“Sigpot a Manpulong”—Diad Pampulong ed Saray Apartment
1. Anto so kalaktip ed ‘sigpot a pangipulong ed maong a balita’?
1 Singa si apostol Pablo, pilalek tayon “sigpot [ya] ipulong so maong a balita.” (Gawa 20:24, NW) Diad dakel a syudad tan balbaley ed Pilipinas natan, kalaktip ed saya so pampulong ed saramay manaayam ed apartment. Balet no maminsan et mairap so makaloob ed saratan.
2. Akin et importante so pagmaliw a maalwar tan pangipatnag na dugan pakatebek sano manpupulong diad saray apartment?
2 Lapud sesga na krimen tan karawalan, dakel so apartment ya akatalak tan walaan na guardia odino surveillance kamera. (2 Tim. 3:1, 2) Nayarin patakaran na saramay mangipapakurang ya agpalooben iray estranghero. Nayarin mas pilien na superintende odino manedyer a katongtongen itayon ompaway la, lalo la no walay residentin nanreklamo. Kanian, importante so pagmaliw a maalwar tan pangipatnag na dugan pakatebek.
3. Kapigan sankaabigan a kimeyen iray apartment, tan akin?
3 No Kapigan Kimeyan: Singa met diad arum iran klase na teritorya, maabig no kimeyan iray apartment diad oras a sankaposiblian a wadtan iramay manaayam. Dakel so manangipalapag a makakasabi ed saray residente ditan no mansirunget la ontan met no ngarem na Sabado odino Simba. No masaksakbay a kimeyan iray apartment, lalo la no sampot simba, ompan manreklamo laingen iray residente ed manedyer odino superintende.
4, 5. Anto so nayarin gawaen pian palooben da itayo ed saray apartment ya akatalak so gate to?
4 No Panon a Makaloob: Nepeg ya agkokontaken na saray manangipalapag so superintende odino siopaman ya empleyado na apartment antis dan onlan manpulong ditan. No say sakey a bilding et akatalak so gate to, ingen ta walaay intercom, nausar tayo itan pian makaromog na mamaloob tan mitongtong ed sikatayo. Depende ed klase na apartment, ompan sarag tayoy ontoktok ed arum nin puerta ed satan a bilding kayari tayon akatongtong imay toon amaloob ed sikatayo. Diad arum a pankanawnawa balet, mas maabig no ompaway itayo ni lamet, insan tayo usaren so intercom pian mangontak na sananey nin residente. Nepeg ya usaren tayoy pakatebek pian makapandesisyon itayon maong no pigaran residente so kontaken tayo ed onian paraan diad kada ibisita.
5 Walaray residentin nayarin mas labay dan ibaga la’d sikara so pegdat tayo diad intercom. No ontan, makaaro yon ipakabat so inkasikayo. Bitla yoy ngaran na unabung no aka-iyan itan ed directory. Ibaga yo’d antikey so tema yo. Tinmalona so arum ed saya diad direktan impanbasa ra na sakey ya introduksion manlapud Reasoning.
6. Anto so nepeg tayon gawaen no mankikimey itayo diad saray bilding a walaay guardia?
6 No say guardia ed sakey a bilding et ag-inmabuloy a mamaloob ed sikatayo, sikatoy panggunaetan tayon pulongan. Dakel so guardian labalabay day manbasa na saray literatura tayo. Ompan nagapoan tayo ni ingen ya iyaralan na Biblia. No inabuloyan itayo na guardia a bisitaen so sakey a residentin angipanengneng na interes, kaslakan lan sankaabigan ya ag-itayo basta-basta ontoktok ed arum nin puerta ed bilding.
7. Anto so nepeg tayon tandaan nipaakar ed saray bag ya usaren tayon manpulong?
7 Itsura tan Maong a Kondukta: No angkabaleg so bag tayo, ompan mangala itan na imano. Sirin, nayarin desidien tayoy mangusar na samay agmangalay imano, odino anggan agtayo la manbabag. Walaray manangipalapag ya isisigpit da labat ed maimpis a folder so iyopresi ran literatura tan ibubulsa odino sankabembenan da labat lay Biblia ra.
8. Panon so nepeg a pangorganisa ed saray manangipalapag a mankimey ed apartment?
8 Maabig no ag-itayo manmumungkog lalo la diad lobby odino paradaan ta mangala iya na imano. Magmaliw a maalwar sano manpupulong ed saray apartment a mabetbet so krimen. (Uli. 22:3) Alimbawa, nayarin mangiyasain kayo na duara odino taloran pares na manangipalapag ed sakey a grado, ya ag-ira manaarawian, tan nayarin mansusublayan iran ontoktok ed saray puerta legan a manaalagar so arum.
9. Panon so nayarin pangipatnag tayoy konsiderasyon, tan akin ya importante iya?
9 No onloloob kayo ed sakey ya apartment bilding, ipagpag yoy sapatos yo tan ikapot yoy gate a nilooban yo. No ipanengneng tayo so ontan a maong a konsiderasyon, agtayo mangiter na pakareklamoan ed sikatayo. Kaloob yo, onla kayo lan tampol ed elevator odino diad gradon pankimeyan imbes a mamappalteng ni ed lolooban. Ta no ontan so gawaen tayo, ompan pan-inapan da itayo la laingen.
