Kasin Mabaing Kayo?
1 Agtayo pankelawan no makanengneng tayoy ugaw a taktakiling ed sikatayo a walad beneg na ina odino ama to. Natural labat ed ugaw so inkamabaing. Anggano matakken et dakel so talagan mabaing. No naapektaan so pibibiang yo ed ministeryo lapud inkamabaing, anto kasi nagawaan yo?
2 Talonaan so Inkamabaing: Importanti ya imanoen so “niamot a too na puso.” (1 Ped. 3:4) Pabiskegen so panangaro yo ed si Jehova tan ed kaparan too. Sigpot a kombinsindon say panumpal ed panagpulong a kimey et sakey ed sankaabigan iran paraan pian nipanengneng so dilin-panagsakripisyon aro. Panggunaetay maabig a rotina na personal a panagaral tan iyaatendi ed miting. Regular tan espisipikon manpikasi ed tulong nen Jehova. Say mabiskeg a pananisia tan talek ed sikato so mamabiskeg na kompiyansa tan mangiter na ‘nagnap a tepel a pansalita ed salita na Dios ya anggapoy takot.’—Fil. 1:14.
3 Labanan so liknaay agpakasarag. Ompatnag ya onia so kaukolan a gawaen nen Timoteo. Pinaseseg nen Pablo si Timoteo ya “anggapo komon so manmudmora ed kaugawan [to],” a sikatoy pinanonotan ya “ag-itayo inikdan na Dios na espiritu na katakotan, noag say pakayari.” (1 Tim. 4:12; 2 Tim. 1:7) Si Timoteo so sigpot ya inusar nen Jehova, a mangusar met ed sikayo no panggunaetan yoy onaligwas tekep na sigpot a kompiyansa ed Sikato.—Sal. 56:11.
4 Diad impanmolimoli ed sakey a teksto a singa say Mateo 10:37, atulongan so sakey ya agin bii ed inkamabaing to lapud takot to ed sumpan asawa to. Diad impantultuloy to, mainomay to lay manpulong, tan ag-abayag et nagmaliw a Tasi so asawa to, ina to, tan saray agagi ton lalaki!
5 Importanti so Panagparaan: Naaruman so kompiyansa yo sano manparaan kayon maong ed ministeryo. Mamili na simplin presentasyon manlapud libron Reasoning odino diad apalabas iran paway na Ministeryo Tayo ed Panarian, aralen, tan insayoen itan. Imbes a panaburidoan, mannonot a positibo. Gamoray tepel diad maapit a pikimey ed arum. Nodnonoten a dakel ed totoon naabet yo ed kaabungan so mabaing met a singa sikayo. Nakaukolan na balang sakey so mensahe na Panarian.
6 No mabaing kayo, agnadidismaya. No onkiwas kayo, tulongan kayo nen Jehova a magmaliw ya epektibon manangipulong ed maong a balita. Diad ontan panggayagaan yoy ministeryo yo.—Uli. 10:22.