Ginawa Ran Makabkabaliksan so Bilay Da​—Kasin Nagawaan Mo Met Itan?

SI Marc, ya agin taga-Canada, so empleyado ed sakey a kompanyan manggagawa na saray komplikado tan automatikon kagawaan ya uusaren na saray ahensian maniimaton ed liwang. Sikatoy mantratrabahon part-time tan manlilingkor bilang regular payunir. Insan, sikatoy inopresian na superbaysor to ya iyatagey so posisyon to, a mantrabaho lan full-time tan baleg so sueldo. Anto so ginawa nen Marc?

Si Amy, ya agin taga dia ed Pilipinas, so manlilingkor bilang regular payunir legan a mankokolehyo. Kapangraduar to, sikatoy inopresian na full-time a trabaho a mankaukolay dakel a panaon to balet ta baleg so sueldo. Anto so pinili nen Amy?

Mandumaan so desisyon nen Marc tan si Amy, tan saray nansumpalan na pinili ra so mangiyiilustra a makabat imay simbawan niiter ed saray Kristiano ed kadaanan a Corinto. Oniay insulat nen apostol Pablo: “Saray managamil ed mundo, agda komon aagamilen [odino, uusaren] ya alabas.”​—1 Cor. 7:29-31.

Usaren so Mundo Balet Aliwan Alablabas

Sakbay tayon amtaen no anto so agawa ed si Marc tan si Amy, konsideraen tayo pan magano so kabaliksan na salitan “mundo” (odino, koʹsmos diad Griego) ya inusar nen Pablo diad sulat to ed saray taga-Corinto. Diad satan a teksto na Biblia, say koʹsmos so ontutukoy ed sistema na mundo a panaayaman tayo, salanti, say interon sosyedad na too, a pati saray kaslakan lan bengatla a kabiangan na inagew-agew a panagbilay, a singa say ayaman, tagano, tan kawesen.a Pian nawalaan na ontan ya inagew-agew iran pankaukolan, maslak ed sikatayo so nepeg a mantrabaho. On, kapilitan ya usaren tayo so mundo pian nasumpal tayo so Makasulatan ya obligasyon tayo a panlegpet ed inkasikatayo tan say pamilya tayo. (1 Tim. 5:8) Anggaman ontan, nepeg tayon tandaan met a “say mundo mangangga.” (1 Juan 2:17) Sirin, usaren tayo so mundo angga ed makanepegan labat a paraan, ya aliwan ‘alablabas.’​—1 Cor. 7:31.

Dakel ya agagin lalaki tan bibii so apakiwas na satan a simbawa na Biblia a limitaan so pangusar da ed mundo, kanian inusisa ra so kipapasen da, binawasan day oras ya uusaren da ed sekular a trabaho, tan pinasimpli ra so kabibilay da. Sanen ontan so ginawa ra, diman da amoria a makabkabaliksan so bilay da lapud mas malaem la so panaon da ed pamilya ra tan ed serbisyo ra ed si Jehova. Sakey ni, say simplin bilay da so amakiwas ed sikara a lalon manmatalek ed si Jehova, aliwan diad sayan mundo. Kasin nagawaan mo met itan, a napasimplim so kabibilay mo ta pian niyabanti so intereses na Panarian na Dios?​—Mat. 6:19-24, 33.

“Sikami Natan so Lalon Apaapit ed si Jehova”

Si Marc ya abitla’d gapo so tinmalineng ed simbawa na Biblia ya ag-usaren ya alablabas so mundo. Agto inawat so opresin atagey a posisyon. Kalabas na pigaran agew, sikatoy inopresian na superbaysor to na mas atagey nin sueldo pian tangguyoren ya awaten to so balon trabaho. Inkuan nen Marc: “Makapatukso iman, balet ta agko inawat.” Impaliwawa toy rason: “Labay mi nen asawak, a si Paula, ya usaren so interon bilay mi anggad posible diad panaglingkor ed si Jehova. Kanian, nampaknaan min pasimplien so kabibilay mi. Impikasi mi ed si Jehova a nawalaan kami na kakabatan pian nadampot mi so kalat mi tan inggetar mi so petsa na pangigapo min mangusar na mas dakel a panaon ed panaglingkor ed si Jehova.”

Onia so imbaga nen Paula: “Mantratrabaho ak na taloy agew kada simba bilang sekretarya diad ospital tan makakaawat ak na magenap a sueldo. Regular payunir ak met. Balet, singa si Marc, labay kon panlingkoran si Jehova diad inerman a pasen a babaleg so pankaukolan parad manangipulong na Panarian. Ingen, sanen inyawat koy sulat nipaakar ed iyekal ko la’d trabaho, imbaga na superbaysor ko a kualipikado ak parad posisyon ya executive secretary ya aganggano nin abakante. Diad amin a sekretarya ed ospital et saya la so sankatageyan na sueldo, balet agko inuman so desisyon kon onekal. Sanen impaliwawak so rason na agko impangaplay ed posisyon, kinomendaan to ak lapud pananisiak.”

