Tepet

◼ Siopay nepeg a man-request panamegley na coupon odino Internet?

Diad saray publikasyon tayo et kaslakan a walay coupon a nayarin sulatan tan ipawit ed sangan opisina pian man-request na literatura odino pabisita ed saray Tasi nen Jehova. Ontan met, nayari man-request na panangiyaral na Biblia diad Web site tayon www.watchtower.org. Panamegley na saratan et dakerakel so natutulongan ya makaaral na katuaan. Balet, walaray linmesan problema nen inusar na arum a manangipalapag iratan pian iyuksoy so pakaawat na literatura odino pian napulongan iray kakanayon da odino arum ni.

Walaray nanreklamo sanen akaawat iray literatura manlapud sangan opisina ta agmet ira personal ya nan-request. Iisipen dan pipiliten ira na organisasyon tayo tan basta labat ira impilad mailing list. Saray manangipalapag ya akaawat na notice pian bisitaen iray agmet personal a nan-request et abaingan sanen nampasnokan ira na saray binisita ra. Kanian, say nepeg labat a man-request panamegley na Web site tayo odino coupon et saray interesadon indibidual, aggawaen itan na saray manangipalapag parad arum. No naamtaan ya aliwan samay mismon indibidual so nan-request, ag-iratan ebatan.

No ontan, panon tayon natulongan ed espiritual so kanayon odino kaaro tayo? No labay yon sikatoy nawalaan na literatura, agta maabig no ipawit yon mismo ed sikato bilang regalo? No impatnag ton sikatoy interesado tan labay toy pabisitad saray Tasi balet ta agyo amta no panon a nakontak iray elder ed kongregasyon ya akansakop ed kawalaan to, mangi-submit na Please Follow Up (S-43) form ed sekretaryo na kongregasyon yo. Nengnengen to itan insan to ipawit ed sangan opisina. Balet no say interesado et walad prisoan, substance-abuse facility, odino hospital, aliwan sikayoy nepeg ya man-request ed sangan opisina parad sikato. Imbes, sarag yon ibagad sikato ya kontaken to ray agagin ombibisitad pasilidad odino personal a mansulat ed sangan opisina.