Antoy Makatulong ed Sikatayo Pian Makatalindeg a Malet ed Pananisia?
1 Nanlapula’d impilimog tayo ed organisasyon nen Jehova, say aligwas tayo ed espiritual so apaneknekan a lapuan na gayaga tayo! Ingen, pian mansiansian ‘nilamut, nipaalagey, tan niletneg ed pananisia,’ nakaukolan so pantultuloy ya ibulaslas ed espiritual. (Col. 2:6, 7) Anggaman maslak so binmulaslas la ed espiritual, arum so niagus lapud insaew dan “ontalindeg a malet ed pananisia.” (1 Cor. 16:13, NW) Napaliisan tayon nagawa iya ed sikatayo. Panon?
2 Mantultuloy ed Maespiritual a Kimey: Iletneg so maabig ya espiritual a rotina ed loob na organisasyon nen Jehova. Dia et naasikason maong iray espiritual a pankaukolan tayo. Saray miting ed kongregasyon, asamblea, tan kombension so mamaligsa ed sikatayo ed pirmin ibubulaslas tan kiletneg ed espiritual, no sikatayoy naynay ya onatendi pian anien iray gungguna. (Heb. 10:24, 25) Say regular a rotina ed panagbasay Biblia, saray magasin a Panag-Bantayan tan Awake!, tan saray libro a manisingbat ed anawet a tagano ed Salitay Dios so mamaaralem tan mamaelet ed espiritual iran lamot tayo. (Heb. 5:14) Say pangiletneg na personal ya espiritual iran kalat insan makulin pankimeyan iratan so mangitarok met na magnayon iran gungguna.—Fil. 3:16.
3 Tulong Manlapud Saray Matakken ed Espiritual: Panggunaetan ya inatnat so pilimog ed saray matakken ed espiritual ed loob na kongregasyon. Kabaten iray mamatatken, ta sikaray manunan makapabiskeg ed sikatayo. (1 Tes. 2:11, 12) Awaten so antokaman a simbawa odino saray suhestion ya ibaga ra. (Efe. 4:11-16) Interesado met iray ministeryal a lingkor ya ontulong ed arum pian napaelet ed pananisia, kanian asinggeran irayan agagi parad kapaseseg.
4 Kasin kaukolan yoy tulong ed ministeryo? Mitongtong ed mamatatken, tan patulongan. Nayarin napibali kayo ed programan Pananulong na Saray Payunir ed Arum. Kasin agano kayo nin abautismoan? Say panaral ed libron Our Ministry tan say pangiyaplika ed saray lugan na satan so mamaaligwas ed itatken ed espiritual. Kasin sakey kayon ateng? Mantultuloy a pabiskegen so espiritualidad na ananak yo.—Efe. 6:4.
5 Diad kilamot tan kiletneg ed pananisia et napanggayagaan tayoy maapit a relasyon ed si Jehova tan maligsan pililimog ed agagi tayo. Ontulong iya ed sikatayon natalindegay panangataki nen Satanas, tan onelet so ilalo tayo ed andi-anggaan ya arapen.—1 Ped. 5:9, 10.