Panamabiskeg ed Kompiyansa Tayo ed Inkatunong na Dios

“Pian say panmatalek mo wala ed Jehova, impakabat kora ed sika.”​—ULIRAN 22:19.

1, 2. (a) Akin ya ipapanengneng na Tastasi nen Jehova so kompiyansa ed si Jehova? (Uliran 22:19) (b) Antoy mangipatnag a walaray indibidual a kaukolan dan pabiskegen so kompiyansa ra ed si Jehova?

NABEBENDISIONAN iray tuan Kristiano tekep na suston pikakabat ed si Jehova tan ed saray gagala to. Simamaaron iikdan ira na “matoor tan makabat ya aripen” na espiritual a “tagano ed panaon a kinepeg to.” (Mateo 24:45) Say nagagamoran dan pikakabat so mangiiter ed sikara na putel a pundasyon a kibasiyan na kompiyansa ed Dios. Kanian, bilang sakey a grupo, nipapanengneng na Tastasi nen Jehova so matalonggaring a kompiyansa ed si Jehova tan ed inkatunong to.

² Ompatnag balet a bilang indibidual et walaray Tastasi a kaukolan dan pabiskegen itan a kompiyansa. Tunggal paminsan et makakaawat so Sosyedad na saray sulat na agpakaseguro nipaakar ed niparungtal iran eksplinasyon ed saray palapagan to. Anganko ta sarayan panduaruwa et reaksion ed saray inkauman ed pakatalos, odino ed pamaakaran iran mangaapekta ed manuupapet, nagkalalo la diad emosyonal a dalan.​—Ikompara so Juan 6:60, 61.

3. Antoy nayarin nagawa anggan ed saray matoor ya aripen nen Jehova, tan akin?

³ Naeeksperiensia met na saray tuan ariripen nen Jehova so katuaay Eclesiastes 9:11: “Pinmawil ak, tan anengneng ko ed leksab na banwa, a say lumba andi ed saray masiglat, odino say bakal ed saray mabiskeg, anggan say tinapay met ed makabat, anggan saray kayamanan met ed totoo a makatalos, anggan say pamalangkap met ed totoo a matalabit; balet say panaon tan kapalaran [“ag-iilaloan a nagawa,” NW] nagawa ed sikara ya amin.” Panon iyan napaneknekan a tua diad malaknab, odino ed espiritual, a pantalos? Nayarin walaray kabkabat tayon Kristianos a makapangiyaplikan tampol ed konseho na Biblia, maong a manangidepensay katuaan, marunong ed panangiyaplikay prinsipyos na Biblia, tan maseseg ed pangegemtan na suston pikakabat. Ingen, lapud “panaon tan ag-iilaloan a nagawa,” naiimano na arum a sikara la natay limitado lapud impaka-aksidenti odino itatatken. Panumamengan da no kasin makaloob ira ed balon mundo na Dios ya agda la naeksperiensiay ipapatey.

4, 5. Akin ya andian na rason iray Kristiano a naandi so kompiyansa ra ed inkatunong nen Jehova?

⁴ Sano naandi’d bilay so asawa na sakey a Kristiano, say ot-ot tan liknaan na inkaandi so pirmi. Nayarin bilang sanasawa et nanlingkor ira ed si Jehova ed loob la na saray taon odino dekada ni ingen. Kabat na ataynanan ya asawa a pultotey ipapatey so bedber na panamaley.a (1 Corinto 7:39) Sirin, ta pian naamper so ibetel na kompiyansa to, nepeg ton kontroley emosyon to.​—Ikompara so Marcos 16:8.

⁵ Agaylan makabat no moriaey impatey na sakey ya asawa, ateng, anak, odino maapit a Kristianon kaaro bilang pankanawnawan nipanengneng so kompiyansa ed inkatunong nen Jehova! Anggan diad arap na mismon impakaperdi, makapanmatalek tayon si Jehova et aliwan agmatunong. Makapankompiyansa itayon amin a makagamor na andi-anggaan a bilay​—balanglan diad kiliktar odino diad kikioli​—so magmaliw a maliket. Nipaakar ed Dios, oniay kuan na salmista: “Sika buskagen mo so limam, tan peneken mo so saray pilalek na ami bengatlan mabilay. Si Jehova matunong ed saray amin a walwalna to, tan mapalangkap ed saray amin a kagagawa to. Si Jehova asingger ed amin ya ontawag ed sikato, ed amin day ontawag ed sikato ed katuaan. Gawaen to so pilalek na saray ontakot ed sikato; sikato denglen to met so akis da, tan ilaban tora.”​—Salmo 145:16-19.

