Tepet

◼ Anto so nepeg tayon nonoten sano manguusar na cellular iran telepono tan saray electronic pager?

Saratan a kagawaan so mausar ed sikatayo pian makapitalosan ed arum anggan diad amin lawarin pasen a kawalaan tayo. Anggaman nayarin mausar iya, nepeg a maalwar itayon ag-uusaren iray cell phone tan saray pager diad agmatukoy iran oras a makadisturbo ed ministeryo odino diad Makristiano iran pantitipon tayo. Panon a nagawa iya?

Nonoten pay epekto no say cell phone odino pager tayo et ontanol legan a manpupulong itayo. Anto so isipen na unabung? Anton impresyon so niwala ed unabung no ontunda itayo pian ebatan so tawag? Maseguron agtayo labay so manggawa na antokaman a mangamper ed arum diad italineng da ed mensahe na Panarian. (2 Cor. 6:3) Kanian, no mangawit itayo na cell phone odino pager, nepeg tayon i-set itan ta pian agmandisturbo ed sikatayo odino ed arum legan a manpupulong itayo.

Anto no manaalagar itayo legan a manpupulong so arum? No angigana itayo na panaon parad lawak na serbisyo, agtayo ta nepeg ya iyapasakey so nonot tayo ed satan ya aktibidad? Lapud panagrespeto ed sagradon serbisyo tayo, ipangasin asikasoen iray agkapilitan a personal a pamaakaran diad arum a panaon. (Roma 12:7) Siempre, aglalaktipen na saya so pangusar ed cell phone pian mangiter na kaaruman a pantasi odino pian iyuksoy so panggawa ed satan.

Nepeg a nagkalalo itayon manalwar ed panangusar na saray cell phone legan a manmamaneho, lapud ipapanengneng na pigaran impansukimat a pansesengegan itan na idarakel na paka-aksidente. Nepeg a mapeget tayon tumboken so antokaman iran ley a mamepeget ed panangusar na saray cell phone legan a manmamaneho.

Onaatendi itayo ed saray Kristianon miting, asamblea, tan saray kombension pian dayewen si Jehova tan paibangat ed sikato. Agta say panamabli ed inkasagrado na sarayan okasyon so mamakiwas ed sikatayon i-set iray cell phone tan pager tayo ta pian ag-iratan makadisturbo ed sikatayo odino ed arum? No wala so maganat a pamaakaran a mankaukolan na tampol ya imano tayo, nepeg tayon asikasoen itan diad paway na panmimitingan. Odino, nepeg tayon iyuksoy so pangasikaso ed personal tan sekular iran pamaakaran diad arum a panaon imbes a diad panaon a nigana parad panagdayew.​—1 Cor. 10:24.

Komon ta say paraan a pangusar tayo ed saray cellular phone odino antokaman ya arum nin elektronikon kagawaan so lawas mangipanengneng na konsiderasyon ed arum tan aralem a panamabli ed espiritual iran bengatla.