Makpel ya Manpulong ed Lugar na Negosyo
1. Akin ya agtayo nepeg a nadismaya no natatakot tayon manpulong ed lugar na negosyo?
1 Kasin natatakot kan manpulong ed lugar na negosyo? No ontan, agka nadidismaya ta anggan si Pablo ya andiay takot ya ministro et kaukolan to ni ‘manpakpel’ pian makapanpulong. (1 Tes. 2:2) Wadia ray kaslakan ya pampapagaan na arum tan saray praktikal ya suhestion pian nasungdoan iratan.
2. Akin ya agtayo nepeg a mapaga ya ompan nadisturbo tayo ray mantratrabaho?
2 Manpasnok Kasi Iray Mantratrabaho no Nadisturbo Ira? Maslak ya negosyo et manlilingkor ed publiko kanian talagan iilaloan na saray mantratrabaho ya wala ray onsabi tan kaukolan da ran imanoen. Dakel so marespeto lapud iisipen da a nayarin kustomer kayo. No mankawes na desente tan makaaro kayo, respetoen da kayo.
3. Antoy gawaen tayo pian ag-onsyodot iray kustomer?
3 Kaukolan Ko Kasi Manpulong Anggano Dakel so Kustomer? No nayari, pilien so oras ya ag-ira masyadon busy, singa bilang, sano kakkapanlukas da. Asinggeran yoy manager o clerk no anggapo lay katongtong to. Kaukolan et antikey labat so presentasyon yo.
4. Antoy nayari tayon ibaga no manpupulong ed lugar na negosyo?
4 Antoy Ibagak ey? No pigara ran mantratrabaho, tepeten no siopay nepeg a katongtongen. Nayarin ibagam: “Mataltalag min nasabian ed kaabungan iray mantratrabaho, kanian linma kami dia ed pantratrabahoan yo. Amta mi ya walay gagawaen yo kanian maganggano kami labat.” Pian agda isipen ya manlalako tayo, mas maabig no agtayo bibitlaen so nipaakar ed donasyon likud labat no tepeten da no panon ya nasusuportaan so kimey tayo. Nayarin onkerew na permiso ed manedyer ya mitongtong a magano ed saray mantratrabaho, depende ed klase na negosyo. Usaren lamet so presentasyon mo ed sikara. No alikas mon busy, patikeyen itan insan ikdan na tract. No agmakapitongtong ed saray mantratrabaho, ompan abuloyan da kayon mangitilak na literatura ed panagpainawaan da odino diad arum a pasen ya nanengneng da itan.
5. Akin a nepeg ya makpel a mibiang ed panagpulong diad lugar na negosyo?
5 Makpel ya pinulongan nen Jesus tan Pablo iray totoo ed pannenegosyoan da, tan sarag yo met itan. (Mat. 4:18-21; 9:9; Gawa 17:17) Kerewen ed si Jehova ya tulongan to kan nawalaan na pakpel tan kalmadon puso. (Gawa 4:29) Diad lugar na negosyo, walan walay nasabian tayon nakatongtong tayo, kanian akin kasi no salien yo iyan mabungan klase na panagpulong?