‘Anto Kasi Nagawaan Ko?’
1 ‘Anto kasi nagawaan ko?’ Maseguron ontan a tepet so sankanonot na saray membro na melag ya ulop a manaaral na Biblia ya inorganisa nen Charles Taze Russell nen dekaday 1870. Leleg a sikaray ombubulaslas ed pakatalos da ed linawa na Dios, nanumamengan na saraman ya Estudyante na Biblia no antoy nagawaan da pian natulongan so arum a makaaral nipaakar ed gagala na Dios. Talagan abalbaleg a kimey pian nipasabi ed intiron mundo so pikakabat ed Biblia a nagagamoran da.
2 Makapaliket parad sikatayo ta ayarian da itan ya angat. Panon? Ginawa na balang sakey so ompatnag a melmelag a nagawaan to, kanian natan et bantog la ed sankamundoan iray Tastasi nen Jehova—sakey ya organisasyon na ngalngali la anemiran milyon a manangiyabawag na Panarian a manlilingkor ed manga 90,000 a kongregasyon diad 234 a daldalin tan isla!—Isa. 60:22.
3 Iter so Sigpot a Suporta Yo: Makana parad balang sakey ed sikatayo so pakapibiang ed say abalbaleg a kimey ya impasakbay nen Jesus a nagawa ed sarayan kaunoran ya agew. (Mar. 13:10) Seguradon aglambengat nipabtang iyan kimey ed limitadon bilang na mamatatken; nisay say panagpulong et nipasakbat lambengat ed saray payunir. Diad tua, amin a dedikadon Kristiano so walaan na importantin betang a gawaen. Amin tayo so makapibiang ed arum a nengneng na panagpulong. (1 Tim. 1:12) Diad antokaman a kalaknab na panggawa tayo ed saya, nagunggunaan tayoy inkasikatayo ontan met ed arum.—1 Tim. 4:16.
4 Balang sakey so makapangiter met na sigpot a suporta ed Kristianon impanaagi tayo ed arum niran makabaliksan a paraan. Nasuportaan tayo iray miting ed kongregasyon diad iyatendi a regular tan diad maligsan pibibiang. (Sal. 122:1, 8, 9) Nagawaan tayoy betang tayo pian mansiansian malinis ed moral so kongregasyon. Makapangiter tayo na pinansyal a suporta parad sankamundoan a kimey, unong ed nayarian tayo. Makapibiang itayo ed panlinis na Kingdom Hall. Amin so makapangiyalibansa na ampetang ya espiritu na aro tan pankakasakey ed kongregasyon diad panulong ed saray balo ni, saray kalangweran, tan ontan met ed saray maedad la.—Col. 3:12, 14.
5 Kanian nitepet yo met, ‘Anto kasi nagawaan ko?’ Anggaman singa melag iray sagpot yo bilang indibidual, diad panggawa yo ed betang yo, makakatulong kayo ed mabiskeg, aktibo, tan mabunigas a kongregasyon. Kanian amin tayo so walaan na makanan betang diad pangigalang ed ngaran nen Jehova!