Akaaral Ak Diad Impiulop Kod Saray Marunong

SAKEY a kabuasan ed Brookings, South Dakota, U.S.A., ambetebetel so siplog na dagem. Anonotan ko ya magano lan man-winter ed satan ya lugar. Balet, ompan mankelaw kayo no naamtaan yon diad satan ya agew et wala kamid kuwadra na ayayep tan nekeketel kami la. Akaalagey kamid abay na pampapainuman na ayayep ya nankargay ambetebetel ya danum! Istoryaen kod sikayoy agawa pian natalosan yo.

SAY PAMILYAK

Nianak ak nen Marso 7, 1936, tan siak so bolirek ed apatiran sanaagi. Manaayam kamid melag ya farm ed eastern South Dakota. Importante ed pamilya mi so panagdalus, balet aliwan satan so sankaimportantian. Abautismoan iray atateng ko bilang Tasi nen Jehova nen 1934. Indedika day bilay dad si Aman Jehova kanian prayuridad dan gawaey linawa to. Say company servant (natan et tatawagen ya coordinator na ulop na mamatatken) ed melag ya kongregasyon mid Conde, South Dakota et si tatay kon Clarence tan ag-abayag et si uncle kon Alfred.

Regular ya kabiangan na rotina na pamilya mi so piaral tan pampulong ed kaabungan pian ipaamtad arum so ibabaga na Biblia ya balibalin ilalo ed arapen. Baleg so epekto ed sikamin sanaagi na alimbawa tan panangipasal na atateng mi. Nagmaliw kamin manangipalapag nen atsik Dorothy nen anem taon mi. Nen 1943, nampa-enroll ak ed Teokratikon Eskuelaan Parad Ministeryo, ya balo ni labat a kabiangan na aral tayo ed saman.

Saray kombension tan asemblea et importantin parte na bilay mi. Si Brother Grant Suiter so ombibisitan espiker ed kombension nen 1949 diad Sioux Falls, South Dakota. Natandaan ko ni paliwawa ton “Mas Masakbay nen Say Iisipen Mo!” Indanet ton kaukolan a mas mankuli so amin ya dedikadon Kristiano ed pangipulong na maong a balita na niletneg lan Panarian na Dios. Atan so amakiwas ed siak ya idedikay bilay kod si Jehova. Diad sinmublay ya sirkiton asemblea ed Brookings, wala ak ed samay ambetebetel ya panagpainuman na ayayep ya imbagak ed gapo, tan aalagaren koy turnok ya manpabautismo. Apatira kamin nampabautismo ed metal ya baptismal “pool” nen Nobyembre 12, 1949.

Implanok so manpayunir, tan ginmapo ak nen Enero 1, 1952 nen 15 so taon ko. Ibabaga na Biblia: “Samay miuulop ed marunong et magmaliw a marunong,” tan dakel so marunong a kapamilyak ya anuporta ed desisyon kon manpayunir. (Pro. 13:20) Si Uncle Julius ya 60 to lad saman so partner kod panagpayunir. Anggano baleg so agwat na edad mi, malikeliket so ulopan mid ministeryo. Dakel so naaralan kon praktikal ya karunongan diad saray eksperiensya to. Ag-abayag et nampayunir met si atsik Dorothy.

PERSONAL YA INTERES NA SARAY MANANGASIKASO NA SIRKITO

Manlapud inkaugaw ko, pampupundoen na atateng ko iray manangasikaso na sirkito tan kaasawaan da diad abung mi. Say sakey ya sanasawan baleg so nitulong dad siak et si Jesse tan Lynn Cantwell. Akatulong so impamaseseg dad siak pian manpayunir ak. Lapud personal ya interes ya impanengneng da, apakiwas ak ya manplano na saray teokratikon kalat. No diad asingger iran kongregasyon so pambibisitaan da, no maminsan et imbitaan da ak ya mipaway ed sikara. Talagan apaseseg tan na-enjoy koy impiulop kod sikara!