No Liknaen Tayon Apairap a Tuloy

6, 7. (a) Akin a nayarin say arum a Tastasi a nanirap ed apalabas et walaan na duman pantalos la natan? (b) Akin ya agtayo momoriaen si Jehova bilang agmatunong lapud impangiyabuloy to’d ontan a kairapan ed apalabas?

⁶ Diad apalabas, walaray Tastasin nanirap lapud ag-impibali’d sakey ya aktibidad a natan et naawat lay konsiensia ra. Alimbawa, nayarin desisyon da iya ed apalabas laran taon nipaakar ed pigaran klase na serbisyo sibil. Balet natan et liknaen la na agin nagawaan to itan unong ed konsiensia to ya agnapapalakbatay Kristianon neutralidad to nipaakar ed kaplesan a sistema na bengabengatla.

⁷ Kasin ag-inkatunong ed biang nen Jehova a sikatoy pinaulyan ton manirap lapud agto ginaway bengatlan nagawa to la natan ya anggapoy mauges ya epekto? Maslak ya akaeksperiensia’d onia et agmanisip ya ontan. Imbes, nanliketan da ta walaan ira na pankanawnawan nidemostra ed publiko tan malinlinew a determinado iran ontalindeg ed isyu na sankatalbaan ya inkasoberano. (Ikompara so Job 27:5.) Anto tay rason a pagbabawian na sakey so impanumbok to’d konsiensia to diad intalindeg a malet parad Jehova? Diad sitotoor a panamemben ed Kristianon prinsipyos unong ed pakatalos da odino diad ikiwas ed panadagdag na konsiensia ton mismo, apaneknekan dan makanepegan ira ed pikakaaro ed si Jehova. Segurado, makabat so ipaliis ed kurson pakadisturboay konsiensia na sakey odino ed pakatiroran na arum. Nanonotan tayo ed saya so alimbawan impanengneng nen apostol Pablo.​—1 Corinto 8:12, 13; 10:31-33.

8. Akin a saray Judion Kristiano, a datin manutumbok ed Ganggan, so andian na rason a manduaruwa ed inkatunong nen Jehova?

⁸ Ta pian napaliket si Jehova, kinaukolan iray Judio ya ontulok ed Samploran Ganggan pati met lay nanduruman 600 a kaaruman a ganggan. Diad saginonor, ed silong na Kristianon uksoyan, say katutulok ed sarayan ganggan so agla kakaukolanen ed panaglingkor ed si Jehova, anggan ed saray Judio ed laman. Saray ganggan ya andian lay epekto et laktipen da iramay manasaglawi’d panaggalsim, panagselebray Sabaton, panagbagat na ayep, tan pananumbok ed saray pananebel ed tagano. (1 Corinto 7:19; 10:25; Colosas 2:16, 17; Hebreos 10:1, 11-14) Saray Judio​—pati saray apostol​—a nagmaliw a Kristianos so nibulos ed obligasyon a tumboken iray ganggan a kinaukolan dan tuloken sanen nisilong ira ed Ganggan a sipanan. Inreklamo ra kasi a say uksoyan na Dios et agmatunong ed datin kinaukolan to’d sikaran bengabengatla ya agla nakakaukolan? Andi, nanggayagaan day apalaknab a pakatalos ed saray gagala nen Jehova.​—Gawa 16:4, 5.

