Inalig Ko Iray Maong ya Alimbawa

NIYANAK ak ed Wichita, Kansas, U.S.A., nen Disyembre 10, 1936. Siak so panguloan ed apatiran sanaagi. Say atateng mi, si William tan Jean et matoor ya lingkor nen Jehova. Si tatay so company servant, say terminon uusaren ed mangidadaulod kongregasyon nensaman. Say angiyaral na katuaan ed si nanay ko et si baik ya Emma Wagner. Dakel so inyaralan nen baik, kaiba lay Gertrude Steele, ya pigay taon ya nanmisionero ed Puerto Rico.a Kanian dakel so maong ya alimbawan naalig ko.

SANKANONOT KO IRAY MAONG YA ALIMBAWA

Aminsan ya labi na Sabado nen limay taon ko, kaibak si tatay ya mangiyoopresi na saray magasin ya Watchtower tan Consolation (natan et Awake!) diad saray ondadalan. Diad saman, akibiang ed World War II so bansa mi. Walay dinmalan ya abuek a doktor tan nantamian toy tatay ko lapud neutralidad to bilang Kristiano, payakot kuno ta agto labay so mansundalo. Inyasingger toy lupa tod tatay tan imbaga ton, “Ponitim ak, sikan payakot!” Ataktakot ak pero apabilib to ak nen tatay. Intuloy toy angiyopresi na magasin ed saray mamapbantay. Insan dinmalan so sakey ya sundalo, tan imbando na doktor, “Akauley ka lad sayan payakot a!” Naimano na sundalo ya abuek so doktor kanian say kuan to, “Sempet ka la tan manpamawmaw ka!” Inmalis la ran dua. Misalsalamat ak ta tinulongan nen Jehova si tatay ya makapanpakpel. Walay duaran barber shop nen tatay ed Wichita, tan kustomer to man ya doktor!

Nen waloy taon ko, inlako na atateng mi so abung tan barber shop mi, nanggawa ray melag ya mobile home, tan inmalis kamid Colorado pian manlingkor ed mas baleg so pankaukolan. Nanayam kamid asingger ed Grand Junction, ya diman nampayunir iray ateng mi, tan nan-part time iran nankomponi na ayayep tan dinmalos ira. Lapud bendisyon nen Jehova tan seseg da, abuo so sakey ya kongregasyon diman. Nen Hunyo 20, 1948, binautismoan ak nen tatay diad karayan, tan saray arum nin angawat ed katuaan, kaibay Billie Nichols tan say asawa to. Asabi panaon, nanlingkor irad sirkito, ontan met ed anak da tan say asawa to.

Naynay min pipiulopan tan nakakatongtong nipaakar ed espiritual iramay makulikulid kimey na Panarian, lalo lay pamilyan Steele—Don tan Earlene, Dave tan Julia, Si tan Martha—tan balibali so impluensya dad siak. Impanengneng da ya no iyuna na sakey so Panarian, magmaliw ya maliket tan makabaliksan so bilay to.

INMALIS LAMET

Nen 19 ko, intagar ak nen Bud Hasty, ya kaaroy pamilya mi, ya manpayunir diad southern United States. Kinerew na manangasikaso na sirkito ya onalis kamid Ruston, Louisiana, ta dakel so inactive ya Tasi diman. Binilin to kami ya ituloy mi regular ya aral anggano pigpigaray onatendi. Akalmo kami na nayarin panaralan tan inapiger mi. Regular kamin nanaral, balet diad gapo et duara kami labat. Sublayan mi mangikondukta, kanian no siak so mangidaulo, say kaibak so taga ebat. No walay demonstrasyon, wala kamid stage ya dua kanian anggapoy audience mi! Walan siansiay inmatendi ya maedad lan sister. Ag-abayag, wala ray estudyante na Biblia, tan pigaran inactive ya akiaral met la, tan asabi panaon et binmiskeg so kongregasyon.

Aminsan, walay akatongtong mi nen Bud ya ministro na Church of Christ, tan agko kabisado iray tekston inusar to. Medyo abigla ak, tan apaisip ak ya aralen a maong so papanisiaan ko. Sakey simba ya nampuyatan kon amtaey ebat ed saray tepet to. Akatulong iman ed siak ya nipapusoy katuaan, tan eksayted ak ya makapitongtong ed arum nin ministro.

Kayari na saman, kinerew na manangasikaso na sirkito ya onalis ak ed El Dorado, Arkansas, pian ontulong ed kongregasyon diman. Legan ak ya wadman, naynay ak ya oonlad Colorado pian manpresenta ed draft board. Aminsan, kaibak ya nambiahe iray arum nin payunir, tan naaksidente kami ed Texas kanian agla nausar so kotsek. Tinawagan mi sakey ya brother tan impila to kamid abung to tan diad aral da. Inyanunsio da ya naaksidente kami, tan maar-aro kamin tinulongan na saray agagi. Inlako met na brother so kotsek na $25.

