Saray Manangasikaso tan Ministeryal a Lingkor Aturo ed Teokratikon Paraan
“Imanoen yo so inkasikayon dili tan say amin a pulok, a diad sikara et tinuro kayo na masanton espiritu bilang manangasikaso.”—GAWA 20:28, NW.
1, 2. Panon a nasusumpal so Isaias 60:22?
IMPASAKBAY la nen Jehova nensaman a walay makatantandan nagawa ed panaon na anggaan. Panamegley nen propetan Isaias et oniay nidalatdat: “Say daiset magmaliw naani a sanlibo, et say melag magmaliw naani a mabiskeg a nasyon: Siak, si Jehova, sikato naani gawaen ko a magano ed panaon to.”—Isaias 60:22.
2 Wala kasi so ebidensia a nasusumpal la natan iyan propesiya? On! Kaleganan na dekaday 1870, aporma so sakey a kongregasyon na totoo nen Jehova diad Allegheny, Pennsylvania, E.U.A. Manlapud satan a melag a grupo, samplon nilibo a kongregasyon so aporma tan ondarakel ed sankamundoan. Minilyon ed manangiyabawag na Panarian—sakey a mabiskeg a nasyon—so manlilimog natan ed masulok a 91,000 a kongregasyon ed 235 a daldalin ed intiron mundo. Andiay suppiat, saya so mamekder a papepelesen nen Jehova so katitipon na saray tuan managdayew sakbay ya ombetag so ‘baleg a kairapan,’ ya asingsingger lan nagawa.—Mateo 24:21; Apocalipsis 7:9-14.
3. Anto so kabaliksan na pakabautismoan ed ‘ngaran na Ama, say Anak, tan say masanton espiritu’?
3 Kayari na personal a dedikasyon da ed si Jehova, tan unong ed saray bilin nen Jesus, sarayan minilyon so abautismoan “ed ngaray Ama, tan say Anak, tan say espiritu santo.” (Mateo 28:19) Say kabaliksan na inkabautismoan da ed “ngaray Ama” et bibidbiren na sarayan dedikadon indibidual a si Jehova so mangatatawen ya Ama tan Manangiter na Bilay da tan manpapasakop ira ed inkasoberano to. Say inkabautismoan da ed ‘ngaran na Anak’ so mankabaliksan ya ipapaamta ra a si Jesu-Kristo so Mananondon, Lider, tan Ari ra. Bibidbiren da met so betang na masanton espiritu, odino aktibon puersa na Dios, a mangiwawanwan ed bilay da. Saya so mangipabitar ya abautismoan ira ed ‘ngaran na espiritu santo.’
4. Panon a naordinaan iray Kristianon ministro?
4 Diad inkabautismoan na saray balon babangatan, naordinaan ira bilang ministro nen Jehova a Dios. Siopa so nanordina ed sikara? Diad malaknab a paraan, saray salitan nikurit ed 2 Corinto 3:5 so onaplika ed sikara: “Say inkasusto mi [bilang ministros et] nanlapu ed Dios.” Anggapo lay pitamitam dan babaleg nin kagalangan nen say panordina ed sikara nen Jehova a Dios! Kayari na bautismo ra, mantultuloy iran ombulaslas ed espiritual bilang ministros na “maong a balita” daput no paiwanwan ira ed espiritu na Dios tan itultuloy dan iyaplika so Salita to.—Mateo 24:14; Gawa 9:31.
Aturo Ira ed Teokratikon Paraan, Aliwan ed Demokratikon Paraan
5. Kasin aturo iray Kristianon manangasikaso tan ministeryal a lingkor ed demokratikon paraan? Ipaliwawa.
5 Say maalwar a panagtalima na saray kualipikadon manangasikaso tan say maabig ya itutulong na saray ministeryal a lingkor so nakaukolan pian naasikaso iray espiritual a pankaukolan na ondarakel a bilang na saray aktibon ministro. (Filipos 1:1) Panon so impakaturo na saratan a maespiritual a lalaki? Aliwan diad panamegley na saray paraan ya uusaren ed Kakristianoan. Singa bilang, saray Kristianon manangasikaso so agtuturoen diad demokratikon paraan, salanti, diad panamegley na pambotos ed sikara na karaklan a totoo a mililimog ed kongregasyon da. Imbes, sarayan pananuro so gagawaen ed teokratikon paraan. Anto so kabaliksan na satan?
