Tepet

◼ Antoy nepeg yon gawaen no iganggan da kayo ya ontunda lan manpulong?

Walaray inkagawa ya inasinggeran na pulis iray agagi leleg dan gagawaen so ministeryo ra. Inkuan na pulis a sumlang ed ley so gagawaen da tan nepeg dan itunda itan. No ontan so nagawa, kaukolan ya onalis kayo lan tampol ed teritorya, balet gawaen yo itan ed marespeton paraan. (Mat. 5:41; Fil. 4:5) Agyo la sasalien a resolbien a bukor so problema diad pangikatunongan ed saray legal a kanepegan tayo. No posible, mataktika yon isulat so numero na tsapa na pulis tan no iner so aka-asainan ton presinto. Kayari to, ipaamta iyan tampol ed saray elder, a mangipaamta met a tampol ed sangan opisina no anto so agawa. Ontan met, no paalisen itayo na superintende odino arum niran representanti na apartment odino compound, onalis tayo lan tampol. Baleg so nagawaan na mapaabeban pideneng tayo ed saramay wala ed pakayari pian napaliisay iloor na situasyon.​—Uli. 15:1; Roma 12:18.