Nepeg a si Jehova so Pankompiyansaan Tayo
“Si Jehova sikato naani panmatalkan mo.”—ULIRAN 3:26.
1. Anggaman dakel so mankuan a manmamatalek ed Dios, antoy mangipapabitar ya aliwan lawas ya ontan?
SAY diparan ya “In God We Trust” so naimano’d kuarta na Estados Unidos na Amerika. Balet kasin amin daramay manguusar ed sayan dolyar, ed satan a bansa odino inerman et talagan panmamatalekan day Dios? Odino mas panmamatalekan day kuartan mismo? Say ontan a panagmatalek ed kuarta na satan a nasyon odino ed arum nin bansa so agnitunos ed panagmatalek ed sakey a makapanyarin-amin a Dios na aro, ya agton balot aabusoey pakayari to tan agnanengnengay inka-agum. Diad tua et kokondenaen toy agum diad malinlinew a paraan.—Efeso 5:5.
2. Antoy awawey na tuan Kristianos nipaakar ed pakayari na kaykayamanan?
2 Say pankokompiyansaan na tuan Kristianos et say Dios, aliwan ed kaykayamanan, pati lay “panamalingo [“a pakayari,” NW] to.” (Mateo 13:22) Amoria ran say pakayari na kuarta a mamawalay liket tan mangiliktar ed bilay so limitadon tuloy. Aliwan ontan no nipaakar ed pakayari na Makapanyarin-amin a Dios. (Sofonias 1:18) Kanian, talagan makabat so simbawan: “Nabulos kayo komon a manlapu ed aro na pilak, panliketan yo so bengatla a wala ed sikayo. Ta sikaton dili imbaga to: ‘Agtaka naani taynan, tan agtaka naani ikaindan’”!—Hebreos 13:5.
3. Panon a mangisisindag na liwawa so konteksto na Deuteronomio 31:6 ed impangaon nen Pablo ed satan a bersikulo?
3 Sanen insulat iratan a salita’d Hebreon Kristianos, inaon nen apostol Pablo iray bilin nen Moises ed saray Israelita sakbay a tuloy na ipatey to: “Ombiskeg ka, tan manliket ka a maong, agka ontakot nisay nakigtot ed sikara; si Jehova a Dios mo sikato so mila a miulop ed sika: agnaani onkulang ed sika, nisay manpaulyan ed sika.” (Deuteronomio 31:6) Ipapanengneng na konteksto ya impaseseg nen Moises so pankompiyansa ed si Jehova a mas ni nen say basta panmatalek a tarokan tora na materyal iran pankaukolan. Panon ya ontan?
4. Panon a pinaneknekan na Dios ed Israelitas a sikatoy napanmatalkan?
4 Kaleganay 40 taon say Israel et kaukolan a manteyengteyeng ed kalawakan, napanpiyaan so Dios diad impanlegpet to’d saray nakakaukolan da’d bilay. (Deuteronomio 2:7; 29:5) Tinarokan to met ira na panangidaulo. Sakey a pakapatnagan ed saya et walay lurem diad agew tan apuy diad labi, ya angitonton ed saray Israelita ed “dalin a panagosan na gatas tan dilo.” (Exodo 3:8; 40:36-38) Diad insabi panaon ya iloob da la ed Insipan a Dalin, pinili nen Jehova si Josue a magmaliw a kasandi nen Moises. Nailaloan ya onlaban iray manaayam ed satan a dalin. Balet ta nanakar la si Jehova a kaibay totoo to ed loob na saray dekada, kanian ag-ira kaukolan ya ontakot. Walaan na amin a katunongan iray Israelita a bidbiren si Jehova bilang Dios a napanmatalkan!
5. Panon a mipadparay situasyon na Kristianos natan ed saramay Israelita sakbay na inloob da ed Insipan a Dalin?
5 Manmamartsa laray Kristiano natan ed kalawakan na peles a marelmeng a mundo a paarap ed balon mundo na Dios. Arum ed sikara so wala la’d sayan kurso ed masulok lan 40 taon. Sikaray manalalagey la ed tambib na balon mundo na Dios. Ingen, wadtan niray kakabusol, tekep na getman amperey siopaman ed iloob ed magmaliw a singa Insipan a Dalin, mas makapalikliket nen samay akauna a nanagosay gatas tan dilo. Kanian parad saray Kristiano natan, matukotukoy a tuloy iray salita nen Moises ya inulit nen Pablo: “Agtaka naani taynan, tan agtaka naani ikaindan”! Amin a mansiansian mabiskeg tan makpel, napno na pananisia, a mankokompiyansa ed si Jehova, so seguradon natumangan.
