Kasin Makapuy so Manermen?

Asalim lay nansakit tan aganggano kan inmabig? Nayarin pakaliknam et singa anggapoy agawa. Duma balet no maneermen ka ed impatey na inaro ed bilay. “Agbalot naandi so panermen ed impatey na inaro ed bilay,” so insulat nen Dr. Alan Wolfelt ed libro ton Healing a Spouse’s Grieving Heart. Balet inyarum to: “Diad ilabas na panaon tan suporta na arum, nabawasan so naliliknam ya ermen.”

Singa bilang, imanoen no antoy alikna nen Abraham nen inatey so asawa to. Diad orihinal ya teksto na Biblia, nabasa tayo ya “ginmapon nanermen tan nanakis si Abraham lapud impatey nen Sara.” Ipapatnag na salitan “ginmapo” ya abaybayag ton nanermenan so impatey na asawa to.a Say sakey ni et si Jacob, ya anisiaan ton pinatey na masebeg ya ayep so anak ton si Jose. Nanermenan to itan na “dakel iran agew,” tan agnaligliwa na pamilya to. Anggano pigaran taon lay linmabas, sankanonot to nin siansia so impatey nen Jose.​—Genesis 23:2; 37:34, 35; 42:36; 45:28.

Ontan met so nalilikna na dakel natan ya maneermen ed impatey na inar-aro da. Niay duaran alimbawa.

• “Inatey so asawak ya si Robert nen Hulyo 9, 2008. Singa naynay mi lan gagawaen, kayari min mangalmusal antis ya onloob ed trabaho to, angoban tan lakapen to ak, tan ibaga ton ‘I love you.’ Onman so mismon agawa ed samay kabuasan antis ya naaksidente. Anemiran taon lay apalabas balet ansakisakit nin siansia. Agla seguro naandi ermen ko ed impatey nen Rob.”​—Gail, 60 años.

• “Anggano masulok lan 18 taon ya anggapo lay inar-arok ya asawa, naiiliw ko nin siansia tan paneermenan ko ni itan. Kada no walay nanengneng kon marakdakep ed kaliberliber, sikatoy nanonotan ko. Seguradon maliket met no nanengneng to ray nanenengneng ko.”​—Etienne, 84 años.

Normal labat so ontan ya naliliknan sakit tan ermen ya mair-irap a naandi. Aliwan pareparehoy paneermen na kada sakey, tan agtayo nepeg ya husgaan so reaksion na arum ed trahedya. Kanian no singa sobra so paneermen tayo, agtayo iisipen ya makapuy itan. Panon tayon nasarag so naliliknan ermen?