9. Antoy tua la ed pigaran Tastasi, balet akin ya agda nepeg a pagbabawian itan?

⁹ Diad modernon panaon, walaray pigaran Tastasi ya estrikton tuloy ed panmoria ra ed nepeg tan agnepeg dan gawaen. Nisesengeg ed satan a mas nanirap ira nen say saray arum. Saginonor, lapud apadaak a pikakabat et apalaknab day panmoria ra ed saray pamaakaran. Balet ta agda pagbabawian so inkiwas dan mitunosan ed konsiensia ra, anggaman posiblin sengegay mas impanirap iya. Talagan nakomendaan so impangipanengneng day inkamabulos dan manirap lapud katooran ed si Jehova, a “gagawaen . . . ya amin nisengeg ed ebanghelyo.” Bebendisionan nen Jehova so ontan a maridios a debosyon. (1 Corinto 9:23; Hebreos 6:10) Nansulat si apostol Pedro tekep na aralem a pakatalos: “Bangbalet no dia ed panggawa yo na kaabigan tan napasegsegang kayo tan itepel yo, sayan peteg so makapaliket ed Dios.”​—1 Pedro 2:20.

Pakaaral Manlapud si Jonas

10, 11. Panon nen Jonas ya impanengneng so inkaandiay kompiyansa ed si Jehova? (a) sanen naikdan na asainmin ya onla’d Ninive? (b) sanen agdineral na Dios iray taga-Ninive?

¹⁰ Sanen pinaonla’d Ninive, andiay apresasyon si Jonas ed impiya nen Jehova ed sikato. Kayari labat na makapataktakot ya eksperiensia lapud dilin inkamasugnar ton ontulok, et atalosan to nen Jonas, amoria toy lingo to, inawat toy asainmin ed biek taew, tan pinasakbayan to’d satan iray taga-Ninive ed paganigani lan kadederal. Insan agaway ag-inilaloan: Lapud magbabawin awawey na saray taga-Ninive, deniside nen Jehova ya ag-ituloy so kaderal da.​—Jonas 1:1–​3:10.

¹¹ Antoy reaksion nen Jonas? Mansyodot, nanreklamo ed Dios diad sakey a pikakasi. Say belas na reklamo to et onia: ‘Onia lay abaloan kon kagawa na bengabengatla. Sikato no akin a diad inmuna et agak linma ed Ninive. Balet natan, kayari amin na sinagmak ko, pati lay takot tan impanirap ed impakaakmon na saman a baleg a sira, tan kayari impasyan panamasakbay ed saray taga-Ninive ed paganigani lan kadederal, onia so resulta! Amin a nankimeyan tan nanirapan ko so maapa! Maong ni inatey ak la!’​—Jonas 4:1-3.

12. Antoy naaralan tayo manlapud eksperiensia nen Jonas?

¹² Wala tay makatunongan a rason ed panreklamo nen Jonas? Kasin agmatunong si Jehova diad impanginatnat na panangasi ed saray magbabawin managgaway-mauges? Diad tua et panggayagaan komon nen Jonas; samplon nilibon totoo so agtinigway! (Jonas 4:11) Balet say agmangingalngalep, mareklamon awawey to so angipatnag a sikatoy andiay aralem a kompiyansa ed inkatunong nen Jehova. Alabas so pakanengneng to’d inkasikaton dili balet ta melmelag ed arum. Makaaral tayo ed si Jonas diad agpangiyuuna ed saray liknaan tayo. Kombinsido tayo komon a say katutulok ed si Jehova, pananumbok ed niiiter a direksion diad panamegley na organisasyon to tan panangawat ed saray desisyon to, so maptek a bengatlan gawaen. Kombinsido tayo a “maong naani ed saray antakot ed Dios.”​—Eclesiastes 8:12.

Natan la so Panaon a Pabiskegey Kompiyansa Tayo!