6. (a) Anto so tuan teokrasya? (b) Akin a teokratiko so impanuro ed saray manangasikaso tan ministeryal a lingkor?
6 Diad simplin panangibaga, say tuan teokrasya so uuleyan na Dios. Mabulos a manpapasakop iray Tastasi nen Jehova ed pananguley to tan mantutulongan ira pian nagawaan da so linawa na Dios. (Salmo 143:10; Mateo 6:9, 10) Say inkaturo na saray Kristianon manangasikaso, odino mamatatken, tan saray ministeryal a lingkor et teokratiko lapud say paraan na inka-rekomenda tan inkaturo na saratan a responsablin lalaki et gagawaen unong ed uksoyan na Dios a nidatak ed Masanton Kasulatan. Tan bilang say ‘ulo na amin,’ si Jehova sirin so walaay kanepegan a manetermina no panon so kikurang na nanengneng ya organisasyon to.—1 Awaran 29:11; Salmo 97:9.
7. Panon a niwawanwan iray Tastasi nen Jehova?
7 Miduma ed dakel iran relihyoson grupo na Kakristianoan, aliwan saray Tastasi nen Jehova so mandedesidi no anton nengneng na relihyoson inkasangal so nepeg dan pankurangan. Panggugunaetan na sarayan masimoon a Kristiano so mansiansia ed saray estandarte nen Jehova. Ag-aturo iray manangasikaso ed limog da diad panamegley na pakauley na kongregasyon, hierarkiya, odino presbiteryo. No manggugunaet a mibali iray elemento na mundo diad sarayan pananuro, agmikokompromiso so totoo nen Jehova. Pansiasiansiaen dan malet so talindeg da unong a mabitabitar ya imbalikas na saray apostol nen inmunan siglo sanen inkuan dan: “Nakaukolan ya unoren mi so Dios, nen saray totoo.” (Gawa 5:29) Manpapasakop sirin ed Dios iray Tastasi diad amin a bengatla. (Hebreos 12:9; Santiago 4:7) Nagamoran so abobon na Dios no tumboken tayo so teokratikon paraan.
8. Panon a mandumaan iray demokratiko tan teokratikon paraan?
8 Bilang lingkor nen Jehova, say Baleg a Teokrata, maabig a nodnonoten tayo so pandumaan na demokratiko tan teokratiko iran paraan. Kakaukolanen na saray demokratikon proseso a walay representanti na balang partido tan mabetbet a pakapatnagan na panagkampanya ontan met ed pampili panamegley na botos na karaklan. Ag-iratan nalalanor a pananontonan ed saray teokratikon pananuro. Saraya so agnanlapud totoo; nisay nanlapu iratan ed sakey a legal ya ahensia. Diad mapatnag ya impanukoy nen Pablo ed mismon impanuro ed sikato nen Jesus tan si Jehova bilang ‘apostol na saray Gentiles,’ imbaga to ed saray taga-Galacia a sikato so aturo “aliwan lapud saray totoo, tan aliwan lapud panamegley na too, noag lapud panamegley nen Jesus-Kristo, tan say Dios Ama, a sikato so amaalagey ed sikato ed saray inatey.”—Roma 11:13; Galacia 1:1.
Aturo Panamegley na Masanton Espiritu
9. Anto so ibabaga na Gawa 20:28 nipaakar ed pananuro ed saray Kristianon manangasikaso?
9 Pinanonotan nen Pablo iray manangasikaso a walad Efeso a sikara so tinuro na Dios panamegley na masanton espiritu. Inkuan to: “Imanoen yo so inkasikayon dili tan say amin a pulok, a diad sikara et tinuro kayo na masanton espiritu bilang manangasikaso, pian manpastol ed kongregasyon na Dios, a sinaliw to panamegley na dala na mismon Anak to.” (Gawa 20:28, NW) Saratan a Kristianon manangasikaso so nakaukolan a mantultuloy a paiwanwan ed masanton espiritu legan dan susumpalen iray obligasyon da bilang managpastol ed pulok na Dios. No agla nakakapet na sakey a lakin aturo so madibinon estandarte, onsabi so panaon et onkiwas so masanton espiritu a mangekal ed sikato manlapu ed posisyon to.