10. Panon tayon napaliisan so mamawalay ingal diad hallway?
10 Diad dakel ya apartment, onaaniweng so ingal ed hallway. Kanian agyo kapakasil so boses yo, samay dugaruga labat a narengel na katongtong yo. No mitotongtong kayo ed kakaiba yon mankikimey, pankalna yoy boses yo, a normal labat tan mapalna pian agkayo pan-inapan. Pian agnadisturbo iray residente, walaray manangipalapag ya imbes a pantutumboken dan toktoken iray kapuertaan ed koridor, pagapoen da itan ed sampot na hallway insan da itumbok imay sananey lamet a sampot na hallway, insan ira lamet ombasil ed biek, anggad nasumpal so interon grado. Ontan met, no makmaksil tan singano mamapaskar so kakatoktok tayo, ompan nataktakot laingen iramay walad loob.
11. Antoran suhestion so makatulong no say tinoktokan tayon puerta et walaay abot a panagtakilingan?
11 No walay abot a panagtakilingan ed puerta, alagey kayo ed arapan na satan pian nanengneng to kayo imay walad loob. Talaranan yoy ontakiling ed satan, pian nibano yon tampol tan nagapoan yoy presentasyon yo. No ‘Siopa’tan?,’ kuan na makan-abung, nayarin sankaabigan no ibaga yoy ngaran yo, pati say kaiba yo. Diad ontan et nayarin naekal so inkatalawan na unabung a manlukas na puerta. Balet no agto, sarag yo nin siansiay manpulong anggano akakapot itan.
12. Panon tayon napaliisan so problema sano mangitilak na literatura parad saramay agtayo asabi’d abung?
12 No Anggapoy Asabin Too: Mainomay a napelag tan nitakatak so sakey a literatura no itilak labat ed paway na puerta. Kanian, no mangitilak kayoy literatura parad saramay agyo asabi’d abung, seguroen yon ag-itan akaparungtal ed saray ondadalan.
13. Anto so nepeg tayon gawaen no walay unabung a mamapasnok?
13 Manpapasnok Iran Unabung: No walay unabung a sinmanok tan singano tawagen to lay superintende, mas maong no onalis kayo la ed satan a partikular a grado tan dia la’d arum a pankanawnawa kayo ompawil. Diad arum iran kipapasen, mas maabig no ompaway kayo la ed satan a bilding pian napaliisan yo so posiblin pakapikompronta ed samay superentendi. Anggano agmet espisipikon inkuan na samay unabung ya agyo la bibisitaen ed ontumbok iran pankanawnawa, mas maabig no isulat itan a numeroy apartment bilang “agbibisitaen” insan itekep ed territory card. Singa met ed arum nin nilista bilang “agbibisitaen,” nepeg a sagpaminsan a bisitaen iraya pian naamtaan so panlabayan na unabung.
14, 15. Anto so nepeg tayon gawaen sano kinerew na representanti na apartment ya onalis tayo la?
14 No Kinerew ed Sikayon Onalis Kayo La: No bilang ta binagaan kayo na superintende, saray guardia, saray managmintina, odino arum niran representanti na apartment, ya onalis kayo la, maabig no unor kayon tampol. No nayadyari, labay tayon paliisan so komprontasyon a nayarin manresulta ed demandaan tan iyarap ed pupulis. Diad kaslakan, agmet sumpa ed saray Tasi nen Jehova iray empleyado ed apartment. Gagawaen da labat so trabaho ra.
15 No maminsan, sano say sakey a representanti na bilding et kinerew ton onalis kayo la, nayarin sarag yo met ya ipaliwawa ed maulimek tan mataktikan paraan so rason no akin a wadtan kayo. (1 Ped. 3:15) Respetoen tayo so responsabilidad ton gawaen no antoy mamaliket ed saray residente tan pansiansiaen so seguridad ed bilding. Ompan diad satan et abuloyan to kayon mansiansia. Balet no andi, manpatanir kayo’d maabig a paraan. No iyabuloy na kipapasen, nayarin kerewen yon regular kayon mangitilak na literatura diad lobby. (Col. 4:6) Nepeg a lawas pakabatan so manangasikaso na serbisyo no walaray ontan a kipapasen.
16. Anto so nepeg tayon gawaen no agnasolbar iray problema diad panggugunaet tayon kimeyan so sakey ya apartment bilding odino grupo na apartment bilding?
16 Nayarin kalabas na pigaran panaon, sarag a salien lamet na saray manangipalapag a siaalwar a kimeyan iman ya apartment. No agnakimeyan na saray manangipalapag iratan ya apartment, walaray arum a polaing pian napulongan iramay unabung ditan, a singa say pampulong panamegley na telepono odino sulat. Walaray manangipalapag ya akibiang ed panagpulong diad karsada’d arapan odino asingger ed saratan ya apartment diad samay oras ed kabuasan tan labi a maslak a totoo et onloloob ed trabaho odino onsesempet.
17. Akin et importante so pampulong diad saray apartment?
17 Asingsingger lay anggaan na sayan marelmeng a sistema. Saramay ontawag labat ed ngaran nen Jehova so nilaban. Balet, “panon sirin so panawag da ed saman so agda sinisia? Tan panon so panisia ra ed agda nadngelan?” (Roma 10:13, 14) Dakel so manaayam ed saray apartment a “walaan na dugan kipapasen na puso parad bilay ya andi-anggaan.” (Gawa 13:48, NW) No magmaliw itayon maalwar tan ipatnag tayoy dugan pakatebek, nipasabi tayo ed sikara so maong a balita.