“Dantalen Mo so Basbas na Saray Salim” Pian Onaligwas Ka

NEN taynan la na saray Israelita so Babilonia nen 537 B.C.E., sankanonot nen Jehova so dalanen da paarap ed Jerusalem. Imbaga tod sikara: “Itadia yo so dalan na baley; tabonan yo so dalan; ekalen yo so saray batobato.” (Isa. 62:10) Imadyin mo pa no panon itan ya ginawa na saray Judio. Nayarin wala lay akaunan grupo ya angapiger ed dalan, ompan tinabonan da ray kutlaong tan pinatar da itan. Baleg ya tulong itan ed saray arum ya Israelita ya nambiahe papawil ed Jerusalem.

Sarag tayon usaren itan bilang ilustrasyon no say pantongtongan et dalan ya paarap ed espiritual iran kalat. Labay nen Jehova ya amin a lingkor to et manakar ed satan a dalan ya anggapoy makasbel. Ipapaseseg na Salita to: “Dantalen mo so basbas na saray salim, tan saray amin a dalan mo niletneg ira komon.” (Uli. 4:26) Kalangweran ka man odino andi, nagunggonaan kad pangunor mod satan a simbawa.

IPARAAN MOY DALAN DIAD PANGGAWAY MAONG IRAN DESISYON

Nayarin narerengel mo ray totoon pantotongtongan da so sakey ya tinedyer ya ibaga ran: ‘Dakel so oportunidad ya manaalagar ed sikato’ odino ‘Maong so arapen to.’ Saray kalangweran et maksil so laman da, maples iran makaaral, tan pursigido ira. Kanian duga so ibabaga na Biblia: “Say gayaga na saray tobonbalon lalaki sikato so biskeg da.” (Uli. 20:29) No usaren na sakey ya kalangweran so talento tan biskeg to pian lingkoran si Jehova, nadampot to ray espiritual a kalat tan nalikna toy tuan liket.

Anggaman ontan, amta tayon importante parad sayan mundo so abilidad na saray kalangweran. No maong so ulo na sakey ya kalangweran a Tasi, nayarin sikatoy kombinsien na guidance counselor, maestra, odino kaklase to ya mankolehyo pian maong so bilay to ed sayan sistema. Odino say sakey ya brother o sister et maong ed sports tan sagyaten na saray recruiter ya manpokus ed satan. Ontan kasi situasyon mo, o walay kabat mon ontan so situasyon to? Antoy makatulong pian maong so desisyon na sakey ya Kristiano?

Makatulong iray prinsipyod Biblia pian makapanakar itayod sankaabigan a dalan ed bilay. “Nonoten mo met so Manamalsam dia ed saray agew na inkaugaw mo,” so kuan na Eclesiastes 12:1. Antoy sankaabigan ya paraan ya sika tan saray arum nin kalangweran et ‘nonoten yoy Manamalsa yo’?

Nonoten pay agawad si Erica ya tagad West Africa. Labalabay toy manggalaw na soccer. Nen 15 años to, apili ya magmaliw ya membro na national team. Kanian walay posibilidad ya sikatoy makaawat na sports training diad Europe tan magmaliw ya professional player na soccer. Balet panon ya tinmulong ed sikato so simbawan ‘nonoten so Manamalsam’? Tan antoy naaralan tayod sayan eksperiensya to?

Nen manaaral ni Eric, sikatoy inyaralan na Biblia na saray Tasi nen Jehova. Naaralan to ya say Amalsa ed sikato so permanentin makaresolbe ed amin ya problemay too. Atalosan nen Eric ya kaukolan ton usaren so panaon tan biskeg to diad panggaway linawa na Dios. Kanian agto la pinili so karera ed sports. Imbes, sikatoy nampabautismo tan pinabiskeg toy espiritualidad to. Sinmabi panaon, sikatoy nagmaliw ya ministeryal a lingkor tan naimbitaan ya manaral ed Bible School for Single Brothers.

No intuloy nen Eric imay karera tod sports, nayarin mayaman tan sikat la. Balet amta to ya duga iyan prinsipyo na Biblia: “Say kayarian na mayaman a too sikato so mabiskeg a syudad to, tan singa atagey a bakor ed dili a kaisipan [o imahinasyon] to.” (Uli. 18:11) On, ilusyon labat so seguridad ya iter na kayamanan. Sakey ni, saramay manpupursigin onyaman et ‘sasaksaken day inkasikara na dakel ya ot-ot.’—1 Tim. 6:9, 10.

Maong labat ta dakel ya kalangweran so makakaliknay liket tan tuan seguridad lapud inloob dad sigpot panaon ya serbisyo. Oniay kuan nen Eric: “Akila ak ed baleg ya ‘team’ na saray sigpot panaon ya lingkor nen Jehova. Atan so ‘best team’ ya napilaan ko, tan misalsalamat ak ed si Jehova ta impanengneng tod siak so saksakey ya dalan ya mamaarap ed tuan liket tan maong ya arapen.”

Sika ey? Imbes ya manpursige parad karera na sayan mundo, akin ta no ‘iletneg mo ray dalan mo’ parad si Jehova diad pampayunir mo?—Nengnengen so kahon ya “Saray Benepisyo ya Agnaala ed Unibersidad.”

EKALEN IRAY MAKASBEL ED DALAN

Nen binmisita so sakey ya sanasawa ed sangan opisina diad United States, naobserbaan da ya malikeliket iray Bethelite ya manlilingkor ed si Jehova. Oniay insulat na samay sister: “Kokkomportable kamid bilay mi.” Kanian nandesisyon iran sanasawa ya usaren day panaon tan biskeg da pian makadampot iray kaaruman iran pribilehyo.