Ag-abayag kayari na satan, si Marc tan Paula so nibakin manlingkor bilang espisyal payunir ed sakey a melag a kongregasyon diad nisulinek a lugar ed Canada. Anto so resulta na inyalis da? Oniay inkuan nen Marc: “Kayarik a tinaynan so trabahok a balbaleg so sueldo tan angusaran ko na ngalngalin kapaldua na taon na bilay ko, medyo mapaga ak, balet ta benendisyonan nen Jehova so ministeryo mi. Nanliketan min maong so panutulong mi’d arum a manlingkor ed si Jehova. Akatulong met ed panamaley mi so panlilingkor min sigpot-panaon. Say pantotongtongan min naynay et saray peteg a makanakana, salanti, saray nipaakar ed espiritual. Sikami natan so lalon apaapit ed si Jehova.” (Gawa 20:35) Oniay inkuan met nen Paula: “No taynanan mo so trabahom tan say mainawan bilay diad nipasalan mo lan ayaman, kaukolan a sigpot kan manmatalek ed si Jehova. Ontan so ginawa mi, tan benendisyonan kami nen Jehova. Impalikna na saray pinablin agagi ed balon kongregasyon mi ya inararo tan kaukolan da kami. Say biskeg a datin uusaren ko ed trabaho et uusaren ko la natan pian tulongan iray totoo a nakabatan so Dios. Tan malikeliket ak ed sayan serbisyo.”

‘Mainawa Balet Agmaliket’

Si Amy, ya abitla nen niman et dumay pinili to. Inawat to imay inyopresi ed sikaton trabaho a baleg so sueldo. Inkuan to: “Diad primeron taon et aktibo ak met ni ed ministeryo balet say bilay ko a datin akasentro ed intereses na Panarian so kalkalnan niteen ed sekular a trabaho. Inawat ko iray makapaingganyon opresi parad mas atagey nin posisyon tan ditan lay panguusaran ko na biskeg ko. Legan ya ondarakel so responsabilidad ko diad trabahok, mandaiset lan mandaiset so panaon ko ed ministeryo. Asabi panaon, tinmunda ak lan manpulong.”

Nipaakar ed saman ya apalabas a panaon, inkuan nen Amy: “Mainawa ak ed pinansyal. Dakdakel a lugar so nakar ko tan dederlengen ak na totoo lapu ed propesyon ko. Balet, agak maliket. Anggano walay kuartak, dakdakel so problemak. Inumameng ko no akin. Amoriak a siansia a lapud pangegemtan ko na sakey a karera ed sayan mundo, dawdawit ak ya ‘abalang ed pananisia.’ Bilang nansumpalan, unong ya imbagan mismo na Salitay Dios, nanlikna ak na ‘dakel a kaermenan.’”​—1 Tim. 6:10.

Anto so ginawa nen Amy? Inkuan to: “Nampatulong ak ed saray mamatatken pian ombiskeg ak lamet ed espiritual tan inmatendi ak lamet ed saray pantitipon. Siak so akaakis legan na kanta. Anonotan ko imay makapalikliket a limay taon ya impanpayunir ko, anggaman mairap ak ed pinansyal nensaman. Amtak ya agko la nepeg a daraken so panaon ko ed pananap na dakel a kuarta, tan kaukolan kon iyuna so intereses na Panarian. Kanian, inawat ko so mas abeban posisyon, anggaman kapaldua labat so sueldo no ikompara ed samay dati, tan ginmapo ak lamet a nampulong.” Si Amy so maligligsa lan angikuan: “Panliliketan ko so pigay taon lan pampapayunir ko. Naliliknak natan so inkapnek ya agkon balot alikna sanen mas dakel ni panaon ya uusaren ko diad pantratrabaho ed sayan mundo.”

Sarag mo kasin umanen so kipapasen mo tan pasimplien so kabibilay mo? No usaren mo so niwalan panaon pian niyabanti so intereses na Panarian, nagawaan mo met a makabkabaliksan so bilay mo.​—Uli. 10:22.

[Paimano ed leksab]

[Blurb ed pahina 19]

Sarag mo kasin umanen so kipapasen mo tan pasimplien so kabibilay mo?

[Kahon/Litrato ed pahina 19]

“Panliliketan Ko La Itan!”

Si David, a sakey a Kristianon matatken diad Estados Unidos, so malabay met a manlingkor a sigpot-panaon a singa say asawa to tan ananak to. Sikatoy nantrabaho labat na part-time diad kompanya a dati lan kawalaan to, insan la ginmapon nampayunir. Kasin nagmaliw a makabkabaliksan so bilay to lapud satan? Kayari na pigaran bulan, oniay insulat nen David ed sakey a kaaro to: “Anggapo lay mas makapenek nen say sigpot a pibiang ed panaglingkor ed si Jehova a kaiba so pamilya. Say abaloan ko nensaman et kaukolan ko so andukey a panaon pian napanggayagaan koy panagpayunir, balet natan ni labat et panliliketan ko la itan! Talagan balibali so manpayunir.”

[Litrato ed pahina 18]

Si Marc tan Paula a manpupulong