Tulong a Mainomay a Naromog
1. Panon ya onletey so espiritualidad na sakey?
1 Si Anna, sakey ya agin bii a walaan na agmananisian asawa tan okupado ed trabaho to, so naiirapan ya onatendi a regular ed saray Kristianon pantitipon, mibiang ed ministeryo, tan manaral na Salitay Dios. Anggaman inaro to ni si Jehova, sikatoy nagmaliw ya inaktibo. Makapaliket, sikatoy akaawat na espiritual a tulong manlapud mangiyaansakit iran mamatatken.
2. Diad anton dalan a napaneknekan na amin a Kristiano a sikaray tulong a mainomay a naromog?
2 Say pangawat ed espiritual a tulong ya iyoopresi panamegley na Kristianon kongregasyon so pakapatnagan na panagmatalek ed si Jehova a mismo. Bilang panangalig ed maaron panangiyansakit nen Jesu-Kristo, saray mamatatken ed kongregasyon so manaanap na saray pankanawnawan makapanginabang na panamaseseg tan praktikal a tulong ed saramay manasagmak na espiritual a kairapan. (1 Tes. 5:14) Mabetbet, nayarin say nakaukolan labat et sakey a mapangasin salita ya akasentro ed makapaseseg a Kasulatan. Parad amin a Kristianos so pambulon ya ontulong ed saramay temporaryon linmetey, aliwan parad saray mamatatken labat. Seguradon balang sakey ed sikatayo so akaeksperiensya la ed pakapanyari na “salita a makana so kisalita to.”—Uli. 25:11; Isa. 35:3, 4.
3, 4. Antoy nalalanor ed panulong ed arum, tan panon tayon nagawaan itan?
3 Manbulon lan Onkiwas: Kakaukolanen na pangipatnag na maaron interes ed saramay mankaukolan na tulong so pambulon tayon onkiwas, pangipatnag na panangabagey, tan inkasimoon. Sanen naamtaan nen Jonatan so makapagonigon a situasyon nen David, sikatoy “inmalagey, tan linma ed David ed kakiewan, tan pinabiskeg to so lima to.” (1 Sam. 23:15, 16) Tulongan so arum ed matamoy a paraan. Saray balikas ya atekepan na puron panangiyansakit et mansumpal ed sankaabigan iran resulta. Sakey ni, malinew ya inyilustra nen Jesus a say inkaseet, tan walaan na gagalan pansagpot so nalalanor pian napapawil so agi. (Luc. 15:4) Say pakawalaan na masimoon a pilalek a natulongan so arum et mamakiwas ed sikatayon mantultuloy ed pangiyopresi na tulong anggaman agtampol napatnagan so iyaaligwas.
4 Agaylan makapaseseg sano manbulon itayo lan onkiwas pian imbitaan so arum, a singa saramay kaiba tayo ed panagaral na libro, a miulop ed sikatayo ed ministeryo! Legan tayon tutulongan so kapara tayon lingkor nen Jehova a mibiang ed ministeryo, nayari tayon anamoten itan a pankanawnawa pian pasesegen itan a sakey. Say ontan a magayagan panaon a saniiban inusar ed panaglingkor ed si Jehova so nagkalalo lan makapaseseg ed saramay papapawilen day espiritual ya inkabalanse ra.
5. Diad pigaran sirkumstansya, anton tulong so nayarin iyopresi na saray mamatatken?
5 Sakey a Maaron Probisyon: Saramay ag-akapibiang ed panagpulong a kimey odino ag-akapilimog ed kongregasyon ed loob na pigaran panaon so nayarin mankaukolan na kaaruman a tulong pian pabiskegen so pananisia ra. Ompan say nakaukolan labat et personal a pangiyaral na Biblia ed publikasyon a singa say Dayewen so Alenleneg a Tuan Dios, Onapit ed si Jehova, odino Anto so Peteg ya Ibabangat na Biblia? Lapud say too et bautismado met la, kaslakan et agla ombayag so panangiyaral. Say Komite Parad Serbisyo na Kongregasyon so nepeg ya alerton mangimano no siopa so nayarin nagunggonaan ed sayan probisyon.—Nengnengen so “Tepet” ed Nobyembre 1998 tan Nobyembre 2000 iran paway na Ministeryo Tayo ed Panarian.
6. Panon ya apapawil na agin bii so espiritual a biskeg to?
6 Si Anna, ya asalambit ed gapo, so misalsalamat ya angawat ed opresi na mamatatken a sikatoy iyaralan na Biblia na matatken ed espiritual ya agin bii. Kinaukolan labat so amipat ya impanaral pian sikatoy natulongan lan onapit lamet ed si Jehova. Inmatendi lamet ed saray pantitipon na kongregasyon tan apabiskeg lamet so pilalek ton idayew ed publiko si Jehova a Dios. Say matatken ed espiritual ya agin bii so tinmulong met ed sikato ed ministeryo diad impangitagar ed sikato ed arum niran iyaaralan na Biblia ya anggad apabiskeg la pian manpulong ed kabkaabungan. Say kinaukolan to labat et say mapangasin tulong pian nituloy to lamet so espiritual a kimey to!
7. Antoray nagunggona ed panamabiskeg ed arum ed espiritual a paraan?
7 Say pamabiskeg ed saramay mankaukolan et mangitarok na bendisyon ed amin. Say sakey a natutulongan et panggayagaan toy inkaliket na pakaapit ed si Jehova tan pakapibiang ed aktibidad na organisasyon To. Maliket iray mamatatken a makaimano ed ontan ya espiritual ya iyaaligwas. (Luc. 15:5, 6) Say kongregasyon so makapankakasakey no ipatnag na amin so maaron panangiyansakit ed sakey tan sakey. (Col. 3:12-14) Peteg a walaan itayo na maabig a rason pian aligen si Jehova, sakey a tulong a mainomay a naromog!—Efe. 5:1.