Kompiyansan Base’d Pikakabat tan Pikakaaro
6, 7. (a) Antoy anubok ed kompiyansa nen Abraham ed si Jehova? (b) Anto kasi liknaan nen Abraham legan a mamapaarap ed pangibagatan to’d si Isaac?
6 Aminsan et niganggan so inmunan ateng na Israelitas ya Abraham a mangibagat ed ilalak ton Isaac bilang popoolan ya apay. (Genesis 22:2) Antoy amasarag ed sayan maaron ama a nawalaan na ontanlan agnabuyak a kompiyansa ed si Jehova a mabulos tan tampol ton tinulok? Oneebat so Hebreos 11:17-19: “Lapu ed pananisia, si Abraham, sanen sikato so asali, insaklang to si Isaac: salanti, say angawat a sililiket ed saray sipan, sikaton insaklang to wari so bogbogtong ya Anak to; a sikato so angibagaan ed sikato na saya: ‘Dia ed Isaac natawag naani so “kailalakan” mo.’ A motekteken to ya anggan dia ed saray inatey ni, nayarian na Dios so mamaalagey ed sikato; diman met so pinawilan to ya angawat ed aliling.”
7 Tandaan a taloy agew a nambiahe ira di Abraham tan Isaac pian nasabi panbagatan. (Genesis 22:4) Magenap so panaon pian nonoten a maong nen Abraham so pagagawa ed sikato. Naisip tayo tay liknaan tan emosyon to? Say inkianak nen Isaac so ag-inilaloan a sengegay gayaga. Satan a pakapatnagay isasalet na Dios so lalon amaapit ed kinen Abraham tan say datin lepes ya akulaw to, si Sara, ed Dios. Maseguron nanlapulad satan et nambilay iran mailalo’d arapen nen Isaac tan saray kapolian to. Kasin saray panpilpilalekan da et napakset, a singa pawayan to lapud kekerewen na Dios?
8. Panon ya apaaralem so kompiyansa nen Abraham ed Dios a mas ni nen say panisian sarag Ton paolien si Isaac?
8 Siansia, walaay kompiyansa si Abraham a nibase’d pankabat a maong na maapit a sankaaro. Bilang “kaaro na Dios,” si Abraham et “sinisia [to] so Dios, et nibilang ed sikato a katunongan.” (Santiago 2:23) Nagkalalo ni so kompiyansa nen Abraham ed si Jehova nen say basta panisian sarag na Dios a paolien si Isaac. Kombinsido met si Abraham a say pagagawa ed sikato nen Jehova et manepeg labat, anggaman agto amtan amin so detalye. Andian na rason a panduaruwaan ton matunong si Jehova ed sayan kerew. Kabekta, apabiskeg so kompiyansa nen Abraham sanen sinmalet so anghel nen Jehova pian amperey aktual a kibagat nen Isaac.—Genesis 22:9-14.
9, 10. (a) Kapigan so akadkaunan impangipanengneng nen Abraham na kompiyansa ed si Jehova? (b) Anton importantin leksion so naaralan tayo manlapud si Abraham?
9 Impanengneng nen Abraham iyan parehon nengneng na kompiyansa ed inkatunong nen Jehova manga 25 taon ed akadkauna. Apasakbayan ed kaderal na Sodoma tan Gomorra, natural labat a panpagaan toy kipapasen na siopaman a matunong a totoon manaayam diman, pati say kaanakan ton Lot. Akikasi si Abraham ed Dios diad sarayan salita: “Arawi pa komon a gawaen mo so ontan, a pipapatey mo so saray matunong ed saray bagel: arawi komon ed sika, a saray matunong et singa saray bagel. Agta gawaen na Ukom na amin a dalin so maalas?”—Genesis 18:25.