13. Panon tayon amin a napabiskeg so kompiyansa tayo ed si Jehova?

¹³ Say pamabiskeg ed kompiyansa tayo ed si Jehova so makabat a bengatla. (Uliran 3:5-8) Siempre, nepeg a mas ni gawaen tayo nen say basta manpikasin patulongan ed si Jehova a lalon makapanmatalek. Ombulaslas so kompiyansan base’d suston pikakabat, kanian nepeg tayon pagmaliwen ya inagew-agew a rotina tayo so personal a panagaral na Biblia, panbasa ed Biblia tan say manangisalaysay-Biblian literatura. Makana so regular ya iyaatendi ed saray Kristianon miting, a singa met say maong a panagparaan tan pibibiang ed posiblin laknab. Say pangiyugali ed panginabang na saray katuaay Biblia ed arum, diad mataktikan panalona ed saray isusumpa, so mamaaralem met ed kompiyansa tayo ed si Jehova tan ed Salita to. Lalon sikatayoy napipibali ed sikato ed inagew-agew a paraan.

14. Akin ya agmanbayag et natawag iray totoo na Dios a mankompiyansa ira ed si Jehova ya agnin balot agawa nensaman?

¹⁴ Diad asingger ya arapen, say sankabalgan a panaon na kairapan ya ondapo ed kapiganman ed atooan a rasa so onterak a bigla. (Mateo 24:21) Sano nagawa itan, mas lalon nakaukolan na ariripen na Dios so pankompiyansa ed inkatunong nen Jehova tan ed direksion ya intarok na organisasyon to. Diad simbolikon dalan, a sitatalek da’d satan a tuloken so ganggan na Dios: “Gala, baley ko, onloob ka ed saray silir mo, tan ikaput mo so saray silir mo, tan ikaput mo so saray pintom ed liberliber mo. Yamot mo so inkasika ed daiset a panaon angga ed say kasanokan onlabas.” (Isaias 26:20) Akaloob la ra ed mananalimbeng ya atmospera na masulok a 85,000 a kongregasyon ed 232 a daldalin. Antokaman ni nayarin nilaktip ed simbawan “onloob ka ed saray silir mo,” makapanmatalek itayon tulongan itayo nen Jehova a sumpalen itan.

15. Panon a nidadanet so kipaakaray kompiyansa legay 1998, tan akin a dugaruga itan?

¹⁵ Kapilitan a pabiskegen tayo natan so kompiyansa tayo. No anggapoy kompiyansa tayo ed Kristianon agagi tayo, ed organisasyon nen Jehova tan, manuna’d amin, ed si Jehova a mismo, imposibli kililiktar. Kanian agaylan matukoy a legay 1998, aminpigan napapanonotay Tastasi nen Jehova ed intiron mundo, na saray salita na tinaon-a-teksto ra, ya “amin ya ontawag ed ngaran nen Jehova so nilaban”! (Roma 10:13, NW) Satan so nepeg tayon tuloytuloy a panpiyaan. No alikas tayon walay samsamet ya agpakaseguro ed sayan kompiyansa, kaukolan tayon peteken itan, on, natan la.

Say Panangukom nen Jehovah so Matunong

16. Antoy nayarin nagawa ed kompiyansa no agnabayuboan, tan panon a naamper so kagawa na saya?

¹⁶ Diad Hebreos 3:14 et napapasakbayan iray alanaan a Kristiano: “Nagmaliw itayo a minanabang nen Kristo, no ipagnayon tayo a malet so sengeg na talek tayo angga ed kasampotan.” Unong ed prinsipyo et onaaplika met irayan salita ed Kristianos a walaan na mangaraldalin ya ilalo. Say akaunan kompiyansa so naitakos noag itan nabayuboan. Makanakanay pangituloy tayo ed pangegemtan ed suston pikakabat, diad ontan et napabiskeg so pundasyon ya akabasiyan na kompiyansa tayo!

17. Akin a makapanmatalek itayo a no nipaakar ed kililiktar et sustoy pangukom nen Jesus?

¹⁷ Agmabayag et amin a nasyon so surien nen Kristo ta pian sarag ton ‘panbibiiganen ira naani ed sakey tan sakey, a singa say pastol ibiig to so saray karnero manlapud saray kanding.’ (Mateo 25:31-33) Makapanmatalek itayo a si Kristo so matunong diad pangukom no siopay makanepegan na kililiktar. Sikatoy inikdan nen Jehova na kakabatan, aralem a pakatalos, tan arum niran kakaukolanen a kualidad ed “pangukom to naani ed mundo unong ed katunongan.” (Gawa 17:30, 31) Komon ta say kombiksyon tayo et singa ed samay kien nen Abraham, a nankuan: “Arawi pa komon a gawaen mo [Jehova] so ontan, a pipapatey mo so saray matunong ed saray bagel; arawi komon ed sika, a saray matunong et singa saray bagel. Agta gawaen na Ukom na amin a dalin so maalas?”​—Genesis 18:25.

