Onaligwas Bilang Ministro
1 Naliliketan so Ama tayo ed tawen sano onaaligwas ed katuaan iray lingkor to. Kaiba ed satan so iyaaligwas bilang matatken ed espiritual tan epektibon manangipulong na maong a balita. Pinaseseg nen Pablo so manangasikaso a si Timoteo a mantultuloy ton paaligwasen so inkasikato ta pian say ibubuna to et napatnagan. (1 Tim. 4:13-15) Kaukolan a panggunaetan tayon amin a paaligwasen so kalidad na ministeryo tayo, anggano eksperiensyado itayo lan manangipalapag.
2 Mangiletneg na Personal Iran Kalat: Pian onaligwas, kaukolan a mangiletneg itayo na personal iran kalat. Antoray pigaran kalat a nayarin iletneg tayo? Nayarin panseetan tayoy magmaliw a lalon marunong a mangusar ed espiritual ya ayura tayo, say Biblia. (Efe. 6:17) Nayarin walay klase na panagpulong a kaukolan tayon paaligwasen ni, a singa say panagtasi diad karsada, panagtasi panamegley na telepono, odino diad kawalaan na saray negosyo. Nayarin pankimeyan tayo so pagmaliw a lalon epektibo ed panagpawil. Say sananey nin maabig a kalat a nayarin paaligwasen tayo et say abilidad tayo ed pangigapo tan pangikondukta na saray panangiyaral na Biblia.
3 Saray Probisyon: Saray pantitipon na kongregasyon nagkalalo la ed Teokratikon Eskuelaan Parad Ministeryo tan Pantitipon Parad Panagserbi, so denesinyo ya ontulong ed sikatayon onaligwas bilang miministro. No lalon panggugunaetan tayo so pamparaan tan onatendi ed sarayan pantitipon tan pangiyaplika ed saray suhestion, nagkalalon minabang itayo.—2 Cor. 9:6.
4 Kaukolan tayo met so mantutulongan pian onaligwas. (Uli. 27:17) Ontulong ed iyaaligwas tayo so italineng a maong ed presentasyon na saramay kaiba tayon mankikimey ed ministeryo. Niarum ni, say manangasikaso tayo ed panagaral na libro et nayarin mangiyuksoy na ontulong ed sikatayo. Agaylan bendisyon so pakawalaan na eksperiensyadon payunir odino manangipalapag ya ontulong ed sikatayon magmaliw a lalon epektibo tan lalon naliketan ed ministeryo! Kasin walay balon manangipalapag a ka-grupo tayo ed panagaral na libro? Nayarin sikatayo lay mangiyuna a mangimbita ed sikato a mikimey ed sikatayo.
5 Say sankaimportantian a kimey a nagagawa natan et say Kristianon ministeryo. Legan tayon iyaapay ed si Jehova so “bagat a panangidayew,” labay tayon iter so sankaabigan tayo. (Heb. 13:15) No panggunaetan tayoy magmaliw a progresibo ed ministeryo, magmaliw itayon kakimeyan ya ‘anggapo so ibaing to, ya agamilen tayo ed matunong so salita a tua.’—2 Tim. 2:15.