Tepet
◼ Nayari kasin usaren na saray manangipalapag so Internet pian manpulong odino mangiyaral ed agda kabat ya manaayam ed arum a bansa?
Wala ray manangipalapag ya mani-Internet pian makalmoy iyaralan ed saray bansan daiset so manangipalapag odino sebel so panagpulong. No maminsan, maong met so resulta. Balet walay peligro no man-email odino mi-chat iray manangipalapag ed agda kabat. (Nengnengen so Hulyo 2007 ya Ministeryo Tayo ed Panarian, p. 3.) Anggano say motibo tayo et pian nipasabi so mensahe na Panarian ed saray mauyamon totoo, ompan makapilimog tayo balet ed saray makapuy ya kaulop, pati saray apostata. (1 Cor. 1:19-25; Col. 2:8) Ontan met, diad saray bansan nalilimitaan odino sebel so kimey tayo, nayarin namonitor na gobierno so komunikasyon ditan. Lapud satan et nayarin nipeligro iray agagi. Kanian, agnepeg ya man-Internet iray manangipalapag pian mananap na napulongan ed arum a bansa.
No anggapoy instruksion ed sikatayo na branch office balet ta walay apulongan tayo ya nanlapud arum a bansa, agti la babayuboay interes to kapawil tod sikara. Imbes, ibangat tayo no panon ton usaren so jw.org pian makalay kaaruman ya impormasyon tan no panon ton kontaken so branch office. Sarag tayo met ya pasesegen ya onatendid Kingdom Hall ya asingger ed panaayaman to. Siempre, wala ray bansan anggapoy Kingdom Hall. No labay ton walay Tasi diad lugar da ya ombisitad sikato, isulat tayod Please Follow Up (S-43) form insan iter ed sekretaryo pian ni-forward tod jw.org. Say branch office ya mangaasikaso ed bansan panaayaman na interesado et pamilyar ed kipapasen diman tan sikaray makaamta no panon dan natulongan ed espiritual.—Nengnengen so Ministeryo Tayo ed Panarian, Hunyo 2014 p. 7, tan Nobyembre 2011 p. 2.
No natan et walay pupulongan tayo odino walay iyaaralan tayo ya manaayam ed arum a bansa, ya akabat ti labat ed Internet, kaukolan tayon gawaen so instruksion diad tagey. Balet, nayari ti nin ituloy a magano anggad wala lay manangipalapag ya mangiyaral ed sikato. Balet no sikatoy manaayam ed bansan nalilimitaan odino sebel so kimey tayo, manalwar a maong no pantongtongan iray topic ed Biblia diad sulat, telepono, odino diad Internet.—Mat. 10:16.