No Panon a Paaligwasen so Abilidad a Mankatunongan
1 Say sakey a kabaliksan na salitan “katunongan” et “pitongtong ed sakey ta pian naimpluensiaan iray kiwas odino opinyon to.” Ta pian napaaligwas so inkaepektibo yo ed ministeryo, kaukolan yon bayuboan so abilidad a mankatunongan ed saramay naabet yo. (Gawa 17:2-4) Balet panon yon napaaligwas iyan dunong?
2 Onggapo Itan Diad Pandalepdep: Sano aaralen iray katuaan na Biblia, makatulong so panmolimoli ed materyal. No medyo mairap iray punto, ipanaon so pan-research tan pandalepdep ed saray ebat. Panggunaetan a talosan a maong ya aliwa labat lan saray nitaryan eksplinasyon noagta ontan met ed Makasulatan iran rason parad saraman ya eksplinasyon.
3 Nasasaglawi so Pamparaan Parad Ministeryo: Isipen no panon yon ipaliwawa so katuaan ed nanduruman klase na totoo. Mamalesa na makatenyeg-kanonotan a tepet a managyat na interes. Determinaen no panon ya ikonekta ed Makasulatan a punto tan mankatunongan unong ed satan. Ilaloan iray isusuppiat a nayarin onlesa, tan isipen no panon a singbaten iratan. Ipaimano ed publikasyon ya iyoopresi so sakey a pabitar a mitukoyan a tuloy ed satan.
4 Tumboken so Ehemplo nen Jesus: Inletneg nen Jesus so sankaabigan a pangaligan na epektibon panagkatunongan manlapud Kasulatan. Pian naanalisa no panoy impanbangat to, konsideraen so salaysay a naromog ed Lucas 10:25-37. Imanoen iyan paraan: (1) Direktan ipaimano so Kasulatan sano eebatan iray tepet na totoo. (2) Kerewen so opinyon da, tan komendaan ira sano mitukoyan iray komento ra. (3) Seguroen a misiglaotan so Kasulatan ed tepet da. (4) Mangusar na ilustrasyon a makasagyat pian naseguron natalosan so peteg a kabaliksan na ebat.—Nengnengen so Marso 1, 1986, a Watchtower, pahina 27-8, parapo 8-10.
5 Usaren so Niiter ya Uusaren: Nipalapag so Reasoning From the Scriptures bilang libron uusaren ed ministeryo. Saray introduksion, pangebat ed saray manamaer na tongtongan, tan saray makatunongan a punto na satan so ontulong ed sikatayon napaaligwas so abilidad tayon mankatunongan. Say libron Reasoning so makanakanan uusaren a lawas tayon awiten no manpulong tayo tan makpel tayon usaren sano mitotongtong tayo nipaakar ed Biblia. Repasoen so pahina 7-8 na libro no panon a makagunggunan tuloy ya usaren itan.
6 Say pamaaligwas yo’d abilidad a mankatunongan so mamaaligwas ed dunong yo ed panagpulong tan panagbangat a kimey. Manresulta iya ed mayaman iran bendision ed sikayo tan ed saramay naabet yo ed ministeryo.