Say sinmublay ya manangasikaso na sirkito mi et si Bud Miller, kaibay asawa ton si Joan. Diad saman et 18 ko la tan tinawag ak na draft board ya mansundalo. Nen unaan, inikdan da ak na kimey ya pakaliknak et kontrad ganggan nen Jesus nipaakar ed pansiansian neutral ed politika. Sakey ni, labay kon ipulong so maong a balita na Panarian. (Juan 15:19) Kanian inmapela ak ed draft board pian bidbiren da ak ya ministro.

Apaseseg ak ta namboluntaryo si Brother Miller ya ibaan to ak ed bista na draft board. Sipor ya makpel tan aliwan mabaing si Brother Miller. Naarumay pakpel ko ta maespiritual so kaibak! Lapud saman ya bista, diad pansampot na summer nen 1954 et binidbir na draft board ya sakey ak a ministro. Kanian namplano ak lamet na sakey nin teokratikon kalat.

Diad saman a taon et akaawat ak na imbitasyon ya manlingkor ed Bethel, diad Watchtower Farm ed Staten Island, New York. Nanlingkor ak diman na ngalngali taloran taon. Dakel so balibalin eksperiensyak ta amayamay so akabat tan akatrabahok ya marunong.

IMPANLINGKOR ED BETHEL

Diad farm ed Staten Island et walay istasyon na radyo ya WBBR. Gawa itan na Saray Tasi nen Jehova manlapud 1924 anggad 1957. Manga 15 anggad 20 labat ya Bethelite so niasain ed farm. Dakel ed sikami so ugugaw tan agni eksperiensyado. Balet kaiba mi si Eldon Woodworth, sakey a matatken ya alanaan a brother. Sikatoy marunong tan singa ama, kanian napapabiskeg kamid espiritual. No naiirapan kami lapud kakapuyan na arum, oniay ibabaga nen Brother Woodworth: “Makapadinayew so agawaan la na Katawan tan say gawaen to ni ed arapen.”

Akaiba mi met si Brother Frederick W. Franz. Say karunongan tan aralem ya kakabatan tod Kasulatan et baleg so impluensya tod sikamin amin, tan walay panangiyansakit tod kada sakey ed sikami. Si Harry Peterson so managluto mi; mas mainomay ya bitlaen so apelyido to nen say ngaran to ya Papargyropoulos. Sikatoy sakey met ya alanaan tan talagan maseseg ed ministeryo. Makuli si Brother Peterson ed trabaho tod Bethel balet agto papaulyanay panagpulong. Nilasus ya magasin tayo so niyoopresi to kada bulan. Amayamay met so amta tod Biblia tan naeebatan toy dakel ya tepet mi.

AKAARAL AK ED SARAY MARUNONG YA SISTER

Saray naaani ed farm et iprepreserba. Kada taon, manga 45,000 ya garapon na prutas tan pisipising so iprepreserba mi parad pamilyan Bethel. Akatrabahok ditan si Etta Huth, sakey a marunong ya sister. Sikato so makaamtad recipe na saray iprepreserba mi. No dakel so ipreserba mi, mangiba iray sister ya taga diman, tan si Etta so mangorganisa ed kimey da. Anggano importante so trabaho nen Etta, maong ya alimbawa ed panagrespetod saray brother ya mangaasikaso ed farm. Parad siak, sikatoy maong ya ehemplo na pampasakop ed teokratikon inkaulo.

Say sakey ed saray marikit ya manboboluntaryo et si Angela Romano. Si Etta so tinmulong ed sikato nen inawat toy katuaan. Kanian legan kon manlilingkor ed Bethel, wala lamet so akabat kon marunong ya sister, tan natan et 58 taon ko lan kaiba ya manlilingkor. Nankasal kami nen Angie nen Abril 1958, tan nanliketan mi dakel ya pribilehyo na panaglingkor. Diad dakel a taon, baleg so nitulong na katooran nen Angie ed si Jehova pian mansiansian mabiskeg so panamaley mi. Talagan sikatoy nailaloan ko ed anggan anton subok ya nadalan mi.

SAY IMPANMISIONERO TAN IMPANBISITA MI

Nen inlako so WBBR diad Staten Island nen 1957, nanlingkor ak ya agano ed Brooklyn Bethel. Insan kami nankasal nen Angie kanian pinmaway ak ed Bethel tan manga taloy taon kamin nampayunir ed Staten Island. Asalik so nantrabaho ed balon makanggawa na istasyon na radyo, ya say tawag da et WPOW.

