Ipangasin Dalawen Ira a Tampol

Siopara so dalawen a tampol? Saraman so kinmerew a nawalaan na literatura odino regular ya ituloran na magasin odino malabay a bisitaen na Tasi diad ayaman da. Iner so nanlapuan na saratan a kerew? Nanlapud saray indibidual a tinmawag odino nansulat ed sangan opisina odino diad panamegley na opisyal a Web site tayo ed Internet. Sano angipatnag ira na interes, pakabatan na sangan opisina so lokal a kongregasyon panamegley na porman S-70, sakey a melag a papel a walay akasulat ed tagey a “Please Arrange for a Qualified Publisher to Call on This Person.” Sano makaawat so mamatatken na porman S-70, nepeg dan iter itan a tampol ed manangipalapag a makulin ontulong ed toon interesado. No agnasasabi na manangipalapag so too diad ayaman, nayarin sikatoy tawagan na manangipalapag ed telepono odino maalwar a mangitilak na sakey a nota. No sika so aturon ondalaw, ipangasin gawam so anggaay nayarian mon nakatongtong a tampol so interesadon too.