Walay apiluganan mi paonlad Wichita, ya pampapayuniran na kaaroy pamilya mi ya si E. F. “Doc” McCartney. Malet ya kaarok so kambal ya anak da, si Frank tan Francis. Walay daan ya kotse da tan inlako dad siak na $25, eksaktod samay nanlakoan koy aderal ya kotsek. First time kon asali ya inter nen Jehova so nakaukolan ko lapud iyuunak so Panarian. Diad saman ya biahe mi, inkabat ed siak na pamilyan McCartney so maganggana tan maespiritual ya sister, si Bethel Crane. Say nanay ton si Ruth et maseseg ya Tasi ed Wellington, Kansas, tan payunir anggad masulok ya 90 to. Anggapo ni sakey taon, nen 1958, nankasal kami nen Bethel tan kaibak ya nampayunir diad El Dorado.

MAKAPALIKLIKET IRAN IMBITASYON

Dakel so naaralan mid saray akalimog mi, kanian nandesisyon kamin pausar ed organisasyon nen Jehova ed anggan anton kimey. Niyasain kamin espisyal payunir ed Walnut Ridge, Arkansas. Insan nen 1962, malikeliket kamin angawat ed imbitasyon ya manaral ed koma 37 ya klase ed Gilead. Asurprisa kami ta kaklase mi si Don Steele. Ka-graduate mi, inyasain kamid Nairobi, Kenya. Makakaakis kamin inmalis ed New York, balet asalatan itan na liket nen inabet kami na saray agagi ed airport diad Nairobi!

Agustoan min tampol so Kenya tan say maliket ya ministeryo diman. Say sankaunaan ya maaligwas ya inyaralan mi et si Chris tan Mary Kanaiya. Anggad natan et matoor ni ran manlilingkor ya full-time ed Kenya. Kayari sakey taon, imbaki da kamid Kampala, Uganda, sikami so sankaunaan ya misionero ed satan ya bansa. Makapalikliket iman ya panaon ta dakel so malabay ya manaral na katuaan, tan nagmaliw iran Tasi. Balet kayari talora tan kapalduan taon ed Africa, nampamilya kami kanian pinmawil kamid America. Nen onalis kami la, mas maermen kami nen samay nen tinmaynan kamid New York. Naaro mi iray totoo ed Africa tan labay mi ompawil.

BALON ASAINMIN

Nanayam kamid Colorado, ya panaayaman na atateng mi. Ditan inyanak so panguloan mi ya si Kimberly, tan kayari 17 ya bulan, inyanak si Stephany. Seneryoso mi balon asainmin mi bilang atateng, tan insipor mi katuaan ed magagangganan anak mi. Labay mi ya aligen day maong ya alimbawa a naaralan mid arum. Napapagaan ak no iisipen ko ya anggano maabig so impluensya mid sikara, aliwa itan ya garantiya ya manlingkor irad si Jehova. Tinaynan na duaran agik so katuaan. Komon ta ompawil ira tan aligen day maong ya alimbawan impanengneng ed sikara.

Nanliketan mi impamabaleg ed ananak mi tan lanang kamin saniiba bilang pamilya. Lapud asingger kamid Aspen, Colorado, nanaral kamin man-ski pian sagpaminsan kamin makapanrelaks. Diad saratan ya impaniiba mi et nakakaistoryaan mi ray ananak mi. Manka-camping kami met ya pamilya tan maliket kamin maniistoryaan legan ya mandadangdang. Anggano ugugaw ni ra, saray tepet da et “Antoy gawaen ko ey no ombaleg ak?” tan “Siopay pilien kon piasawaan?” Impurek mi espiritual iran goal ed puso tan isip da. Impaseseg mid sikara so full-time ya ministeryo tan say piasawad brother ya ontan met so goal to. Tinulongan mi ran natalosan ya mas maong no ag-ira miasawan tampol. Walay ginawa min motto: “Marikit ni anggad 23.”

Singa ginawa na atateng mi, lanang kamin mimiaral tan regular ya manpupulong bilang pamilya. Patutuloyen mid abung iray walad full-time. Naynay mi met ya iistoryaey maliket ya impanmisionero mi. Imbaga mid sikara ya komon ta nasabi panaon et makapasyar kamin apat ed Africa. Eksayted iray anak mi ed satan.

Regular so panagaral na pamilya mi, tan iyaakto mi ray situasyon ya nayarin nagawa ed eskuelaan. Sikaray onakto ya Tasi tan ebatan da ray tepet. Na-enjoy da itan ya panagaral, tan awalaan iray kompiyansa. Nen baleg la ra, no maminsan et manreklamo ra ed panagaral na pamilya mi. Aminsan, lapud akapasnok ak, imbagak ya onla la rad kuarto da tan agkami la manaral. Abigla ra tan manakis ira tan imbaga dan labay day manaral. Diman mi atalosan ya onsasabid puso na ananak mi iray espiritual a bengatla. Naaralan dan pablien so panagaral, tan imbaga mid sikaran ibaga da labat so iisipen da. Balet no maminsan, medyo napapagaan kami no ibaga dan agda panisiaay arum ya aaralen mi. Pero, naamtaan mi lanlamang no antoy walad puso ra. No nipaliwawa mid sikara, awaten day panmoria nen Jehova.

