No Akin a Mairap so Manpaabeba

PARAD dakel a totoo natan, singa agla praktikal so manpaabeba. Diad tua, no siopa ni iramay totoon mangiyaatagey ed inkasikara, makinon, tan ipipilit day labay da, sikara la ingen so piimano na karaklan tan ipapasen a maas-asenso. Panibegan met na maslak a totoo iray estilo na kabibilay na saray mayaman tan balitado, aliwan saray mapaabeba tan mauyamo. Kaslakan et labalabay na saramay matalona ya ilastog so impansagpot dan bukor. Imbes a manpaabeba ira, ipapangta ray inyasenso ra.

Sakey a researcher a taga-Canada so analambit ed “inkasmak na inkasiblet tan inkamapaatagey” ed bansa ra. Iisipen na arum a manbibilay itayo ed mundon mas importante ni so panliliket nen say panggawa ed saray obligasyon da tan naiimano ran say nononoten labat na totoo natan et say laman da. Diad sayan mundo, say inkamapaabeba et ag-ipapasen a maabig a kalidad.

Siempre, dakel so onabobon a say inkamapaabeba et maabig parad arum, lapud saray mapaabeban totoo et mainomay a piulopan. Balet, diad panaon tayo a saray totoo et makompetensia, papagaan na arum a sano manpaabeba ira, sikaray ipasen a makapuy.

Impasakbay na Salitay Dios, say Biblia, a diad panaon tayo et saray totoo so magmaliw a “managpasirayew, atagey a linawa.” (2 Timoteo 3:1, 2) Agta onabobon ka a nagagawa la iyan propesiya? Antoy nikuan mo, maabig kasi so manpaabeba? Odino, kasin ipapasen mo a makapuy tan mainomay a naanamot so mapaabeban too?

Diad tua, say Biblia so mangiiter na dakel a rason no akin a nepeg a pablien tan paaligwasen so panagpaabeba. Mangitatarya itan na balanse tan positibon panmoria ed satan a kalidad tan ipapanengneng na satan a say tuan inkamapaabeba et pakapatnagan na biskeg, aliwan kakapuyan. Say ontumbok ya artikulo so mangipaliwawa ed saya.

[Litrato ed pahina 3]

Anto so nepeg a panmoria tayo ed saray agawaan tayo?