18. Akin ya agtayo alablabas a panpagaay agtayo ni amta ed kaplesan?

¹⁸ Tekep na sigpot a kompiyansa ed inkatunong nen Jehova, agtayo kaukolan a panaburidoay pananap na ebaebat ed saray tepet a singa: ‘Panoy kaukom na saray kapangiyanak tan ugugaw? Baleg ni kasin bilang na totoo so agni asabi maong a balita sano onsabi Armagedon? Panon to balet iramay walay deperensia ra ed nonot? Komusta iramay . . . ?’ Iyan lan ontan, diad kaplesan et agtayo amta no panon nen Jehova a resolbien irayan isyu. Balet, gawaen to itan diad matunong tan mapangasin dalan. Agtayon balot panduduaruwaan itan. Diad tua, onkelaw tan manliket tayo naani ed pakaimaton no panon ton resolbien iratan diad dalan ya agtayon balot naisip ni ingen.​—Ikompara so Job 42:3; Salmo 78:11-16; 136:4-9; Mateo 15:31; Lucas 2:47.

19, 20. (a) Akin ya agmakapuy so pangitepet na makatunongan a tepetepet? (b) Kapigan so pangiter nen Jehova na nakakaukolan ya ebaebat?

¹⁹ Agmet ipupulisay na organisasyon nen Jehova so masimoon, nipanpanaon a tepetepet, a singa sililingon ibabaga na pigaran sumusumpa. (1 Pedro 1:10-12) Balet, isisimbawa na Biblia a paliisan tayoray anggapoy kakanaan, mapalbeng a tepetepet. (Tito 3:9) Say pantepet na makatunongan a tepetepet tan pansukimat ed Salitay Dios tan ed saray Kristianon palapagan pian anapey Makasulatan iran ebat so mamadaak na suston pikakabat tayo tan diad ontan et mamabiskeg ed kompiyansa tayo ed si Jehova. Tutumboken na organisasyon so alimbawa nen Jesus. Agto kinomentoay tepetepet ya agni asabi dugan panaon a pangebat ed satan. Insalaysay to: “Wala ni amayamay a bengatlan ibagak ed sikayo, balet agyo ni nayarian iran talosan natan.” (Juan 16:12) Inaksobi to met a walaray bengatlan anggan sikaton mismo et agto ni amta anggad saman a punto.​—Mateo 24:36.

²⁰ Dakel ni iparungtal nen Jehova. Talagan makabat so panalagar ed sikato, a matalek a say impangipanaon ed saray gagala to so dugarugan makakapet ed saray pankaukolan ed satan a panaon. Makapanmatalek itayo a bektan onsabi nigeter a panaon nen Jehova, napanggayagaan tayoy pakagamor na kaaruman ya aralem a pakatalos ed saray dalan to. On, natumangan itayo, daput no agamilen tayoy absoluton kompiyansa ed si Jehova tan ed organisasyon ya uusaren to. Papaseguroan itayo na Uliran 14:26: “Dia ed takot ed Jehova wala so mabiskeg a panmatalek; et saray anak to nawalaan ira na pasen na painawa.”

[Paimano ed leksab]

Antoy Padesir Yo?

◻ Akin ya agmakabat so pangiyabuloy ed emosyon a mamabetel na kompiyansa tayo’d si Jehova?

◻ Antoy naaralan tayo manlapud eksperiensia nen Jonas?

◻ Akin ya ontanlan importanti so panagaral na Biblia tan iyaatendi ed miting?

[Litrato ed pahina 16]

Anggan diad arap na personal a pakaperdian, makapanmatalek tayo a matunong si Jehova

[Saray litrato ed pahina 18]

Kasin segurado kan say kompiyansam et walad si Jehova?