Tepet
◼ Kasin matukoy so ontipak sano niyanunsio so inkipawil (reinstatement)?
Lapud maaron-panangasi to, intarya nen Jehova a Dios so Makasulatan a paraan parad saray magbabawin managgaway mauges a nagamoran lamet so pabor to tan nipawil ed loob na Kristianon kongregasyon. (Sal. 51:12, 17) Sano nagawa iya, napapaseseg itayo a paletan so aro tayo ed saratan a masimoon a managbabawi.—2 Cor. 2:6-8.
Anggaman ed agaylan gayaga tayo sano nipawil so sakey a kanayon odino kabkabat tayo, say deen tan dignidad so ontalona ed panaon na kiyanunsioy kipawil na too ed loob na kongregasyon. Asaglawi ed onian paraan ed Panag-Bantayan na Oktubre 1, 1998, pahina 17: “Anggaman ontan, nepeg tayon tandaan a maslak ed kongregasyon so agmikabisado ed partikular iran sirkumstansia ya angitonton ed inkaekal na sakey a too odino ed inkipawil to. Niarum ni, nayarin walay pigaran personal a naapektaan odino asakitan—anganko et manbayag ni ingen—ed gawan-mauges na sakey a managbabawi. Kanian, say pagmaliw a sensitibo ed ontan iran pamaakaran sano niyanunsio so kipawil et natalosan ya amperen tayoray balikas na panangabrasa anggad nagawaan la itan ed personal a paraan.”
Anggaman malikeliket itayo lapud kipawil na sakey ed katuaan, agmatukoy so ontipak ed kiyanunsio na inkipawil to.
◼ Nisengeg ed pinasimplin uksoyan tayon panangibunog ed literatura, antoran pananguman so nayarin gawaen tayo sano mangiyopresi na literatura diad panagpulong ed karsada?
No manpupulong ed karsada, matukoy so iyasingger ed too a sankaegnaan tayo iray magasin odino publikasyon. Anggaman ontan, agtayo labay a basta labat la iderew so literatura tayo ed anggan siopan too a mangawat ed satan. Say kalat tayo et say pakapitongtong ed totoo. Diad ontan et nadetermina tayo no kasin interesado so too tan labay ton basaen iray publikasyon tayo. Nayari met ya ipaliwawa a say kimey tayo so gagawaen na saray boluntaryo tan aliwan negosyo, noagta satan so susuportaan panamegley na saray boluntaryon kontribusyon ed sankamundoan.
Anggaman ontan, dakel ed saramay naaabet tayo ed saray karsada so maganat kanian mairap tayon naamtaan no interesado ira. No ontan so kipapasen, magmaong no iyopresi tayo labat so sakey a tract a managyat na interes da parad literatura tayo dia ed arapen.
No itultuloy tayoy mankimey ed karsada diad sakey a pasen, sikatayoy nakabkabat la na totoo tan saya so nayarin mangilukas na pantongtong, a mangiter ed sikatayo na magenap a panaon pian natebek no kasin interesado ira.