggapo met so linmoob a laman odino alak ed sangik, tan agko met nilanaan a mogmo so inkasiak lanlamang, angga ed inkasumpal na amin a talora a simba.” (Daniel 10:2, 3) Abayag a maong so ‘taloy simba,’ odino 21 ya agew, ya impanermen tan impan-ayunal. Nayarin angangga itan diad “komaduamplo tan apat ya agew na unona a bulan.” (Daniel 10:4) Kanian, kalaktip ed impan-ayunal nen Daniel so Paskua, a ngingilinan ed koma-14 ya agew na unonan bulan, a Nisan, tan say ontumbok a pitoy-agew a piesta na andi-lebaduran tinapay.

8. Anton akadkaunan inkagawa ya akikasi si Daniel ed panangiwanwan nen Jehova, et antoy nansumpalan?

⁸ Mipadpara met so naeksperiensia nen Daniel diad akadkaunan okasyon. Diad satan a panaon, sikatoy akewkew ed kasumpalan na propesiya nen Jehova nipaakar ed 70-taon a pankibalatar na Jerusalem. Anto sirin so ginawa nen Daniel? “Inyarap ko so lupak ed Katawan a Dios,” inkuan nen Daniel, “ya anapen ko ed panamegley na pikakasi tan pankerew, pati panayunal tan abel a magaspang tan saray dapol.” Inebatan nen Jehova so pikakasi nen Daniel diad impangibaki To ed si anghel Gabriel, a walaan na mensahe ed sikato a pirmin akapasesegan to. (Daniel 9:3, 21, 22) Ontan met kasi so gawaen nen Jehova natan insan ikdan to lay Daniel na kakkaukolan ton panamaseseg?

Makapataktakot a Pasingawey

9, 10. (a) Iner so kawalaan nen Daniel sanen naawat toy pasingawey? (b) Deskribien so anengneng nen Daniel diad pasingawey.

⁹ Ag-adismaya si Daniel. Ibaga to ed sikatayo so ontumbok a nagawa, a kuanto: “Sanen wala ak ed gilig na baleg ya ilog, a sikato so Jidekel, intangay ko so saray matak, tan ninmengneng ak, et, nia, sakey a too a nankawes na lienzo, a saray banel to abalkesan ira ed pulos a balitok na Ufas.” (Daniel 10:4, 5) Say Jidekel so sakey ed apatiran ilog a nanlapud hardin na Eden. (Genesis 2:10-14) Diad kadaanan a Persia, Tigra so impanawag da ed Jidekel, a satan so nanlapuan na Griego a ngaran a Tigris. Say rehyon a walad baetan na satan tan say Eufrates so atawag a Mesopotamia, a mankabaliksay “Dalin a Walad Baetan na Saray Ilog.” Pekderan na saya a nen naawat nen Daniel iyan pasingawey, sikatoy wadman ni ed dalin na Babilonia, anggaman nayarin aliwan diad syudad na Babilonia.

¹⁰ Agaylan pasingawey so naawat nen Daniel! Mapatnag, aliwan ordinaryon too so anengneng to nen sikatoy tinmangwa. Oniay mabitar ya impaneskribe nen Daniel: “Say laman to lanlamang, niyaliling ed berilo, tan say lupa to singa nengneng na kirmat, tan saray mata to singa ra mandarlang a banuot, et saray taklay to tan saray sali to singa ra pinasileng a gansa, tan say bosis na saray salita to singa bosis na sakey a sankaraklan a totoo.”​—Daniel 10:6.

11. Antoy epekto na pasingawey ed si Daniel tan ed saray kaiba ton lalaki?

¹¹ Anggaman masnag so pasingawey, ‘ag-anengneng na lalakin kaibak so pasingawey,’ inkuan nen Daniel. Lapud agnipaliwawan rason, “sakey a baleg a panggiwgiw so naplag ed sikara, et sikara tinmaynan ira ya inmamot.” Kanian, bukbukor la nen Daniel ed gilig na ilog. Makapakelkelaw so nengneng na “saya a baleg a pasingawey,” kanian impatua to: “Anggapo so biskeg ya atilak ed siak; ta say kaligsaan ko so nagmaliw ed siak a kabulok, tan anggapo so apokpokan ko a biskeg.”​—Daniel 10:7, 8.

12, 13. Anto so impatnag na mensahero panamegley na (a) kawes to? (b) itsura to?

¹² Nengnengen tayo pan maong iyan nikadkaduman mensahero ya akataktakotan nen Daniel. Sikatoy “nankawes na lienzo, a saray banel to abalkesan ira ed pulos a balitok na Ufas.” Diad kadaanan ya Israel, gawa’d makulaney a linatop a lienzo tan abordaan na balitok, so balkes, efod, tan pektoral na atagey a saserdote, ontan met ed saray andukey a kawes na arum a saserdote. (Exodo 28:4-8; 39:27-29) Kanian, masanto tan magalang a betang so ipatnag na kawes na mensahero.

¹³ Nikelawan met si Daniel ed itsura na mensahero​—say mankaninag a singa alahas a laman to, say makalaram a sinag na lupa to, say ontalos a pakayari na ambalanga iran mata to, tan say kirlap na mabiskeg iran taklay tan salisali to. Makapataktakot met so malungog a bosis to. Malinew ya ipatnag na sayan amin a sikatoy makapanyari nen say too. Sayan “too a nankawes na lienzo” et anggapoy arum noagta say anghel a walaay atagey a rangko, sakey a manlilingkor diad masanton arapan nen Jehova, a sikatoy nanlapuan na mensahe.a

[Paimano ed leksab]

(Ituloy ed ontumbok a paway.)