Peneken so Espiritual a Pankaukolan Yo
1 Say magano lan nagawa a “Maseseg Iran Manangiyabawag na Panarian” a Distriton Kombension tayo so mangiter ed sikatayo na alay abig a pankanawnawa pian peneken so espiritual a pankaukolan tayo. Singa say masustansyan panangan, seguradon say programa so mamabiskeg ed sikatayo ed espiritual “[diad] saray salita na pananisia.” (1 Tim. 4:6) Satan so lalon mamaapit ed sikatayo ed si Jehova. Tan nailaloan tayo so pakagamor na konseho tan panamaseseg ya ontulong ed sikatayon nasungdoan iray subok ed bilay tayo. Papaseguroan itayo nen Jehova: “Bilinen taka tan ibangat taka ed dalan a nepeg mo a laen. Simbawaen taka a sinenengneng so matak ed sika.” (Sal. 32:8) Agaylan panliketan tayo so maaron panangiwanwan to ed bilay tayo! Konsideraen so pigaran praktikal a kundang a nagawaan tayo pian nagunggonaan itayon maong ed programa na kombension.
2 Kaukolan Tayon Iparaan so Puso Tayo: Balang sakey ed sikatayo so walaan na responsabilidad a salimbengan so piguratibon puso to. (Uli. 4:23) Kakaukolanen na saya a disiplinaen tayoy inkasikatayon dili tan magmaliw itayon matua ed inkasikatayo. Say kombension so panaon pian dalepdepen so relasyon tayo ed si Jehova, panaon pian “manimano ed ayadyarin katunongan, say katunongan na pankanawnawa.” Pian niparaan so puso tayo a ‘mangawat ed kitanem na salita,’ nepeg tayon kerewen ed si Jehova ya usisaen to itayo, ituro to ed sikatayo so dinanman a “bagel” a kaukolan ya ipetek, tan itonton to itayo ed “maando lawas a dalan.”—Sant. 1:21, 25; Sal. 139:23, 24.
3 Ontalineng tan Mandalepdep: Kinomendaan nen Jesus si Maria lapud angimanon maong ed saray salita to, ya inkuan to: “Si Maria pinili to so maong a betang, a sikato so agnaekal ed sikato.” (Luc. 10:39, 42) No walaan itayo met na parehon awawey, agtayo abuloyan iray agmakanan bengatla a mandisturbo ed sikatayo. Seguroen tayon akayurong tan atentibo itayo legan na interon programa. Paliisan tayo so pantongtong odino panakar-akar ya agmet kapilitan tan alwaran tayon agnadisturbo so arum panamegley na saray cellular a telepono, pager, kamera, tan camkorder.
4 Sano ontalineng itayo ed saray paliwawa, maabig so pangala na antikey iran nota ya ontulong ed sikatayon man-analisa ed katitibukel na tema. Kaukolan tayon isiglaot so narerengel tayo ed amta tayo la. Saya so ontulong ed sikatayon natalosan tan agnalingwanan so impormasyon. Sano rerepasoen tayo iray nota tayo, kaukolan tayon gawaen itan diad gagalan iyaplika so impormasyon. Nitepet na balang sakey ed sikatayo: ‘Panon iyan mangaapekta ed relasyon ko ed si Jehova? Antoran pananguman so kaukolan kon gawaen ed bilay ko? Panon kon niyaplika iyan impormasyon ed saray pidedeneng ko ed arum? Panon kon nausar iya ed ministeryok?’ Itongtong ed arum iray punto a nagkalalo lan panliketan tayo. Say panggawa ed sarayan bengatla so ontulong ed sikatayo diad pangisimpen ed saray salita nen Jehova ‘diad utel na puso tayo.’—Uli. 4:20, 21.
5 Iyaplika Tayoy Naaralan Tayo: Kayarin inmatendi ed distriton kombension, onia so inkuan na sakey a delegado: “Say programa so parad balang sinansakey, a mamakiwas ed sakey a manusisa ed kipapasen na puso to tan ed kapusoan na pamilya to, tan mangiter na maaron Makasulatan a tulong unong a nakaukolan. Tinmulong itan ed siak pian lalon mapaga ed obligasyon kon ontulong a nagkalalo ed kongregasyon.” Maseguron ontan met so liknaan na dakel ed sikatayo. Balet aliwan magenap so basta apaseseg tan arepreskoan itayo kayari na kombension. Inkuan nen Jesus: “No amta yo so sarayan bengatla, mapalar kayo no sikaray gawaen yo.” (Juan 13:17) Nepeg a maseet itayon mangikana ed saray punton onaplikan mismo ed sikatayo. (Fil. 4:9) Saya so solusyon pian sigpot tayon napenek so espiritual a pankaukolan tayo.
[Kahon ed pahina 5]
Dalepdepen so Nadngel Yo:
■ Panon iyan mangaapekta ed relasyon ko ed si Jehova?
■ Panon iyan mangiimpluensya ed pidedeneng ko’d arum?
■ Panon kon niyaplika iya ed bilay ko tan ed ministeryok?