10. Panon ya awalaan na importantin betang so masanton espiritu diad saray teokratikon pananuro?
10 Panon ya awalaan na ontan ya importantin betang so masanton espiritu? Unona’d amin, say kuritan ya inkidatakan na saray kakaukolanen parad espiritual a panangasikaso so pinuyanan na masanton espiritu. Diad saray sulat to ed si Timoteo tan Tito, indalatdat nen Pablo iray estandarte a nepeg a kapeten na saray manangasikaso tan ministeryal a lingkor. Diad ami-amin, sinalambit to so 16 a nanduruman kakaukolanen. Singa bilang, saray manangasikaso so nakaukolan ya anggapoy pakabalawan, masimpit ya impanugali, matudio ed kanonotan, mauksoy, maparawes, kualipikadon manbangat, tan napanuliranan ya ulo na pamilya. Nepeg ya asimbang ira ed panag-usar na de-alkohol ya iinumen, aliwan maaro ed kuarta, tan kaukolan a mangagamil ira na dangka. Ontan met, nidatak iray atagey ya estandarte a nepeg a dampoten na saramay turoen a ministeryal a lingkor.—1 Timoteo 3:1-10, 12, 13; Tito 1:5-9.
11. Anto so pigara ed saray kualipikasyon a nepeg a kapeten na lalakin manadampot ed saray responsabilidad ed kongregasyon?
11 Say panrepaso ed sarayan kualipikasyon so mangipatnag a saraman so mangidaulo ed panagdayew ed si Jehova so nepeg a napanuliranan ed kondukta bilang Kristiano. Saray lalakin manadampot ed responsabilidad ed kongregasyon so nepeg a pakapatnagan a naiimpluensiaan ira na masanton espiritu. (2 Timoteo 1:14) Nepeg a napatnagan a papawalaen na espiritu na Dios ed sarayan lalaki so bunga na “aro, liket, deen, kasungdoan, kauyamoan, kaabigan, sisia, tayadno, dangka.” (Galacia 5:22, 23) Napatnagan iratan a bunga diad pidedeneng da ed saray kapananisiaan da tan ed arum. Siempre, arum so nayarin matalonggaring ed panangipatnag na pigaran bungay espiritu, bangta say arum so nayarin makakapet ed pigaran kualipikasyon na manangasikaso diad matalonggaring a paraan. Anggaman ontan, diad intiron padron na kabibilay da et amin a manpipirawat a naturo bilang manangasikaso odino ministeryal a lingkor so nepeg a mangipatnag a maespiritual iran lalaki, a kakapeten daray kakaukolanen na Salitay Dios.
12. Siopa so nayarin nibaga a tinuro na masanton espiritu?
12 Sanen binilin nen Pablo so arum a sikatoy aligen da, agawaan to itan tekep na inkamabulos a mansalita lapud sikaton mismo so mangaalig ed si Jesu-Kristo, ya ‘angitilak na panuliranan, pian tumboken tayo so bakat to.’ (1 Pedro 2:21; 1 Corinto 11:1) Diad panaon na inkaturo ra, saramay akakapet ed Makasulatan iran kakaukolanen bilang manangasikaso odino ministeryal a lingkor so nayarin natukoy sirin a tinuro na masanton espiritu.
13. Panon ya ontulong so masanton espiritu ed panangirekomenda ed saray lalakin manlingkor ed kongregasyon?
13 Wala so sananey nin sengegan a mangipapabitar ed no panon so ikukurang na masanton espiritu diad panangirekomenda tan pananuro ed saray manangasikaso. Inkuan nen Jesus a say ‘Ama a walad tawen so mangiter na espiritu santo ed saramay onkerew ed sikato.’ (Lucas 11:13) Kanian sano manmiting iray mamatatken ed lokal a kongregasyon pian mangirekomenda na lalaki parad saray responsabilidad ed kongregasyon, ipipikasi ran iwanwan ira na espiritu na Dios. Ibabase daray rekomendasyon da ed no anto so nidatak ed apuyanan a Salitay Dios, tan say masanton espiritu so ontulong ed sikaran manebek ed no kasin say indibidual a pantotongtongan dan turoen so makakapet ed saray Makasulatan a kakaukolanen. Saramay mangirerekomenda so agnepeg a paimpluensiaan ed akinpaway ya itsura, katagey na inaral, odino nisipor iran abilidad. Kaukolan a say manunan pangiyapasakeyan da et no kasin say too et maespiritual a laki, a mainomay ya asinggeran na saray membro na kongregasyon parad espiritual a simbawa.