PAN-ADJUST ED ARUM NIN PANANGUMAN

Agmi naimano so maples ya inlabas na panaon na impamabaleg mid ananak mi. Diad tulong tan panangigiya na organisasyon nen Jehova, ginawa mi anggaay nayarian min pabalegen ira ya aroey Jehova. Misalsalamat kami nen nampayunir iray mamarikit mi ka-graduate dad haiskul, tan akaaral iray skill pian nasuportaay sarili da. Linma rad Cleveland, Tennessee, kaibay duaran sister pian manlingkor ed baleg so pankaukolan. Nailiw mi ran maong, balet maliket kami ta uusaren day bilay da ed full-time a panaglingkor. Nampayunir kami lamet nen Bethel, tan wala ray makapalikliket ya pribilehyo mi. Nanlingkor kamin kasandin manangasikaso na sirkito tan tinmulong kamid saray kimey ed kombension.

Antis ya linmad Tennessee iray anak mi, linma ni rad London, England, tan pinmasyar irad branch office. Diman akabat nen Stephany, ya diad saman et 19 to, si Paul Norton, kabataan ya Bethelite. Diad sakey nin biahe da, akabat nen Kimberly so katrabaho nen Paul, si Brian Llewellyn. Nankasal si Paul tan Stephany—nen kayari ton nan-23. Kayari sakey taon, nankasal si Brian tan Kimberly—nen 25 to. Kanian nansiansia ran marikit anggad 23. Makakaliket kamid pinili ran piasawaan.

Imbaga na ananak mi ya akatulong so alimbawa mi tan na laki tan bai ra pian naunor day ganggan nen Jesus ya ‘itultuloy ya anapen nin unona so Panarian,’ anggano wala ray problema dad pinansyal. (Mat. 6:33) Nen Abril 1998, naimbitaan si Paul tan Stephany ya manaral ed koma 105 ya klase ed Gilead, tan niyasain irad Malawi, Africa. Naimbitaan met si Brian tan Kimberly ya mantrabahod London Bethel insan da ra inyalis ed Malawi Bethel. Talagan malikeliket kami ta anggapo lay mas marakep ya pangusaran na saray kabataan na bilay da nen say panlingkor ed si Jehova.

SAKEY NIN MAKAPALIKLIKET YA IMBITASYON

Singa imbagak ed gapo, nen Enero 2001 et tinawagan ak nen Brother Marais, say overseer ed Translation Services. Imbaga to ya walay oorganisaen dan kurso ed English comprehension parad saray translator ed interon mundo, tan diad edad kon 64, labay da ak ya ipasal a magmaliw ya sakey ed saray instruktor. Impikasi min sanasawa itan, tan tinepetan mi ray maedad la ran nanay mi no antoy nisimbawa ra. Parehon labay da ya onla kami, anggano nataynanan mi ra. Tinawagan koy Brother Marais tan imbagak ya malikeliket min awaten iyan balibalin pribilehyo.

Insan naamtaan min walay cancer nen nanay ko. Imbagak ya agkami la onalis pian natulongan koy agik ya si Linda diad pangasikasod sikara. “Andi, agyo ’tan gagawaen,” so kuan nen nanay ko. “Maermen ak no agkayo onla.” Ontan met so alikna nen Linda. Talagan naapresya mi inkamasakripisyo da tan say tulong na kakaaro mi! Kayari sakey agew kaalis mi paonlad Watchtower Educational Center diad Patterson, tinmawag si Linda tan imbaga ton inatey lay nanay. Ginawa mi impaseseg tod sikami ya manpokus ed balon asainmin mi.

Agaylay liket mi nen naamtaan min say unaan ya asainmin mi et diad Malawi branch, ya panlilingkoran na saray anak tan manugang mi. Reunion man! Insan kami nambangat ed Zimbabwe tan diad Zambia. Kayari talora tan kapalduay taon ya impanbangat mi, pinapawil da kamid Malawi pian amtaen tan ireport iray eksperiensya na saray Tasi ya apasegsegang lapud impansiansia dan neutral.b

Nen 2005, alikna mi lamet so ermen nen onsempet kami lad Colorado, ya nampayuniran mi nen Bethel. Nen 2006, nanayam lay Brian tan Kimberly ed abay na abung mi pian asikasoey duaran anak da, si Mackenzie tan Elizabeth. Wala nin siansiad Malawi si Paul tan Stephany, tan membro na Branch Committee si Paul. Natan et ngalngalik la 80, tan malikeliket ak ya nanengneng iray kabataan ya brother ya pigay taon kon akaiba tan natan et sikara lay manggagawad saray responsabilidad ko nensaman. Say sakey ya lapuan na liket mi et saray inalig min maong ya alimbawa parad pankaabigan na saray anak tan apo mi.