‘Sayan Maong a Balita so Nipulong’!
1. Panon tayon amta ya anggapon balot so makapanpatunda ed panagpulong a kimey?
1 Anggapon balot so makaamper ed si Jehova diad panumpal toy linawa to. (Isa. 14:24) Anggaman singa agsarag a taloen nen Ukom Gideon tan say 300 a sundalo to so 135,000 a sundalon Midianita, oniay imbaga nen Jehova ed sikato: ‘Ilaban mo so Israel ed lima na saray Midianita. Agta siak so angiganggan ed sika?’ (Uko. 6:14) Anton kimey so susuportaan nen Jehova natan? Imbaga nen Jesus: “Sayan maong a balita na panarian so nipulong ed interon dalin.” (Mat. 24:14) Anggapoy siopaman a makapanpatunda ed sayan kimey!
2. Akin et nailaloan tayon tulongan nen Jehova so balang sakey ed sikatayo diad ministeryo?
2 Tutulongan nen Jehova so Balang Sakey: Matalek itayon tulongan nen Jehova iray Tasi to ya ontalona bilang grupo. Balet, nailaloan tayo met kasi a tulongan toy balang sinansakey ed sikatayo? Sanen kakkaukolan nen apostol Pablo so tulong, alikna toy suporta nen Jehova panamegley na Anak to, si Jesus. (2 Tim. 4:17) Matalek itayon bendisyonan met nen Jehova so sagpot na balang sakey ed sikatayo diad panusumpal tayo’d linawa to.—1 Juan 5:14.
3. Diad antoran sirkumstansya a tutulongan itayo nen Jehova?
3 Kasin lapud inagew-agew a kapagaan ed bilay et ngalngali anggapo lay biskeg mon manpulong? ‘Sikatoy mangiter na pakayari ed makapuy.’ (Isa. 40:29-31) Kasin nipapaarap ka’d panamasegsegang tan isusumpa? “Paawit mo ed Jehova so awit mo, et sikato bembenan to ka.” (Sal. 55:22) Kasin no maminsan et naliliknam ya agmo sarag so manpulong? “La ka . . . , tulongan ta kan mansalita.” (Exo. 4:11, 12, Maung a Balita) Kasin walay sakit mo kanian limitado lay nagagawaan mo’d ministeryo? Papablien nen Jehova so sigpot-puson sagpot mo, tan usaren to itan ed pakasumpal na linawa to, anggano parad sika et singa melmelag itan.—1 Cor. 3:6, 9.
4. Antoy epekto ed sikatayo na panmatalek ed si Jehova?
4 Say taklay nen Jehova et “akaunat la . . . tan anggapoy makapatunda’d sikato.” (Isa. 14:27, MB) Legan tayon manmamatalek a bendisyonan nen Jehova so ministeryo tayo, komon ta mantultuloy itayon manpulong a walaay ‘pakpel diad panamegley na autoridad nen Jehova.’—Gawa 14:3.