Mabulbulos Dan Inyapay so Inkasikara​—Diad West Africa

LEGAY ibabaleg nen Pascal diad pobrin lugar ed Côte d’Ivoire, pangarap ton oninaway bilay to. Lapud sikatoy amateur ya boksingero, inisip to, ‘Iner kasi laen ko pian onsikat tan onyaman ak?’ Nen manga 25 to, nandesisyon ya onlad Europe. Balet anggapoy papeles to kanian plano toy onlad man ya ilegal.

Nen 1998, diad edad ya 27, nambiahe si Pascal. Binmasil ed boundary paonlad Ghana insan amaarap ed Togo tan diad Benin, insan akasabin siansia ed baley na Birni Nkonni diad Niger. Balet wala ni delikadon parte na biahe to. Pian makasabid norte, kaukolan toy onsabit ed truck tan ombasil ed Sahara Desert. Tan kasabi tod Mediterranean, onlugan ed baluto paonlad Europe. Onman so plano to, balet walay duaran agawa ed Niger kanian ag-atuloy.

Unona, naupot lay kuwarta to. Komadua, akabat toy Noé, payunir ya angiyaral na Biblia ed sikato. Lapud naaralan to, apakiwas ya umaney panmoria tod bilay. Asalatan na espiritual ya kalat so pangarap ton onyaman. Nen Disyembre 1999, abautismoan si Pascal. Bilang pisasalamat ed si Jehova, nampayunir ed Niger nen 2001​—diad mismon baley ya akaamtaan toy katuaan. Antoy nibaga tod panlilingkor to? Inkuan to, “Aya so sankabalibalian ya agawad bilay ko!”

MAKAPNEK TAN MALIKET A MANLILINGKOR ED AFRICA

Singa si Pascal, amoria na dakel a makapnek so bilay no iyunay espiritual iran kalat. Pian nagawaan itan, wala ray taga Europe ya inmalis ed Africa pian manlingkor ed lugar ya mas baleg so pankaukolan parad manangiyabawag na Panarian. Diad tua, manga 65 ya Tasi ed Europe—mantaon na 17 anggad 70—so linmad bansa ed West Africa, a singa diad Benin, Burkina Faso, Niger, tan Togo.a Tinawag iran “baleg a katulongan.” Antoy amaseseg ed sikaran gawaen itan, tan antoy resulta?

Oniay imbaga nen Anne-Rakel a taga Denmark: “Datin misionero ed Senegal iray ateng ko. Malikeliket dan iistoryaen so bilay na misionero kanian nagmaliw ya pangarap ko met man.” Manga 15 taon lay apalabas, sanen masulok ya 20 nen Anne-Rakel, sikatoy linmad Togo pian manlingkor ed sign-language congregation. Panon ya apaseseg so arum ed ginawa to? Inkuan to: “Ag-abayag, nanlingkor met lad Togo so agik a bii tan laki.”

Oniay imbaga nen Aurele, brother a mantaon na 70 ya taga France: “Nen nanretiro ak, limay taon lay apalabas, kaukolan koy manpili no kasin enjoyen ko labat so bilay ed France tan alagarey Paraiso odino palaknaben koy ministeryok.” Pinili toy ministeryo to. Manga taloy taon lay apalabas, inmalis si Aurele tan say asawa ton si Albert-Fayette diad Benin. “Say mabulos ya impanlingkor mid si Jehova diad sayan lugar so sankaabigan a ginawa mi,” kuan nen Aurele. “Diad tua, walay teritorya min asingger ed dayat ya singa Paraiso,” so manim-imis ya inyarum to.

Si Clodomir tan say asawa ton si Lysiane, a taga France et inmalis ed Benin, 16 taon lay apalabas. Nen unaan, makakailiw iran maong ed pamilya tan kakaaro rad France. Abaloan da et nairapan iran man-adjust, andi manaya. Malikeliket ira. Imbaga nen Clodomir, “Diad loob na 16 ya taon, manga sakey a too kada taon so natutulongan min mangawat ed katuaan.”

Si Sébastien tan Johanna et sanasawan taga France ya inmalis ed Benin nen 2010. Imbaga nen Sébastien: “Dakdakel so kimey ed kongregasyon. Singa kami onaatendid mapmaples ya training ed organisasyon!” Antoy reaksion na totoo ed ministeryo? Inkuan nen Johanna: “Labalabay dan narengel so katuaan. Anggano agkami manpupulong, sabaten da kamin tepetan nipaakar ed Biblia tan mangalay publikasyon tayo.” Antoy epekto na saya ed relasyon dan sanasawa? Inkuan nen Sébastien: “Lalon inmelet so aroan mi. Makapalikliket ya nakaiban sanagew ed ministeryo so asawak.”

Si Eric tan say asawa ton si Katy et payunir diad nanaarawian ya teritorya ed northern Benin. Sanen wala ni rad France, samploy taon lay apalabas, binasa da ray artikulon nipaakar ed saray lugar ya walay baleg a pankaukolan tan mitotongtong irad saray walad full-time. Lapud satan, apaseseg iran manlingkor ed arum a bansa. Tan inmalis ira nen 2005. Anengneng day makapadinayew ya indakel na manangipalapag. Inkuan nen Eric: “Diad apalabas a duay taon, 9 ni labat so manangipalapag ed grupo mi diad baley na Tanguiéta; natan balet et 30 la. Kada Simba, manga 50 anggad 80 so mimiaral. Makapalikliket ya nanengneng!”