Desidido kami nen Angie ya pansiansiaen a simpli so bilay mi pian naynay kamin akaparaan a manlingkor ed anggan iner ya walay pankaukolan. Kanian nen 1961 et akaparaan kamin awaten so asainmin ya manlingkor bilang espisyal payunir ed Falls City, Nebraska. Nen wadman kami la, naimbitaan kami ya onatendid Kingdom Ministry School, a diad saman et sakey bulan ya kurso diad South Lansing, New York. Na-enjoy mi impanaral mi tan iilaloan min nausar mi itan ya impangipasal diad Nebraska. Kanian asurprisa kamin akaawat na balon asainmin​—bilang misionero ed Cambodia! Marakdakep iman ya bansa ed Southeast Asia. Balo ed sikami iray nanenengneng, narerengel, tan naaangob mi. Eksayted kamin mangipulong ed maong a balita diman.

Balet anguman so situasyon na politika, kanian kaukolan mi onalis ed South Vietnam. Makapaermen ta manga duay taon mi ni labat diman et nansakit ak na grabe, kanian imbaga dan sarag mi onsempet. Kaukolan so panaon pian napapawil so biskeg ko, tan nen kinmasil ak la, nampayunir kami lamet.

Nen Marso 1965, apribilehyoan kamin manlingkor ed panagbiahen kimey. Diad 33 taon, na-enjoy mi nen Angie so kimey ed sirkito tan distrito, kaiba la ray kimey antis tan legan na kombension. Malikeliket ak no kombension, kanian labalabay koy ontulong pian naorganisa irayan okasyon. Pigaran taon ya wala kamid New York City, tan aminpigapiga kamin nankombension ed Yankee Stadium.

SAY IMPAWIL MID BETHEL TAN SARAY TEOKRATIKON ESKUELAAN

Singa saray arum nin walad special full-time, dakel iray eksayting tan ambelat ya asainmin mi nen Angie. Singa bilang, nen 1995 et niyasain ak ya manbangat ed Ministerial Training School. Kayari taloy taon, naimbitaan kamid Bethel. Makapaliket so ompawil ed ginapoan na special full-time ya panaglingkor ko, masulok ya 40 taon lay apalabas. Asalik so nanlingkor ed Service Department tan nambangat ed pigaran eskuelaan. Nen 2007, saray eskuelaan ya ibabangat ed Bethel et inyan na Mananguley ya Ulop ed balon Theocratic Schools Department, tan pigaran taon ya apribilehyoan ak ya mangasikasod satan.

Diad agano ni et wala ray importantin pananguman ed teokratikon edukasyon. Inggapo so Eskuelaan Parad Saray Elder ed Kongregasyon nen 2008. Kayari duay taon, masulok ya 12,000 ya elder so nanaral ed Patterson tan Brooklyn Bethel. Tuloytuloy ni itan ya eskuelaan diad nanduruman lokasyon, tan wala ray impasal ya manbangat. Nen 2010, say Ministerial Training School et tinawag lan Bible School for Single Brothers, tan walay balon eskuelaan ya Bible School for Christian Couples.

Kagapo na 2015 ya serbisyon taon, impaniba la iratan ya duaran eskuelaan tan nagmaliw ya School for Kingdom Evangelizers. Nayarin manaral ditan iray sanasawa odino single. Amayamay so eksayted nen naamtaan dan satan ya eskuelaan et gawaen diad nanduruman branch. Makapaliket ya nanengneng ya onlalaknab so teokratikon edukasyon tan misalsalamat ak ta dakel so akabat kon akaparaan ya paipasal.

No nodnonoten koy bilay ko manlapud samay impanpabautismok ed pampapainuman na ayayep, misalsalamat ak ed si Jehova lapud saray marunong ya tinmulong ed siak ed dalan na katuaan. Nandurumay edad tan kultura da, balet diad puso ra et maespiritual ira. Say mabiskeg ya panangaro rad si Jehova et sankanengneng ed saray kiwas tan ugali da. Diad organisasyon nen Jehova, dakel iray marunong ya napiulopan tayo. Atan so ginawak tan talagan akaaral ak.