10 Kombinsido so patriarkan Abraham ya agbalot manggawa si Jehova na bengatlan agmatunong. Diad saginonor et inkanta na salmista: “Si Jehova matunong ed saray amin a walwalna to, tan mapalangkap ed saray amin a kagagawa to.” (Salmo 145:17) Marakep no tepetan tayoy inkasikatayo: ‘Aawaten ko ta so iyaabuloy nen Jehova a sagmaken ko ya agpanduduaruwaay inkatunong to? Kombinsido ak ta ya antokaman ya iyaabuloy to et parad kagunggunaan ko tan ontan met ed arum?’ No say ebat tayo et on, akaaral tayo lay importantin leksion a manlapud si Abraham.
Pankompiyansa ed Saray Pinili nen Jehova
11, 12. (a) Anton aspekto na kompiyansa so nakakaukolan parad ariripen na Dios? (b) Antoy nayarin problema tayo no maminsan?
11 Saramay momoriaen day Jehova bilang kompiyansa ra so mankokompiyansa met ed saray lalakin pinili nen Jehova ya usaren ed pakasumpal na saray gagala to. Parad Israelitas, kabaliksan na saya so pankompiyansa ed si Moises tan diad saginonor et diad kasandi to, si Josue. Parad asasakbay a Kristianos, kabaliksan toy pankompiyansa ed apostoles tan mamasiken ed kongregasyon na Jerusalem. Parad sikatayo natan, kabaliksan toy pankompiyansa ed “say matoor tan makabat ya aripen” ya aturon mangitarok ed sikatayo na espiritual a “tagano ed panaon a kinepeg to,” ontan met ed saramay walad limog da a Mananguley ya Ulop.—Mateo 24:45.
12 Diad tua, say pankompiyansa tayo’d saramay mangidadaulo ed Kristianon kongregasyon so parad kagunggunaan tayon mismo. Nibaga ed sikatayo: “Ontulok kayo ed saray wala a manuley ed sikayo, tan pauleyan kayo ed sikara; ta manbabantay ira lapu ed saray kamarerwa yo, a singa sikara so mangiter naani pipalinewan; pian sikatoya so gawaen da a sigagayaga, tan aliwa a sieermen; ta saya agmakapaabig ed sikayo.”—Hebreos 13:17.
Aghuhusgaan Iray Pinili nen Jehova
13. Antoy walan rason tayo a mankompiyansa ed saramay tinuro a mangidaulo?
13 Tutulongan itayo na Biblia a simbangey panagkompiyansa ed saramay mangidadaulo ed totoo nen Jehova. Itepet tayo pa’d inkasikatayo: ‘Kasin alingo met si Moises? Lawas ta’n nipanengneng na apostoles so singa-Kriston awawey a labay nen Jesus a niwala ed sikara?’ Mapatpatnag iray ebat. Deneside nen Jehova ya usaren iray matoor tan debosyonadon lalaki a mangigiya ed totoo to, anggaman sikaray ag-ayadyari. Mitukoyan, anggaman saray mamatatken natan so ag-ayadyari, siansian nepeg tayon bidbiren ira bilang “[tinuro] na espiritu santo [a magmaliw] a managbantay pian pastolan . . . so iglesia na Dios.” Makanepegan ira ed suporta tan respeto tayo.—Gawa 20:28.
14. Antoy makatantanda ed impamili nen Jehova ed si Moises imbes a si Aaron odino si Miriam bilang lider?
14 Panguloan na taloy taon si Aaron ed si Moises, balet sikaray yogtan na atsi ran Miriam. (Exodo 2:3, 4; 7:7) Tan lapud si Aaron et mas marlas a manalita nen si Moises, sikatoy aturon pinagkasangiyan na agi to. (Exodo 6:29–7:2) Ingen, diad kidauloy Israelitas et agpinili nen Jehova so sankapanguloanan, si Miriam, odino say sankamarlasan a manalitan Aaron. Say impamili to ed si Moises so base’d impangonsidera ed amin a bengatla tan saray pankaukolan ed saman a bekta. Sanen andian ira na ontan a malinew a pakatebek, inreklamo di Aaron tan Miriam: “Si Moises ta labat so pisalitaan nen Jehova? Aglabat misalita kasi ed sikata?” Si Miriam, anganko say manunan sugsog, so adusa lapud agpangingalngalep ed pinili nen Jehova, a nepeg komon a binidbir dan dua nen Aaron bilang “[say] mauyamon tuloy ed saray amin a lalaki a wala ed tapew na dalin.”—Numeros 12:1-3, 9-15.