14. Anto so naaralan tayo ed Gawa 6:1-3?
14 Anggaman ipapaamta na saray ulop na mamatatken ed saray managbiahen manangasikaso so panangirekomenda ed agagi a manserbi bilang mamatatken tan ministeryal iran lingkor, say peteg a pananuro so gawaen unong ed padron ya inletneg nen inmunan siglo. Diad aminsan ya inkagawa, linmesa so pankaukolan ed kualipikado iran espiritual a lalaki pian asikasoen so sakey ya importantin kimey. Oniay inter na mananguley ya ulop a panangidirehi: “Anapen yo sirin, agagi, dia ed sikayo so pitoran lalaki a maong so dengel da, napno na espiritu tan kakabatan, a sikara so igaton tayo ed sayan gawa.” (Gawa 6:1-3) Anggaman saramay lalakin direktan mangaasikaso ed nagagawa so angirekomenda, say impanuro so ginawa na responsablin lalaki diad Jerusalem. Ontan a padron so tutumboken natan.
15. Panon a nalalanor so Mananguley ya Ulop ed pamaakaran na pananuro ed lalaki?
15 Say Mananguley ya Ulop na Tastasi nen Jehova so direktan manuturo ed amin a membro na saray Branch Committee. Sano desisyonan da no siopa so mangako ed satan ya ambelat a responsabilidad, walad kanonotan na Mananguley ya Ulop so balikas nen Jesus: “Anggan siopa a naikdan na dakel, dakel met so nasingil ed sikato; et say angimatalkan da na dakel, kerewen da ed sikato so dadakel.” (Lucas 12:48) Niarum ni ed pananuro ed saray membro na Branch Committee, say Mananguley ya Ulop so manuturo ed saray Bethel elder tan managbiahen manangasikaso. Anggaman ontan, papabtangan da iray responsablin agagi ya onakto ed biang da nipaakar ed pigara nin pananuro. Wala met so Makasulatan a pangaligan ed saya.
‘Manuro Ka, Singa Imbilin Ko ed Sika’
16. Akin ya intilak nen Pablo si Tito diad Creta, tan anto so ipapabitar na saya nipaakar ed saray teokratikon pananuro natan?
16 Oniay inkuan nen Pablo ed kakimeyan ton si Tito: “Itilak ta ka’dman ed Creta, pian uksoyen mo so saray bengatlan kulang, tan mangyan [“manuro,” NW] ka na saray pinagkamasiken ed binaleybaley, singa imbilin ko ed sika.” (Tito 1:5) Insan indalatdat nen Pablo iray kualipikasyon a pangibasian nen Tito no sioparan lalaki so kualipikadon naturo. Natan sirin et tuturoen na Mananguley ya Ulop iray kualipikadon lalaki diad saray sanga pian mangirepresenta ed satan diad pananuro ed saray mamatatken tan ministeryal a lingkor. Aagamilen na saramay mangirerepresenta ed Mananguley ya Ulop so inkaalwar pian malinew dan natalosan tan natumbok iray Makasulatan a giya ed ontan iran pananuro. Kanian, walad silong na panangidirehi na Mananguley ya Ulop so pakakaturo na saray kualipikadon lalaki a manserbi ed saray kongregasyon na saray Tastasi nen Jehova ed sankamundoan.
17. Panon so pangaasikaso na sangan opisina ed saray rekomendasyon na impanuro ed saray manangasikaso tan ministeryal a lingkor?
17 Sano isubmiti la ed sangan opisina na Watch Tower Society iray rekomendasyon ed saray tinuron manangasikaso tan ministeryal a lingkor, saray eksperiensiadon lalaki so mandependi ed panangigiya na espiritu na Dios sano manuturo ira. Iisipen na sarayan lalaki a mikuentaan ira, a momoriaen da ya agda nepeg a bengatbengat a turoen so siopaman a laki, lapud ta no gawaen da itan et minonong ira ed saray kasalanan to.—1 Timoteo 5:22.
18, 19. (a) Panon a nipapasabi iray pigaran pananuro? (a) Panon a gagawaen so intiron proseso na panangirekomenda tan pananuro?
18 Walaray pananuro a nayarin nipasabi panamegley na sakey a sulat a walaay tatak manlapud legal ya ahensia. Satan a sulat so nayarin usaren diad panuro ed masulok nen say sakey ya agin laki ed kongregasyon.
