Magayagan Makapikasakey ed si Jehova tan ed Anak To
Say Sankaimportantian a Nagawa ed Taon et Selebraan no Marso 28
1 Ipatnag tayo so magayagan pakapikasakey tayo ed si Jehova a Dios tan si Jesu-Kristo diad panselebra tayo ed Pangdem na Katawan ed kaselek na agew no Marso 28, 2002. Diad satan a nikadkaduman okasyon, panggayagaan na saray nakdaan ya alanaan so nikaduman “pikakasakey” da ed arum a mananawir na Panarian, ed Ama, tan ed Anak to. (1 Juan 1:3; Efe. 1:11, 12) Molimolien na minilyon ed “arum a karnero” so nikadkaduman pribilehyo ra a makapikasakey ed si Jehova tan ed Anak to, a saksakey ed puso tan nonot diad panumpal ed kimey na Dios!—Juan 10:16.
2 Pankimey a Mankakasakey Tekep na Maapit a Siglaotan: Magayaga lawas si Jehova tan si Jesus ed inkasaksakey da. Panggagayagaan da so maapit a panuulop ed loob la na agnibagan taotaon sakbay ya apalsa so too. (Miq. 5:2) Sirin abayuboan dan dua so malet a bedber na matamoy ya aro. Bilang niyaliling a kakabatan, nayarian na sayan panguloan ya Anak ya ibaga so kiwawala to sakbay a nagmaliw a too: “Wala ak ed abay to [Jehova], singa uloen a komikimey; tan siak nensaman so inagew-agew a panggayagaan to, a malikeliket lawas ed arap to.” (Uli. 8:30) Walaan na baleg ya epekto ed Anak na Dios so impangusar toy agnabilang a taotaon na maapit a pililimog ed Lapuan na aro!—1 Juan 4:8.
3 Lapud sankanonot nen Jehova so pankaukolan na katooan a narondon, pinili to so bogbogtong ya Anak to, a walaan na nikadkaduman panangaro ed totoo, pian itarya so dondon bagat, a mangiyoopresi na mogmon ilalo tayo. (Uli. 8:31) No panon a si Jehova tan say Anak to so nankasakey ed panggagawa na saksakey a gagala, mansiansia itayo met a mikasakey ed sikara tan ed balang sakey diad bedber na malet ya aro, a magayaga tayon manggawa ed linaway Dios.
4 Pangipatnag na Impapuson Apresasyon: Diad iyatendi ed Memoryal tan italineng a maong tekep na respeto, nipanengneng tayo so tudtuan apresasyon tayo ed aro nen Jehova tan say impansakripisyo na Anak to nisengeg ed sikatayo. Nipabitar so maaron alimbawa nen Jesus, say inkamatoor to anggad patey diad impangitarya toy dondon, tan say pananguley to bilang Ari ed niletneg lan Panarian na Dios, ontan met ed saray bendisyon ya itarok na Panarian ed katooan. Napanonotan itayo met ed pankaukolan a mantultuloy a pangipatnag na pananisia tayo, maseseg a pikimey a mitunosan ed linawa nen Jehova bilang ‘katangbayan ed katuaan.’—3 Juan 8; Sant. 2:17.
5 Panulong ed Arum a Miulop ed Sikatayo: Saray ulop na mamatakken so nepeg a manggawa na nikaduman sagpot pian pasesegen so amin ya inaktibon Tastasi a walad teritorya tayo pian onatendi ed Memoryal na impatey nen Kristo. (Mat. 18:12, 13) Ilista iraman so dalawen ta pian anggapo so nalingwanan tan amin so personal a naimbitaan.
6 Kasin walaray kabat yo a nayarin onatendi ed Memoryal? Onkiwas lan unona pian pabiskegen so apresasyon da parad sayan okasyon. Maligsan imbitaan ira, tan ipalikna ed sikaran aabrasaen ira. Gawaen tayoy anggaay nayarian tayo ya iyimbita iyan sankaimportantian a nagawa ed taon ed amin ya iyaaralan tayo na Biblia tan arum ya interesadon totoo, ontan met ed saray kapamilya tan saray kabkabat tayo. Siansian akatarya ni iray gunggona na dondon parad amin a makaaral ed “karlangan na pikakabat ed Kristo Jesus.” (Fil. 3:8) Saraman so mangaagamil na pananisia ed bagat nen Kristo so makagamor na seguradon ilalo ya andi-anggaan a bilay.—Juan 3:16.
7 Agbalot leleglemewen so epekto na Memoryal ed saray masimoon. Duay taon lay apalabas diad isla a bansan Papua New Guinea, 11 ya interesadon totoo so nambiahe ed loob na 17 oras panamegley na melag a baloto diad madaluyon a dayat ta pian makaatendi. Akin? Inkuan da: “Labay min selebraan so Memoryal nen Kristo kaiba iray kaparan managdayew ed si Jehova; kanian makanakana so impanbiahe mi.” Isipen pa so seseg ya impanengneng na saraman ya interesado tan say apresasyon da ed maliket a pakapikasakey da ed si Jehova, ed Anak to, tan ed Kristianon impanaagi!
8 Iyopresi so panagaral na Biblia ed amin ya interesado. Pasesegen ira pian onatendi a regular ed saray miting ed kongregasyon tan pian manginabang met ed arum ed saray katuaan a nanaaralan da. Tulongan iran ‘manakar ed liwawa’ tan ‘mangagamil na katuaan’ diad pangiyaplika ed saray prinsipyo na Biblia ed bilay da. (1 Juan 1:6, 7, NW) Tulongan iran nabayuboan da so maapit a siglaotan ed si Jehova tan mantultuloy ya ombulaslas ed apresasyon parad pribilehyon pankakasakey ed panggawa na linawa to.
9 Agaylan nikadkaduman pribilehyo so magayagan pankakasakey ed “espiritu, pati pankakasakey yo na kamarerwa a manseet a nipaakar ed pananisia ed ebanghelyo”! (Fil. 1:27, 28) Ilaloan tayo sirin so maabig a pankakasakey tayo diad Memoryal no Marso 28, a lawas misalsalamat ed si Jehova tan ed Anak to!—Luc. 22:19.