15, 16. Panon a pinaneknekan nen Caleb a sikatoy nankompiyansa ed si Jehova?
15 Sanen nibaki iray 12 espiya pian mansimasim ed Insipan a Dalin, negatiboy imbalita na 10. Kinebbiew daray Israelita diad impanaglawin saray Cananeo et “pulos ya atatagey ya inalageyan.” A sengegan iya na ‘impantalabutob [na Israelitas] sumpa ed si Moises tan ontan met ed si Aaron.’ Balet aliwan amin ed espiya so agnankompiyansa ed Moises tan ed si Jehova. Nabasa tayo: “Et si Caleb pinareen to so baley ed arapan nen Moises, tan inkuanto: ‘Onla itayo a tampol, tan kayarianen tayo, ta lapu ed nasarag tayo a taloen.’” (Numeros 13:2, 25–33; 14:2) Say malet a talindeg nen Caleb so akikasakeyan na kapara ton espiyan Josue. Nampara iran angipanengneng na kompiyansa ra’d si Jehova sanen inkuan da: “No si Jehova et karoyroyo to itayo, yakar to itayo ed sayan dalin, tan iter to ed sikatayo; sakey a dalin a managagos so gatas tan dilo. Daput . . . , agkayo antakot ed saray totoo ed satan a dalin; . . . si Jehova ibaan to itayo. Agkayo ontakot ed sikara.” (Numeros 14:6-9) Sayan kompiyansa ed si Jehova so atumangan. Diad saramay wala la’d edad a kailalakan a mabilay ni’d saman, si Caleb, Josue, tan pigaran Levita labat so apribilihyoan a makaloob ed Insipan a Dalin.
16 Pigaran taon ed saginonor inkuan nen Caleb: “Balet inunor ko a masimoon si Jehova a Dios ko. . . . Et natan, nia, si Jehova inyagel toak a mabilay, singa sinalita to, ed sarayan apataplo tan lima a taon, manlapu ed panaon ya impansalita nen Jehova na saya a salita ed Moises, leleg a say Israel nanakar ed kalawakan, et natan, nia, ed saya ya agew walomplo tan lima so taon to. Et ingen mabiskeg ak ed sayan agew, singa ak nensaman dia ed agew ya impangibaki nen Moises ed siak. Singa say biskeg ko ni nensaman, ontan so biskeg ko ni natan.” (Josue 14:6-11) Imanoen pay positibon awawey nen Caleb, say katooran to, tan saray abilidad to ed pisikal. Ingen, agpinili nen Jehova si Caleb a magmaliw a kasandi nen Moises. Sayan pribilihyo so initer ed si Josue. Makapanmatalek tayo a walaray rason nen Jehova no akin a sikatoy pinili to, tan sankaabigan itan a pili.
17. Anto kasi ompatnag a napangirasonan ya agmanepeg si Pedro ed responsabilidad?
17 Amitlon danay ya imburi nen apostol Pedro so Katawan to. Bengatbengat to met ya inuleyan iray pamaakaran, a tinipas toy layag na aripen na atagey a saserdote. (Mateo 26:47-55, 69-75; Juan 18:10, 11) Nayarin ibaga na arum a si Pedro et payakot, ag-asimbang a too, ya agmakanepegan ed nikaduma iran pribilihyo. Balet, siopa tay naikdan na saray tombok ed Panarian, ya apribilihyoan a mangilukas na dalan parad mangatatawen a tawag ed taloran grupo? Si Pedro.—Gawa 2:1-41; 8:14-17; 10:1-48.
18. Anton lingo, a singa sinalambit nen Judas, so labay tayon paliisan?
18 Ipapanengneng na sarayan alimbawa a nepeg tayon alwaran so panhusga unong ed maparungtal ya apireng. No mankompiyansa itayo ed si Jehova, agtayo panduaruwaan iray pinili to. Anggaman say mangaraldalin a kongregasyon to et titibukelen na ag-ayadyarin totoo, ya agda ibabagan ag-ira nalilingo, uusaren to ra ed makapakelkelaw a dalan. Pinasakbayan nen Judas, say agi nen Jesus ed ina, iray inmunan-siglon Kristiano nipaakar ed saray indibidual ya “ipasen dan andi-kana so pakauley tan pagpaugsen da so saray atagey ya inkabtang.” (Judas 8-10) Agtayora komon aaligen.
