Panangiter a Mamapagalang ed si Jehova

¹ Diad Uliran 3:9, oniay ingganggan nen Arin Solomon: “Igalang mo si Jehova panamegley na makanakana iran kayarian mo tan unona iran bunga na amin ya anim.” (NW) Diad Israel nensaman, kakaukolanen na Ganggan a mangibiig ira na kakaplo manlapud saray ani ra parad pangigalang ed si Jehova. Komusta balet iray Kristiano? Oniay ebat nen apostol Pablo diad 2 Corinto 9:7: “Balang sakey gawaen to komon so ginetma to ed puso to; aliwa a dia ed kaermenan odino dia ed pasootan; ta say Dios aroen to so sililiket a mangiter.”

² “Sililiket a mangiter” so sakey no “aliwa a . . . pasootan” so pangiter to. Say mamapakiwas ed sikato et say pilalek ton pagalangan si Jehova tan ipatnag so apresasyon ed amin a ginawa To parad sikatayo. Anggaman agnapapasootan a mangiter iray dedikadon Kristiano, liknaen dan obligasyon dan ipatnag so kaaralem na panangaro tan apresasyon da ed si Jehova tan ed saray agagi. (1 Juan 4:11) Dakel lan agagi tayo so angipatnag na ontan ya inkabunlok diad impanuporta ra ed kimey a panagpaalagey na Kingdom Hall, kanian diad Pilipinas ni labat et nagmaliw a posible so kipaalagey na nilasus a Kingdom Hall.

³ Kaukolan so Panagsakripisyo: Diad Mosaikon Ganggan, amin ya Israelita, mayaman man o mairap, et kinaukolan a regular a mangibagat ed si Jehova, ingen ta say balor na samay apay et depende ed pinansyal a kipapasen na samay mangiyaapay. Impabitar nen Jesus ya anggan saray Kristiano et nepeg met a ‘mangibeneg ed dili ra’ tan mansakripisyo pian napagalangan da si Jehova. (Mat. 16:24) Kabaliksan na saya so panlimita tayo ed saray personal a pakainawaan tan igana tayo iray arum a materyal a kaykayarian tayo parad sagradon serbisyo a panulong ed arum. Insimbawa nen Pablo: ‘Agyo lilingwanan so panginabang ed arum, ta say Dios napaliket a maong ed sarayan bagat.’​—Heb. 13:16.

⁴ Panon itayon ‘sililiket a makapangiter’ no nipaakar ed programa a panagpaalagey na saray Kingdom Hall? Pantongtongan tayo no panon iyan nagawaan diad (1) saray kongregasyon ya agkabiangan ed kaplesan a programa na panagpaalagey na Kingdom Hall, (2) saramay wala ni babayaran da’d binayes dan impamaalagey na Kingdom Hall, tan (3) saramay manguusar ed kapkapanpaalagey a Kingdom Hall a kayarian na sanga.

⁵ Saray Kongregasyon ya Agkabiangan ed Kaplesan a Programa a Panagpaalagey na Kingdom Hall: Nayarin say Kingdom Hall yo et agkabiangan ed kaplesan a programa a panagpaalagey na Kingdom Hall. No ontan, panon yon nasuportaan iyan programa? Diad agano ni, walay instruksion a niiter a manggawa kayo na biig a kahon ya amarkaan na “Kingdom Hall Construction Worldwide.” Saray ipelag yo ed sayan kahon et manuporta ed pangipaalagey na Kingdom Hall na arum a kongregasyon, ya aliwa labat a say Kingdom Hall tayo. Mitunosan iya ed samay imbaga nen Pablo: “Agnengnengen na balang sakey ed sikayo so kayarian ton dili, noag balang sakey ed sikayo nengnengen to met so saray bengatlan kayarian na saray arum.”​—Fil. 2:4.

⁶ Likud ni ed nayarin ipelag na saray indibidual ed sayan kahon, walaray kongregasyon, kaiba lay arum ed saramay manbabayar na binayes dan impamaalagey ed Kingdom Hall, ya angaproba na resolusyon a mangipawit na espisipikon kantidad kada bulan manlapud pundo na kongregasyon bilang suporta ed panagpaalagey na Kingdom Hall diad interon mundo. No ontan, satan a naaprobaan a binulan a kantidad et iyarum ed kontribusyon ya impelag ed kahon ya amarkaan na “Kingdom Hall Construction Worldwide” sano ipawit la ed sangan opisina.