19 Saray teokratikon pananuro so manlalapud si Jehova panamegley na Anak to tan say nanengneng a paralanan na Dios diad dalin, say “matoor tan makabat ya aripen” tan say Mananguley ya Ulop na satan. (Mateo 24:45-47) Say intiron proseso na ontan a panagrekomenda tan pananuro so ididirehi, odino iwawanwan, na masanton espiritu. Ontan so kipapasen lapud saray kualipikasyon a nidatak ed Salitay Dios et pinuyanan na masanton espiritu, tan say aturon indibidual so mangipapatnag ed bunga na satan ya espiritu. Kanian, saray impanuro so nepeg a moriaen bilang ginawa panamegley na masanton espiritu. No panon a saray manangasikaso tan ministeryal a lingkor nen inmunan siglo so aturo ed teokratikon paraan, ontan met so gagawaen natan.
Misalsalamat ed Panangigiya nen Jehova
20. Akin a nibabalikas tayo met iray nalilikna nen David a nikurit ed Salmo 133:1?
20 Diad sayan panaon na espiritual ya iyaaligwas tan teokratikon ibubulaslas ed kimey a panangipulong na Panarian, misalsalamat itayo a si Jehova so manunan responsabli ed pakakaturo na saray manangasikaso tan ministeryal a lingkor. Sayan Makasulatan ya uksoyan so ontutulong pian napansiansia so atagey iran estandarte na Dios nipaakar ed inkatunong diad limog tayoran Tastasi nen Jehova. Niarum ni, say Kristianon awawey tan masimoon iran sagpot na sarayan lalaki so ontutulong a maong ed alay abig a kareenan tan pankakasakey na saray lingkor nen Jehova. Singa say salmistan David, napakiwas itayo sirin a mangikelyaw: “Nengneng yo, alay kaabigan tan alay kaligliwaan na panayam na sanaagi ed inkasaksakey!”—Salmo 133:1.
21. Panon a nasusumpal natan so Isaias 60:17?
21 Agaylay pisalsalamat tayo ed panangidirehi nen Jehova panamegley na Salita tan masanton espiritu to! On, makabkabaliksan iray salitan nikurit ed Isaias 60:17 [NW]: “Imbes a gansa mangitarok ak na balitok, tan imbes a balatyang mangitarok na pilak, tan imbes a kiew, gansa, tan imbes a batobato, balatyang; tan turoen ko so deen bilang saray manangasikaso yo tan say inkatunong bilang saray manangipabtang.” Diad kalkalnan kiyaaplikan maong na saray teokratikon paraan diad limog na saray Tastasi nen Jehova, naeeksperiensia tayo irayan abenditon kipapasen ed intiron mangaraldalin ya organisasyon nen Jehova.
22. Anto so nepeg tayon pisalsalamatan, tan anto so nepeg a determinadon gawaen tayo?
22 Misalsalamat itayon maong ed saray teokratikon uksoyan ya onkukurang ed limog tayo. Tan apresiaen tayon maong so impasya tan makapnek a kimey na saray manangasikaso tan ministeryal a lingkor ya aturo ed teokratikon paraan. Sigpot-puso tayon itandoro so maaron mangatatawen ya Ama tayo, ya angiter ed sikatayo na espiritual ya aligwas tan mayamyaman to itayon benendisionan. (Uliran 10:22) Komon ta determinado tayo sirin a mantultuloy a mibansag ed organisasyon nen Jehova. Nagkalalo ed amin, komon ta mantultuloy itayon manlingkor a sankakaiba diad kigalangan, kirayewan, tan kigloriaan na matalonggaring tan masanton ngaran nen Jehova.
Panon Yon Ebatan?
• Akin a nibaga tayon say inkaturo na saray manangasikaso tan ministeryal a lingkor et ginawa ed teokratikon paraan, aliwan demokratiko?
• Panon so panuturo na masanton espiritu ed saray responsablin Kristianon lalaki?
• Panon a nalalanor so Mananguley ya Ulop ed pananuro ed saray manangasikaso tan ministeryal a lingkor?
• No nipaakar ed saray teokratikon pananuro, akin a misalsalamat itayo ed si Jehova?
[Saray litrato ed pahina 15]
Apribilihyoan iray manangasikaso tan ministeryal a lingkor a manserbi lapud teokratikon inkaturo ra