19. Akin ya anggapoy katunongan tayon husgaan iray pinili nen Jehova?
19 Ompatnag a pipilien nen Jehova iray indibidual parad pigaran responsabilidad a walaay nikaduman kualidades a nakakaukolan ed kigiya na totoo to ed dalan a labay ton laen da ed satan a partikular a panaon. Nepeg tayon pambanikelan a bidbiren iyan katuaan, ya aghuhusgaan iray pinili na Dios, noagta kontento tan mapaabeban manserbi ed angipasenan ed sikatayo nen Jehova bilang indibidual. Diad ontan et nipapanengneng tayon say kompiyansa tayo et si Jehova.—Efeso 4:11-16; Filipos 2:3.
Panagkompiyansa ed Inkatunong nen Jehova
20, 21. Antoy naaralan tayo manlapud dalan na pidedeneng na Dios ed si Moises?
20 No maminsan et onkiling tayon masyadoy pankokompiyansa tayo’d inkasikatayo tan samsamet ed si Jehova, manaral tayo pa’d si Moises. Sanen mantaon na 40, inggapo toy personal a panangibulos to’d Israelitas ed impangautibo na Ehipto. Talagan marakep so getma to, balet ta agnanresulta ed tampolan a kiliktar na Israel, nisay amarakep ed mismon situasyon to. Diad tua, apilitan ya ombatik. Kayari lambengat ya adalan toy 40 taon a mairap a panangipasal ed sankailin dalin a kinmualipika’d pakapilin gawaen so labay ton nagawa ed inmuna. Natan et makapankompiyansa la’d pananulong nen Jehova lapud nagagawa laray bengatla ed paraan nen Jehova diad panaon a mitukoyan ed panag-orasan To.—Exodo 2:11–3:10.
21 Nayarin itepet na balang sakey ed sikatayo: ‘Napapalakbatan ko ta no maminsan si Jehova tan saray aturon mamatatken ed kongregasyon, a papepelesen odino gagawaen iray bengatla ed dilin paraan ko? Imbes a manliknan agnaiimano parad pigaran pribilihyo, mabulos ko ta’n aawatey kipapasal ko ed kaplesan?’ Talaga ta ya akaaral itayo na importantin leksion nipaakar ed si Moises?
22. Anggaman abalang so baleg a pribilihyo to, antoy liknaan nen Moises nipaakar ed si Jehova?
22 Niarum ni, makaaral itayo na sakey nin leksion nipaakar ed si Moises. Ibabaga ed sikatayo na Numeros 20:7-13 so agawa ton lingo, a baleg ya inkaperdian to. Abalang toy pribilihyon pangidaulo’d Israelitas ed Insipan a Dalin. Kasin inebatan toy desisyon nen Jehova a satan et agmakanepegan? Kasin inyarawi to lay inkasikato, a singa panangibaga, a manburildil lapud masyado lan impantrato na Dios ed sikato? Naandi ta la so kompiyansa nen Moises nipaakar ed inkatunong nen Jehova? Naromog tayoray ebat ed saray sinalita nen Moises ed Israel sakbay a tuloy na impatey to. Nipaakar ed si Jehova et oniay inkuan nen Moises: “Ayadyari so gawa to, ta kaptekan so saray amin a dalan to. Sakey a Dios a napanmatalkan tan anggapo so kaugsan, sikato so matunong tan maptek.” (Deuteronomio 32:4) Maseguron pinansiansia nen Moises so kompiyansa to ed si Jehova anggad anggaan. Komusta itayo? Kasin papabiskegen tayo so kompiyansa tayo bilang sinansakey ed si Jehova tan ed inkatunong to? Panon tayon nagawaan itan? Amtaen tayo.
Panon Yon Ebatan?
◻ Antoray rason na Israelitas ed panmatalek ed si Jehova?
◻ No nipaakar ed kompiyansa, antoy naaralan nipaakar ed si Abraham?
◻ Akin a kaukolan ya agtayo huhusgaan iray pinili nen Jehova?
[Litrato ed pahina 13]
Lalaktipen na kompiyansa ed si Jehova so panrespeto ed saramay mangidadaulo ed kongregasyon