AMTAEN TAN DAEGEN IRAY SUBOK

Anto ray subok ed saray “baleg a katulongan”? Si Benjamin, ya mantaon na 33 et agi nen Anne-Rakel. Nen 2000, akabat tod Denmark so sakey a misioneron manlilingkor ed Togo. Imbaga to: “Nen asalitak ed samay misionero ya labay koy manpayunir, say kuan tod siak: ‘Antam, sarag moy manpayunir ed Togo.’” Ninodnonot iman nen Benjamin. Inkuan to: “Anggapo ni 20 años kod saman, balet manlilingkor lad Togo so duaran atsik. Kanian mainomay koy onlad man.” Ag-abayag, inmalis diman. Balet wala nin siansiay subok. Impaliwawa nen Benjamin: “Anggapoy amtak ya anggan sakey a salitan French. Diad unonan anem bulan ko et nairapan ak ta agak makapitongtong.” Balet, asabi panon, akaaral lanlamang. Natan et manlilingkor lay Benjamin diad Bethel ed Benin, sikatoy mandedeliver na literatura tan ontutulong ed computer department.

Antis ya inmalis ed Benin si Eric tan Katy, ya abitla nen niman, manlilingkor irad foreign-language congregation diad France. Antoy pidumaan na satan ed West Africa? Inkuan nen Katy: “Mairap so makalmoy komportablen panayaman. Pigay bulan kamin nanayam ed abung ya anggapoy kuryente tan kaukolay manasol.” Onia ni imbaga nen Eric: “Makmaksil so panagpatogtog na kaabay mi, anggano lablabi la. Talagan kaukolay anos tan pan-adjust.” Balet aminen dan dua: “No maliket kan manpupulong ed teritoryan mataltalag ya nakimeyan, baliwala manayay irap.”

Si Michel tan Marie-Agnès, a sanasawan taga France et inmalis ed Benin manga limay taon lay apalabas. Ngalngali 60 años da la tan diad gapo et talawan ira. Inkuan nen Michel: “Kuan na arum, no onalis kami, singa kami kuno akalugan ed karitelyan itutulak na ontataytay ed lubir! No agmi amtan si Jehova so mangitutulak, seguradon antakot kami. Balet, inmalis kami parad si Jehova tan matalek kamin kaiba mi si Jehova.”

NO PANON MON IPARAAN SO SARILIM

Inkuan na saray eksperiensyadon “baleg a katulongan” ya pian niparaan moy sarilim, kaukolan mon gawaen iraya: Manplano. Man-adjust. Manbadyet. Tan manmatalek ed si Jehova.—Luc. 14:28-30.

Inkuan nen Sébastien, ya abitla nen niman: “Antis kamin inmalis nen Johanna, duay taon kamin nantipon. Binawasan mi gastos mid panagligliwaan tan mangasaliw kami labat na kaukolan mi.” Lapud labay day tuloytuloy a makapanlingkor ed arum a bansa, kada taon et pigay bulan iran matratrabahod Europe pian makapampayunir irad Benin parad nakekeraan ya bulan.

Sakey si Marie-Thérèse ed saray 20 mamarikit ya manlilingkor bilang “baleg a katulongan” diad West Africa. Sikatoy sakey a drayber na bus diad France. Balet nen 2006, nan-leave ya sakey taon pian makapampayunir ed Niger. Ag-abayag, amoria ton aya so klase na bilay ya labalabay to. Inkuan to: “Nen pinmawil ak ed France, akitongtong ak ed amok ya labay kon i-adjust so eskedyul na trabahok, tan pinmayag. Natan, manlapud Mayo anggad Agosto et mantratrabaho ak bilang drayber diad France, tan manlapud Setyembre anggad Abril et manpapayunir ak ed Niger.”

Saray ‘manaanap nin unona ed panarian’ et makapanmatalek ya iter nen Jehova ed sikara so ‘amin ni ran bengatlan nakaukolan’ da. (Mat. 6:33) Nengnengen tayo pay agawad si Saphira, marikit ya taga France a ngalngali man-30 años tan payunir ed Benin. Nen 2011, pinmawil ed France a mantrabaho pian nasuportaay komanem a taon tod Africa. Inistorya to: “Biernes ed saman, tan sampot lan agew kod trabaho, balet kaukolan ko ni mantrabaho na samploy agew pian onsustoy tipon ko parad sakey taon. Duatduara lan simbay nakekeran panayam kod France. Impikasik ed si Jehova so situasyon ko. Kabebekta, tinmawag ed siak so sakey ya agency tan tinepet da no labay kon sandian na duay simba so sakey ya empleyado.” Kasabi Lunes, linmoob ed trabaho si Saphira pian ni-train na samay salatan to. Inkuan to: “Abigla ak nen naamtaan kon agi manayay salatan ko. Kaukolan toy manbakasyon na samploy agew pian makapan-PSS! Et abuloyan labat na boss to no makaanap na kasalat. Kanian, kinmerew met ed si Jehova na tulong, a singa siak.”

LAPUAN NA TUAN LIKET

Wala ray nanlingkor ed West Africa na pigay taon tan ditan la nanayam. Saray arum et pigay taon ya nansiansia ditan insan pinmawil ed bansa ra. Balet anggad natan, makagunggona nin siansia ed sarayan datin “baleg a katulongan” so impanlingkor dad arum a bansa. Amoria dan say panaglingkor ed si Jehova so lapuan na tuan liket.