⁷ Saray Kongregasyon a Wala ni Babayaran: Unong ed rekord mi, masulok nin 700 a kongregasyon ed Pilipinas so walaan ni babayaran ed samay binayes dan impamaalagey na Kingdom Hall. Panon a makatulong irayan kongregasyon ed panagpaalagey na Kingdom Hall? Say sakey a paraan et diad pampeleng dan bayaran so kantidad a nampapaknaan dan binulan ya ipawit ed sangan opisina. Ipapanengneng na rekord mi a say aberids ya ipapawit ed sanga na saramay binmayes et agmakakasabi’d kapaldua na samay impromiso ran ibayar kada bulan. Kanian no komon ta nipawit dan intero imay kantidad ya impromiso ra, nadoble imay pundo a nausar ed pamaalagey ed Kingdom Hall na arum a kongregasyon a mankaukolan. No labay na saray manangipalapag so mandonasyon parad pambayar ed samay abayes, ipelag day kontribusyon da ed kahon a “Local Congregation Expenses.” Insan, diad pantapos na bulan, ipawit na saray mamatatken ed sangan opisina so interon kantidad a nampapaknaan, bilang bayar ed binayes ya impamaalagey na Kingdom Hall da.

⁸ Saray Kongregasyon a Manguusar na Kingdom Hall a Kayarian na Sanga: Masulok la natan a 600 a kongregasyon so manguusar na Kingdom Hall a nipaalagey panamegley na balon programa a panagpaalagey na Kingdom Hall. Balang sakey ed sarayan kongregasyon et nanggawa na resolusyon a mangipawit na espisipikon kantidad kada bulan bilang boluntaryon kontribusyon da. Anto so amakiwas ed sikara pian gawaen itan? Lapud sinononot iran dakdakel ya agagi so nansakripisyo pian makapandonasyon parad pundo na Panagpaalagey na Kingdom Hall diad ontan et nawalaan ira na balon Kingdom Hall. Natan ta wala lay balon hall da, labay da met a tulongan iramay andian ni. Diad panggawa da na onia, natutumbok da imay impuyan a simbawan: “Anggapo komon so siopan too a mananap na kaabigan ton dili, noag say kaabigan na kapara ton too.”​—1 Cor. 10:24.

⁹ Makapaliket ta dakel ed sarayan kongregasyon so binulan a makakapangipawit ed samay nampapaknaan dan kantidad, wala ni ingey pigaran masulok so ipapawit da. Balet, wala met iramay agmakapangiiter ed interon kantidad a nampapaknaan da, nayarin lapud walaray manangipalapag ya agda impelag so impromiso ran idonasyon. Tua a satan a kantidad ya iter et sakey a bengatlan “ginetma [na balang sakey] ed puso to,” balet ta say angipromisoan ed satan et si Jehova tan kabiangan itan na panangiyapay tayo ed sikato. (2 Cor. 9:7) Kanian, say matoor a panangiter ed sayan kantidad et kabiangan na panagdayew tayo, tan nepeg ya igeter para labat ed sayan gagala. Ontan imay impaseseg nen apostol Pablo sanen inkuan to diad 1 Corinto 16:2: “Dia ed balang unonan agew na sinimbasimba balang sakey ed sikayo mangibiig na yatol to, unong ed yaaligwas to.” Nalmoan na dakel ya agagi a maabig no ‘ibiig’ da lay impromiso ran kontribusyon diad sakey a sobre pian agla nausar ed arum nin gagala.

¹⁰ Dakel so kongregasyon natan a dinmakel lay manangipalapag da manlapu la’d samay unaan ya impanggawa ra na resolusyon nipaakar ed pangikontribusyon da parad Kingdom Hall da. Lapud saya, isusuheri na Mananguley ya Ulop a kada taon et repasoen na mamatatken so ginawan resolusyon tan nengnengen da no sarag nin aruman itan. Balibalin gawaen itan ed bulan na Enero 2009, a kerewen ed saray manangipalapag ya isulat da ed melag a papel no pigaray isisipen dan nidonar da kada bulan lapud apresasyon da ed Kingdom Hall da. Agda iiyan so ngaran da ed saratan. Kayari to et mangipresenta iray mamatatken na balon resolusyon ya aprobaan na interon kongregasyon. No agawaan la itan, nepeg ya ipawit na saray mamatatken ed sangan opisina so kopya na samay balon resolusyon.

¹¹ Amta mi a dakel ed sikayo so mangaalig ed saramay kongregasyon diad Macedonia nen inmunan siglo ya anggaman “pinasyay irap na bilay da, pinadaak da so . . . inkabunlok da. Ta unong ed talagan pakasarag da, on, tasian ko a labas ni itan ed talagan nasarag da, a diad dili ran panlabayan, et agda tinundaay kinmerew ed sikami na pankanawnawan mabunlok a makapangiter.” (2 Cor. 8:1-4, NW) Komon ta aligen tayon amin itan ya espiritu na saray taga Macedonia legan tayon mabunbunlok a mibibiang ed panangiter a mamapagalang ed si Jehova!