EBAT ED SARAY TEPET ED BIBLIA
Antoy gawaen nen Jesus diad arapen?
Nen 33 C.E., inatey si Jesus, inmolid bilay, tan sinmegep ed tawen. Sinmabi panaon, naikdan si Jesus na pakayarin manuley bilang Ari. (Daniel 7:13, 14) Diad arapen, sikatoy onkiwas pian niwalay kareenan ed mundo tan naekal so kairapay bilay.—Basaen so Salmo 72:7, 8, 13.
Bilang Ari, punasen nen Jesus so kaugsan diad dalin
Bilang Manuley na totoo, manggawa si Jesus na makapakelaw iran bengatla. Usaren to so pakapanyarin inter na Ama to pian pagmaliwen lamet ya perpekto iray totoo. Panliketan day pambilay ed dalin ya agla ra ontatken tan ompatey.—Basaen so Juan 5:26-29; 1 Corinto 15:25, 26.
Anto lay gagawaen nen Jesus natan?
Idadaulo natan nen Jesus so panagpulong na saray tuan papatumbok to diad interon mundo. Oonla rad totoo pian ipanengneng so ibabaga na Biblia nipaakar ed Panarian na Dios. Imbaga nen Jesus ya tuloytuloy ton suportaan so kimey na saray disipulo to ya anggad panampoten na Panarian na Dios iray gobierno na too.—Basaen so Mateo 24:14; 28:19, 20.
Panamegley na tuan Kristianon kongregasyon, igigiya nen Jesus iray totoo diad mas maabig a paraan na panagbilay. Tuloytuloy to ran igiya anggad kaderal na sayan sistema na bengabengatla tan anggad balon mundo ya impormisa na Dios.—Basaen so 2 Pedro 3:7, 13; Apocalipsis 7:17.