Kasin Mansusungdo Kayo?
1 “Anggapo so babaleg a liket ko nen say saya, . . . a saray ana’ko manaakar ira ed katuaan.” (3 Juan 4) Say impansungdo na espiritual ya ananak nen Juan so angitarok ed sikato na pirmin gayaga. Agaylan liket na mangatatawen ya Ama tayo no nanengneng toy minilyon a prospektibon ananak to a ‘mantultuloy a manakar ed katuaan’!—Uli. 23:15, 16; 27:11.
2 Anggaman say totoo na Dios bilang intiraminti et tuloytuloy tan maseseg ed Kristianon kimey, arum so nankalkalnan tinmayer. Anggaman saraya so datin mabisbiskeg sanen agano nin naaralan da so katuaan, diad inlabas na saray taon, niyuugali da lay samet odino mataltalag lan pibiang ed panaggaway-babangatan a kimey.
3 Natalosan a nayarin walaray ontayer lapud ikakapuy na laman tan epekto na itatakken. Balet, sikaray nakomendaan lapud impansungdo ra. Gagawaen day anggaay nayarian da. Balet nepeg ya itepet na balang sakey ya angidedika na bilay to ed Dios: ‘Kasin iyaapasakey kon maong so inkasiak ed personal iran gegemtan kanian samet lay betang na intereses na Panarian ed bilay ko? Kasin nagmaliw ak lan singa “malainem-em,” odino siansia nin isesekar koy inkasiak a ‘mabisbiskeg’? (Apoc. 3:15, 16; Luc. 13:24) Masimoon tayo komon ya ipatnag no antoy gagawaen tayo tan paaligwasen tayo no nakaukolan, a nodnonoten ya insipan nen Jehova a mangitarya na “gloria, tan galang, tan kareenan ed siopaman a manggawa na maong.”—Roma 2:10.
4 No Panon so Pansungdo: Antoy akatulong ed si Jesus a mansungdo? Impaliwawa nen Pablo: “Lapud gayaga a niyan ed arap to sinungdoan to so krus [“panamairapan a kiew,” NW], ya imbantak to so baing, et imyurong ed kawanan na trono na Dios.” (Heb. 12:1-3) Say gayagan niiyan ed arap nen Jesus so pirmin analonggaring ed temporaryo iran subok ya inarap to. Natulongan itayo met a mansungdo no nodnonoten tayon naynay so gayagan niiyan ed arap tayo. (Apoc. 21:4, 7; 22:12) No manilalo tayo’d si Jehova a pabiskegen to itayo diad panamegley na personal a panagaral, regular ya iyaatendi ed miting, tan mapetepet ed panagpikasi, makapantultuloy itayo ed say kimey ya ipapagawa to ed sikatayo.
5 Malikeliket si Jehova ed pansusungdo na saray matoor to. Kanian sikato komon so lalo tayon paliketen diad pantultuloy a ‘panakar ed katuaan.’