Nen unaan, singa mairap iray pananguman ya labay ya gawaen na sayan sanasawa. Balet sakey agew, dinalepdep day teksto ed saman ya agew. Satan ya teksto et Juan 8:31 ya ditan et nabasa tayoy imbaga nen Jesus ya: “No mansiansia kayo ed salitak, peteg a sikayo iray disipulok.” Oniay naisip da: “Sulit so amin ya sakripisyon gawaen ta.” Inlako day baleg ya abung da, binawasan da ray gamit dan agmet kaukolan, tan inmalis irad kongregasyon ya mankaukolay tulong. Payunir iran dua natan, balet ontutulong met iran manpaalagey na saray Kingdom Hall tan manboboluntaryo irad saray distriton kombension. Antoy nibaga rad desisyon da? “Maliket manayay simplin bilay, basta gawaen moy ipapaseseg na organisasyon nen Jehova.”

MANSIANSIAD DALAN A MAMAARAP ED IYALIGWAS ED ESPIRITUAL

Insulat nen Solomon: ‘Onnengneng komon iray matam a maptek, tan onarap ira komon a maptek ed arap mo.’ (Uli. 4:25) Singa sakey ya drayber ya akapokus ed dalan, nepeg ya paliisan tayo ray makasbel ed saray espiritual a kalat tayo.

1. Saray Tasi nen Jehova ya manguusar ed biskeg da pian nadampot iray espiritual a kalat; 2. Dalan ya marlas

Anto ran espiritual ya kalat so sarag mon dampoten? Maabig so iloob ed sigpot panaon ya serbisyo. Ompan sarag moy ontulong ed asingger a kongregasyon ya mankaukolan na saray eksperiensyadon manangipalapag pian nakobrian so baleg ya teritorya da. Odino ompan walay kongregasyon ya pigpigara labat so elder tan ministeryal a lingkor da. Sarag moy mitongtong ed manangasikaso na sirkito yo tan tepet mo no panon kan makatulong. No labay mo met so manlingkor ed arawin lugar, sarag moy mantepet no anto ran arawin kongregasyon so mankaukolay tulong.b

Pawilen tayo pa may nabasad Isaias 62:10. Wala ray Judio ya makulin nankimey pian marantal so dalan tan anggapoy makasbel ed panakar na saray totoo na Dios paarap ed Jerusalem. Natan, kaukolan mo met ya pankulian iray espiritual ya kalat mo. Agka onsusuko. Diad tulong na Dios, nadampot mo iratan. Kerew kan lanang ed si Jehova na karunongan pian naekal mo ray makasbel diad arapan mo. Onsabi panaon, nanengneng mo no panon kan tulongan na Dios pian ‘marantal so basbas na saray salim.’—Uli. 4:26.

a Sinalatan so ngaran.

b Nengnengen so Organisadon Manggawa na Linawa nen Jehova, diad pahina 111-112.

Saray Benepisyo ya Agnaala ed Unibersidad

NEN ugaw ni Flavia, iistoryaan nen bai to ya sakey ya Tasi nen Jehova na nipaakar ed Biblia. Balet say ama to et maestro tan labay ton aralen nen Flavia so nipaakar ed saray tanaman tan ayayep, tan mangalay atagey ya edukasyon. Ibabaga na arum ed sikato, “Naisalba na henerasyon yo so planeta tayo.” Lapud suporta nen ama to, sikatoy nanaral ed sakey ya kabkabat ya unibersidad, ya ditan et inggapo toy man-research no panoy pamawala na gasolinan agmandutak ed dagem.

Naimano balet nen Flavia ya agtalaga interesado so dakel ya estudyante ed ‘pangisalbad planeta tayo.’ Tan wala ray proyekto na unibersidad ya say pundo da et manlalapud saray negosyante, kanian papaboran na saray researcher iray negosyo da. Ag-itan agustoan nen Flavia. Nen walay linman Tasi nen Jehova diad abung to, nagmaliw lamet ya interesado ed Biblia.

Inawat nen Flavia so katuaan tan nampabautismo. Balet lapud mangaala ni mas atagey ya degree, limitadoy panaon ton manpulong. Aminsan, nadngel to so paliwawa na manangasikaso na sirkito nipaakar ed Santiago 4:17: “No say sakey et amta ton gawaen so duga ingen ta agto gagawaen, sikatoy mankakasalanan.” Lapud satan et ninonot ya maong nen Flavia so situasyon to. Inkuan to: “Labay kon bendisyonan ak nen Jehova, balet labay ko met ya maong so pansumpalan na karerak ed siensia. Dapat manpili ak labat na sakey.”

Nandesisyon si Flavia ya itunda lay panaaral tod unibersidad. Wala tay pagbabawian to? Inkuan to:

“Diad panlilingkor kod si Jehova, niwalad siak iray benepisyo ya agnaala ed unibersidad. Maomaong si Jehova ed siak. Imbangat to ak ya magmaliw ya maong ed arum a too, ipanengneng so aro, tan tulongan irad espiritual. Balibali ulopan min sanasawa tan iilaloan koy arapen ya mas maong ni nen say iyoopresi na siensia. Si Jehova labat so makapangisalba ed sayan planeta. Agak balot ontundan manlingkor ed sikato.” Si Flavia tan say asawa to et manseserbi la natan diad hedkuarter na Saray Tasi nen Jehova diad New York.